تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىندە كونگو رەسپۋبليكاسى ءۇشىن ايىرۋ قابىلەتى جوعارى جەردى قاشىقتىقتان زوندتاۋ عارىش جۇيەسىن ازىرلەۋ جانە ىسكە اسىرۋ تۋرالى ينۆەستيتسيالىق كەلىسىمگە رەسمي تۇردە قول قويىلدى.

قۇجاتقا "قازاقستان عارىش ساپارى" ۇلتتىق كومپانياسى" اق مەن كونگو رەسپۋبليكاسىنىڭ وكىلدەرى قول قويدى.

جوبا ۇلتتىق قاۋىپسىزدىكتى قامتاماسىز ەتۋ، تابيعي رەسۋرستاردىڭ مونيتورينگى، اۋىل شارۋاشىلىعى، ەكولوگيا جانە ۋربانيستيكا سالالارىندا عارىشتىق تەحنولوگيالاردى دامىتۋعا باعىتتالعان. كەلىسىم اياسىندا جەر بەتىن جوعارى دالدىكپەن جانە جەدەل باقىلاۋعا قابىلەتتى جوعارى تەحنولوگيالىق سپۋتنيكتىك پلاتفورما قۇرۋ كوزدەلگەن.

اتالعان كەلىسىم كونگو رەسپۋبليكاسىنا جەردى قاشىقتان زوندتاۋ سپۋتنيكتەرىنىڭ حالىقارالىق توبىنا قوسىلۋعا مۇمكىندىك بەرەدى. بۇل توپقا قازىردىڭ وزىندە موڭعوليا كىرەدى. بۇل عارىشتىق تەحنولوگيالاردى ازىرلەۋ سالاسىنداعى كەڭەيتىلگەن حالىقارالىق ىنتىماقتاستىقتىڭ نەگىزىن قالايدى، دەرەكتەر مەن مونيتورينگ جانە اناليتيكا سالاسىنداعى وزىق ازىرلەمەلەرمەن الماسۋدى قامتاماسىز ەتەدى.

"سپۋتنيكتىك پلاتفورمادان بولەك، قازاقستان وقىتۋ مەن تاجىريبە الماسۋدى قامتيتىن كەشەندى شەشىم ۇسىنادى. قازاقستان تەحنولوگيالىق ازىرلەمەلەردىڭ ورتالىعى رەتىندە ءوز پوزيتسياسىن ارتتىرىپ كەلەدى. وسى ورايدا حالىقارالىق ارىپتەستەر ءبىزدىڭ شەشىمدەرىمىزگە سەنىم ارتادى. بۇل – وتاندىق عارىش يندۋسترياسىنىڭ جوعارى دەڭگەيىن راستايتىن ەكىنشى تابىستى ەكسپورتتىق جوبا", – دەپ اتاپ ءوتتى قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.

بۇعان دەيىن، 2024 جىلعى 2 قىركۇيەكتە، تاراپتار جەردى قاشىقتان زوندتاۋ سالاسىنداعى ىنتىماقتاستىق تۋرالى مەموراندۋم اياسىندا جول كارتاسىنا قول قويدى، بۇل قازىرگى كەلىسىمگە وتىرۋ جولىندا ماڭىزدى قادام بولدى.

بۇل كەلىسىم قازاقستان مەن كونگو رەسپۋبليكاسى اراسىنداعى عارىش سالاسىنداعى ستراتەگيالىق ارىپتەستىكتى نىعايتۋعا، ەكىجاقتى ءوزارا ءىس-قيمىلدى كەڭەيتۋگە جانە جاڭا تەحنولوگيالىق باستامالاردى دامىتۋعا ىقپال ەتەتىن بولادى.

Abai.kz