ماسكەۋلىك ناسيحاتشى، كرەملدى توڭىرەگىندە جۇرگەن مارگاريتا سيمونيان: «رەسەي سوعىستى توقتاتا الادى»، - دەپ مالىمدەدى.

ماسكەۋ دونالد ترامپپەن كەلىسسوزدەردە مايدانداعى سوعىستى توقتاتۋعا كەلىسۋى مۇمكىن. رەسەي تاراپى قازىردىڭ وزىندە باسىپ الىنعان اۋماقتى باۋىرىنا باسىپ قالۋعا ۇمىتتەنىپ وتىر. بۇل تۋرالى رەسەيلىك اكتەر جانە بلوگەر ۆياچەسلاۆ مانۋچاروۆقا بەرگەن سۇحباتىندا مارگاريتا سيمونيان ايتتى.

«مەنىڭ ويىمشا، ترامپ تا، ءبىز دە وسى كەلىسسوزدەر باستالعان كەزدە ءبىزدىڭ باقىلاۋىمىزداعى اۋماعىمىزدى العا تارتا وتىرا، مامىلەسۋدى قالايمىز. سوعىس جەلىسى قاي جەردە تۇيىسەدى سول تۇيىسكەن جەردىڭ ءبارى دە بىزدىكى»، - دەيدى سيمونيان.

ول ۋكراينانىڭ ناتو-عا ەنبەۋى تۋرالى كەپىلدىكتەر بەرىلۋى مۇمكىن دەپ بولجامىن العا تارتتى. «ولاردىڭ كەپىلدىكتەرىنە ەشكىم ەشقاشان سەنبەسە دە، ءبارىبىر، ولار قاعاز جۇزىندە بولسا دا، ۋكراينانىڭ ناتو-عا كىرمەۋى تۋرالى كەپىلدىك قاجەت»، - دەپ مالىمدەدى سيمونيان.

ونىڭ پىكىرىنشە، ۋكراينانىڭ «رەسەيگە قاتىستى اگرەسسيۆتى قادامدار جاسامايتىنىنا جانە ورىس ءتىلدى حالىقتىڭ اراسىنا ىرىتكى سالمايتىنىنا» «قانداي دا ءبىر كەپىلدىكتەر» سۇرالۋى مۇمكىن دەپ بىلگىشسىنىپ الدى.

ال «Bloomberg» ساراپشىلارى: «ترامپ ۋكراينانى رەسەيمەن مەرزىمىنەن بۇرىن كەلىسسوزدەر باستاۋعا ماجبۇرلەمەيدى. ترامپقا ۋكراينانىڭ تاعدىرى اقش مۇددەسى ءۇشىن ستراتەگيالىق ماڭىزدى ەمەس سياقتى كورىنەدى. بىراق ترامپ «اۋعانستان وقيعاسىنىڭ قايتالانۋىن» قالامايدى»، - دەپ جازادى.

پرەزيدەنت ترامپ وسىعان دەيىن: «پۋتين مەنىمەن جولىعۋعا اسىعىپ وتىر. ءبىز سوعىستى توقتاتۋ بويىنشا كەلىسىم تابا الامىز دەپ ويلايمىن. بىراق بۇل كەزدەسۋ مەن رەسمي تۇردە قىزمەتكە كىرىسپەي تۇرىپ، مۇمكىن ەمەس»، - دەگەن بولاتىن.

اق ءۇيدىڭ ۇلتتىق قاۋىپسىزدىك جونىندەگى بولاشاق كەڭەسشىسى مايك ۋولس: «ترامپ پەن ءپۋتيننىڭ كەزدەسۋىنە دايىندىق قازىردەن ءجۇرىپ جاتىر. جاقىن كۇندەرى ترامپ پەن پۋتين تەلەفون ارقىلى سويلەسۋى مۇمكىن. ترامپتىڭ پوزيتسياسى بىلاي: پرەزيدەنت ترامپتىڭ كوزقاراسى بويىنشا، ەگەر ءسىز باسقا تاراپپەن قارىم-قاتىناسىڭىز نەمەسە ديالوگىڭىز بولماسا، مامىلە جاساي المايسىز. ءبىز سول ديالوگتى جاقىن ارادا ورناتامىز»، - دەيدى.

ال شۆەيتساريا سىرتقى ىستەر مينيسترلىگى ترامپ، پۋتين مەن زەلەنسكي اراسىنداعى كەلىسسوزدەر ءۇشىن الاڭ ۇسىناتىنىن ايتقان.

Abai.kz