بۇگىن الماتىدا «قاڭتار وقيعاسى» بويىنشا ارمان جۇماگەلديەۆ باستاعان توپقا سوت ۇكىمى وقىلدى. بۇل پروتسەسس – «قاڭتار وقيعاسى» بويىنشا ەڭ ۇزاققا سوزىلعان سوت پروتسەسستەرىنىڭ ءبىرى بولىپ، ەل ىشىندە «ديكي ارمان ءىسى» دەپ اتالىپ كەتكەن.

بۇگىن الماتى قالاسىنىڭ مامانداندىرىلعان اۋدانارالىق اكىمشىلىك سوتى ەل ىشىندە «ديكي ارمان» لاقاپ اتىمەن تانىمال «قىلمىس الەمىنىڭ سەركەسى» ارمان جۇماگەلديەۆ باستاعان 44 ادامعا ۇكىم شىعاردى. ولاردىڭ اراسىندا الماتى ماسليحاتىنىڭ بۇرىنعى دەپۋتاتى قايرات قۇدايبەرگەن مەن قر ۇقك 5-ءشى دەپارتامەنتىنىڭ بۇرىنعى باستىعى رۋسلان ىسقاقوۆ بار.

بۇل ىسكە قاتىسى بار دەپ 44 ادام ايىپتالعان. ال سوت پروتسەسسى 2023 جىلدىڭ 6 قىركۇيەگىندە باستالعان. ايىپتالۋشى 44 ادامنىڭ 25-ءى تەرگەۋ يزولياتورىندا، قالعاندارى ۇيقاماقتا بولعان. سوت ايىپتالۋشىلاردىڭ بارلىعىن كىنالى دەپ تانىدى. سوتتالۋشىلاردىڭ الدى 1 جىل 3 ايدان، ارتى 20 جىلعا دەيىن باس بوستاندىعىنان ايىرۋ جازاسىن ارقالادى.

نەگىزگى ايىپتالۋشىلار: ارمان جۇماگەلديەۆ (ديكي ارمان), رۋسلان ىسقاقوۆ (قر ۇقك 5-ءشى دەپارتامەنتىنىڭ بۇرىنعى باستىعى), تالعات ماحاتوۆ (بۇرىنعى قارجى پوليتسياسىنىڭ اگەنتى), قايرات قۇدايبەرگەن (بۇرىنعى دەپۋتات).

تاعىلعان ايىپتار: كۇدىكتىلەرگە «بيلىگىن اسىرا پايدالانۋ»، ۇيىمداسقان قىلمىستىق توپ قۇرۋ جانە وعان باسشىلىق جاساۋ، قاراقشىلىق شابۋىل، زاڭسىز ادامداردى بوستاندىعىنان ايىرۋ، جاپپاي تارتىپسىزدىك ۇيىمداستىرۋ، سونداي-اق بانديتيزم بويىنشا ايىپ تاعىلدى.

ارمان جۇماگەلديەۆ:

سوت «ديكي ارمانعا» 20 جىل باس بوستاندىعىنان ايىرۋ جازاسىن كەستى. وعان بىرنەشە ايىپ قاتار تاعىلعان. سونىڭ ىشىندە جۇماگەلديەۆكە «قاڭتار وقيعاسى» كەزىندە 24 ادامدى ۇرلاپ كەتتى دەگەن ايىپ تاعىلعان.

رۋسلان ىسقاقوۆ:

الماتى قالاسىنىڭ مامانداندىرىلعان اۋدانارالىق اكىمشىلىك سوتى قر ۇقك 5-ءشى دەپارتامەنتىنىڭ بۇرىنعى باستىعى رۋسلان ىسقاقوۆقا 15 جىل 6 ايعا تۇرمە جازاسىن كەستى. سونداي-اق، ول ءومىر بويى مەملەكەتتىك قىزمەتتەن شەتتەتىلدى. سوت پروتسەسسى كەزىندە رۋسلان ىسقاقوۆ وزىنە تىكەلەي سامات ءابىش نۇسقاۋلىق جاساعانىن، بۇل ىسكە سامات ءابىشتىڭ دە قاتىسى بار ەكەنىن ايتقان.

قايرات قۇدايبەرگەن

تانىمال كاسىپكەر ءارى الماتى ماسليحاتىنىڭ بۇرىنعى دەپۋتاتى قايرات قۇدايبەرگەنگە سوت 8 جىل تۇرمە جازاسىن كەستى. ول سونداي-اق، مەملەكەتتىك قىزمەتتەن شەتتەتىلدى. قايرات قۇدايبەرگەن بۇقارالىق ءىس-شارالارعا قاتىسۋ مۇمكىندىگىنەن جانە مەملەكەتتىك ماراپاتتارىنان ايىرىلدى.

سوت ۇكىمى:

جۇماگەلديەۆ قر قك-ءنىڭ 262-بابى 1-بولىگى، 268-بابى 1-بولىگى، 272-بابى 1-بولىگى، 272-بابى 2-بولىگى، 28 بابى 3-بولىگى، 125-بابى 3-بولىگى، 1-تارماعى، 126-بابى 3-بولىگى، 1-تارماعى بويىنشا كىنالى دەپ تانىلىپ، وعان 20 جىلعا باس بوستاندىعىنان ايىرۋ جازاسى تاعايىندالدى.

ر. ىسقاقوۆ قر قك-ءنىڭ 262-بابى 3-بولىگى، 272-بابى 1-بولىگى، 362-بابى 4-بولىگى، 3-تارماعى، 28-بابى 3-بولىگى، 125-بابى 3-بولىگى، 1-تارماعى، 28-بابى 3-بولىگى، 126-بابى 3-بولىگى 1-تارماعى، 268-بابى 3-بولىگى بويىنشا كىنالى دەپ تانىلىپ، وعان 15,6 جىلعا باس بوستاندىعىنان ايىرۋ جازاسى تاعايىندالدى.

ق.قۇدايبەرگەن قر قك-ءنىڭ 272-بابى 1,2-بولىكتەرى، 126-بابى 2-بولىگى، 1 جانە 7-تارماقتارى بويىنشا كىنالى دەپ تانىلىپ، وعان 8 جىل باس بوستاندىعىنان ايىرۋ جازاسى تاعايىندالدى.

جاپپاي تارتىپسىزدىكتەردىڭ باسقا قاتىسۋشىلارىنا – جۇماگەلديەۆتىڭ قىلمىستىق توبىنىڭ مۇشەلەرىنە (بارلىعى 13 ادام) 10 جىلدان 15,5 جىلعا دەيىن باس بوستاندىعىنان ايىرۋ جازاسى تاعايىندالدى.

قىلمىستىق توپتىڭ قۇرامىنا كىرمەيتىن جاپپاي تارتىپسىزدىكتەردىڭ باسقا قاتىسۋشىلارىنا 1,5 جىلدان 7 جىلعا دەيىن باس بوستاندىعىنان ايىرۋ جازاسى تاعايىندالدى.

Abai.kz