وڭتۇستىك-شىعىس ازيا مەن افريكا ەلدەرى، اسىرەسە تايلاند، ۆەتنام مەن ەگيپەتكە ساياحاتتاپ باراتىن تۋريستەر ونداعى ۆاليۋتا ايىرباستاۋ بەكەتتەرىندە دوللارعا قاتىستى ءتۇرلى باعامدارعا تاپ بولۋدا. بۇل ەلدەردە 2013 جىلدان بەرى باسىلعان، جاڭا ديزاينداعى، كوك ءتۇستى دوللاردىڭ باعامى قىمبات ءارى ءتيىمدى بولادى دا، ەسكى اق بانكنوتتاعى دوللاردىڭ قۇنى تومەندەۋ كەلەدى. بۇل تۋرالى Dala inside تەلەگرام ارناسى جازدى. 

وسىعان قاتىستى، قازىر ەلىمىزدە ۆاليۋتا ايىرباستاۋ بەكەتتەرى مەن بانكتەردە دوللار ساتىپ الاتىن وتانداستارىمىز جاڭا كوك بانكنوتانى تالاپ ەتۋدە. اق دوللاردى ەشكىم العىسى كەلمەيدى. تيىسىنشە اق دوللار جيناقتالىپ، كوك دوللار دەفيتسيتى سەزىلە باستادى. بۇل پروبلەمانى شەشۋ ءۇشىن بىزدەگى ءبىرشاما جەكەمەنشىك قارجى ۇيىمدارى اق دوللار قابىلداۋعا شامامەن 2% كوميسسيا ورناتقان.

تەڭگەمەن مۇنداي پروبلەما بولسا، ونى ۇلتتىق بانك ەميسسيا ورتالىعى رەتىندە تەز شەشىپ تاستار ەدى. بىراق دوللاردى اقش-تاعى فەدەرالدى رەزەرۆ جۇيەسى باسادى. ءبىزدىڭ مونەتارلى ورگاندار دوللاردىڭ بانكنوتاسىنا قاتىستى جاعدايعا باقىلاۋ ورناتا المايدى.

جالپى بىزدە دوللار بانكنوتاسىنىڭ ەسكىلىگىنە قاتىستى پروبلەما جوق ەدى. اقش ءوز كەزەگىندە ءتىپتى 110 جىل بۇرىن باسىلعان دوللار بانكنوتاسىن زاڭدى اقشا قۇرالى دەپ تابادى جانە قابىلداي بەرەدى. «اقش ەسكى بانكنوتتاردى مويىنداۋدان باس تارتادى» دەگەن جەل ءسوز جىل سايىن پايدا بولسا دا، فرس تاراپىنان ەشقاشان بۇعان قاتىستى رەسمي مالىمدەمە جاسالعان ەمەس.

تايلاند، ۆەتنام، مىسىر سىندى ەلدەردىڭ قارجى ۇيىمدارىندا دوللاردىڭ بارلىق ديزاينداعى ۆاليۋتاسىنىڭ جالعان/راستىعىن تەكسەرۋ جۇيەسى ءالسىز. ولار سوڭعى جابدىقتارىن جاڭالاعاندا، تەك كوك دوللاردى انىقتاي الاتىن قۇرىلعىلارعا يەك ارتقان بولاتىن. تيىسىنشە، الەمنەن ميلليونداعان تۋريست اعىلىپ، ءتۇرلى ديزاين مەن نومينالداعى دوللار ساعات سايىن كەلىپ جاتقاندىقتان، جالعان اقشا اينالىمىنان قورعانۋ ءۇشىن «كوك دوللار سەنىمدى، ال اق دوللار سەنىمسىز» دەگەن ۇعىم قالىپتاسقان. دوللار باعامىنىڭ بانكنوتا ديزاينىنا بايلانىستى بەكىتىلىپ جاتقانى دا سول سەبەپتەن.

دەمەك، اق پەن كوك دوللار پروبلەماسىن ءبىزدىڭ شەتەلگە ساياحاتتايتىن تۋريستەر اكەلىپ وتىر. ونىڭ ماسشتابى ۇلعايا بەرەتىن بولسا، ۇلتتىق بانك ءبىر رەتتىك شارا اياسىندا بانكتەر مەن قارجى ۇيىمدارىنا اق دوللاردى اقش-قا جىبەرىپ، ونى كوك دوللارعا اۋىسترىپ الۋعا رۇقسات بەرۋى مۇمكىن. سول كەزدە ەلدەگى بارلىق اق دوللاردان قۇتىلىپ الۋ كەرەك.

Abai.kz