گازا سەكتورىنداعى اتىستى توقتاتۋ كەلىسىمىنىڭ ءبىرىنشى كۇنىندە حاماس كەپىلگە العان ءۇش ايەلدى بوساتتى، ولار جەكسەنبى كۇنى يزرايلگە امان-ەسەن ورالدى.

ءدال سول ۋاقىتتا بوسىپ كەتكەن سانسىز پالەستينالىقتار ۇيلەرىنە جول تارتتى.

تەل-اۆيۆتە ادامدار رومي گونەن، دورون شتاينبرەحەر جانە ەميلي ءداماريدىڭ بوساتىلعانى تۋرالى جاڭالىقتى ەرەكشە تەبىرەنىسپەن قابىلدادى.

2023 جىلعى 7 قازانداعى قاندى شابۋىلدا ءۇش ايەل كەپىلگە الىنىپ، سودان بەرى گازادا تۇتقىندا بولعان. يزرايل تەلەارناسىنىڭ تىكەلەي ەفيرىندە حاماس سودىرلارىنىڭ قورشاۋىنداعى كولىكتەن ءۇش ايەلدىڭ شىعىپ، حالىقارالىق قىزىل كرەستكە تيەسىلى كولىككە كىرىپ كەلە جاتقانى كورسەتىلگەن.

قىزىل كرەست ۇيىمى يزرايل شەنەۋنىكتەرىنە ءۇش ايەلدىڭ دەنساۋلىعى جاقسى ەكەنىن ايتقان. سول ۋاقىتتا حاماس سودىرلارى كوپشىلىكتىڭ قولداۋىمەن گازا سەكتورىنىڭ وڭتۇستىگىندەگى حان ءجۇنىس قالاسىن ارالاپ ءوتىپ، يزرايل تۇرمەلەرىندە قاماۋدا جاتقان پالەستينالىق تۇتقىنداردىڭ كەلۋىن كۇتتى.

حاماس ۇيىمىنىڭ مالىمەتىنشە، يزرايل كەپىلگە الىنعانداردىڭ ورنىنا 69 ايەل مەن 21 ءجاسوسپىرىمدى بوساتقان.

اتى-ءجونىن اتاماعان حاماس-تىڭ جوعارى لاۋازىمدى شەنەۋنىگى جەكسەنبى كۇنى كەشكە فرانس پرەسس اگەنتتىگىنە:«يزرايل تۇتقىندارىن ەكىنشى رەت بوساتۋ كەلەسى سەنبى كۇنى كەشكە، اتىستى توقتاتۋ كەلىسىمى كۇشىنە ەنگەننەن كەيىنگى جەتىنشى كۇنى جۇزەگە اسىرىلادى»، - دەگەن دوحادان تەلەفون ارقىلى بەرگەن سۇحباتىندا.

ەۋروكوميسسيا توراعاسى ۋرسۋلا فون دەر لەيەن بۇل قادام «بىزگە ءۇمىت سىيلايدى» دەسە، ال اق ۇيدەن كەتكەلى تۇرعان اقش پرەزيدەنتى بايدەن گازاداعى سوعىستىڭ اۋىر سالدارىن ەسكە سالىپ اتىستى توقتاتۋدى جانە كەپىلگە الىنعانداردى بوساتۋدى ۇپتايتىنىن جەتكىزدى. بريتان پرەمەر-ءمينيسترى ستارمەر بۇل «فانتاستيكالىق جاڭالىق» دەي كەلە، اتىستى توقتاتۋدى «تولىق ورىنداۋعا» شاقىردى.

قيراندى استىنداعى رافاحقا (وڭتۇستىك) جاڭادان ورالعان 52 جاستاعى سيريا ءال-ارۋكي: «ءبىزدىڭ قالىپتى ومىرگە ورالۋىمىز ءۇشىن 20 جىلدان استام ۋاقىت قاجەت»، - دەپ قىنجىلادى.

گازاداعى اتىستى توقتاتۋ كەلىسىمى ۇزاققا سوزىلا ما، جوق پا؟!

يزرايل پرەمەر-ءمينيسترى نەتانياحۋ بۇل تەك «ۋاقىتشا اتىستى توقتاتۋ» ەكەنىن، «قاجەت بولعان جاعدايدا سوعىستى قايتا باستاۋ قۇقىعىنا يە» ەكەنىن تاعى قايتالادى.

حاماس-تىڭ اسكەري قاناتى كاسسام بريگاداسى جەكسەنبى كۇنى اتىستى توقتاتۋ كەلىسىمىنىڭ ورىندالۋى ءيزرايلدىڭ قابىلداعان مىندەتتەمەلەرىن ورىنداۋىنا جانە كەپىلگە الىنعاندار مەن تۇتقىنداردى الماسۋ كەلىسىمىنە بايلانىستى بولاتىنىن ەسكەرتتى.

Abai.kz