مەملەكەت باسشىسى "اقوردا" رەزيدەنتسياسىندا ەۋرازيالىق ۇكىمەتارالىق كەڭەسكە جانە Digital Almaty 2025 تسيفرلىق فورۋمىنا قاتىسۋ ءۇشىن قازاقستانعا كەلگەن رەسەيدىڭ پرەمەر-ءمينيسترى ميحايل ميشۋستينمەن كەزدەسۋ وتكىزدى.

كەزدەسۋدە ەكى ەلدىڭ ستراتەگيالىق سەرىكتەستىگىن دامىتۋ پەرسپەكتيۆاسى تالقىلانىپ، ساۋدا-ەكونوميكالىق، ينۆەستيتسيالىق ىنتىماقتاستىقتى، سونىڭ ىشىندە ەۋرازيالىق ەكونوميكالىق وداق اياسىنداعى قارىم-قاتىناستى جانداندىرۋعا باسا نازار اۋدارىلدى.

قاسىم-جومارت توقاەۆ ەكى ەل اراسىنداعى دوستىق پەن تاتۋ كورشىلىكتى نىعايتۋعا ميحايل ءميشۋستيننىڭ قوسقان ۇلەسىن جوعارى باعالادى. سونىمەن قاتار رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ بىلتىر 27-قاراشادا استاناعا جاساعان مەملەكەتتىك ساپارى كەزىندە قول جەتكىزىلگەن ۋاعدالاستىقتاردى جۇزەگە اسىرۋدىڭ وزەكتى ەكەنىن اتاپ ءوتتى.

«– ەلدەرىمىزدىڭ اراسىنداعى بايلانىس بەكي ءتۇستى. بۇل مەملەكەتارالىق ىنتىماقتاستىقتىڭ بارلىق سالاسىن قامتيدى. ءسىزدىڭ استاناعا جاساعان ساپارىڭىزدى جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋدىڭ ماڭىزدى كەزەڭى رەتىندە قاراستىرامىز. ۆلاديمير ءپۋتيننىڭ قازاقستانعا جاساعان ساپارى بارىسىندا ۋفادا وڭىرارالىق فورۋم تابىستى ءوتتى. بيىل ءبىز كەزەكتى فورۋمدى قازاقستان اۋماعىندا، ياعني ورال قالاسىندا ۇيىمداستىرۋدى جوسپارلاپ وتىرمىز. ىنتىماقتاستىقتىڭ وسى فورماتى ناتيجەلى بولادى دەپ ويلايمىن», – دەدى پرەزيدەنت.

ءوز تاراپىندا ميحايل ميشۋستين مەملەكەتتەر باسشىلارى العا قويعان مىندەتتەردى ناقتى ىسكە اسىرۋعا دايىن ەكەنىن مالىمدەدى.

«– ورايلى ءساتتى پايدالانا وتىرىپ، رەسەي پرەزيدەنتى ۆلاديمير ءپۋتيننىڭ ىستىق ىقىلاسىن جەتكىزگىم كەلەدى. ۆلاديمير ۆلاديميروۆيچ بىلتىر قاراشا ايىندا قازاقستانعا تاريحي مەملەكەتتىك ساپار جاسادى دەۋگە بولادى. قاسىم-جومارت كەمەلۇلى، ءسىز دە جەلتوقسان ايىندا رەسەيدىڭ سانكت-پەتەربۋرگ قالاسىنا كەلدىڭىز. ءبىز ءۇشىن وڭىرارالىق فورۋمنىڭ بەرەرى مول. رەسەيدىڭ ايماقتارى قازاقستاننىڭ كوپتەگەن وبلىسىمەن تىكەلەي بايلانىس ورناتقان. ءوزىڭىز اتاپ وتكەندەي، بۇل فورماتتىڭ ماڭىزى زور، ونىڭ تيىمدىلىگىن ارتتىرۋعا بارىنشا قولداۋ كورسەتەمىز. قازاقستان – رەسەي فەدەراتسياسىنىڭ كورشىسى ءارى وداقتاسى. ءبىزدىڭ قارىم-قاتىناسىمىز دوستىق پەن ءوزارا قۇرمەتكە نەگىزدەلگەن», – دەدى رەسەي ۇكىمەتىنىڭ توراعاسى.

كەزدەسۋدە ەنەرگەتيكا، ونەركاسىپ، كولىك ينفراقۇرىلىمى، اۋىل شارۋاشىلىعى جانە باسقا دا سالالارداعى بىرلەسكەن جوبالاردى جۇزەگە اسىرۋعا باسا نازار اۋدارىلدى. سونىمەن قاتار عىلىمي-تەحنيكالىق جانە مادەني-گۋمانيتارلىق ىنتىماقتاستىقتىڭ وزەكتى ماسەلەلەرى تالقىلاندى.

مەملەكەت باسشىسى رەسەي پرەزيدەنتىنىڭ ماسكەۋدەگى جەڭىستىڭ 80 جىلدىعىنا ارنالعان مەرەكەلىك ءىس-شاراعا شاقىرۋىن قابىل العانىن ايتتى.

Abai.kz