قازاقستاندىق ارنايى بولىنىستەردىڭ كوماندالارى ءباا-دەن ەلگە ورالدى. حالىقارالىق «UAE SWAT Challenge» جارىستارىندا مەملەكەت نامىسىن قورعاپ، ۇزدىك ناتيجە كورسەتتى.

ەليتالىق ءتۋرنيردىڭ جۇلدەگەرلەرى مەن قاتىسۋشىلارىن ەلوردا اۋەجايىندا جاقىندارى، ارىپتەستەرى، سونداي-اق كۇشتىك قۇرىلىمداردىڭ باسشىلىعى سالتاناتپەن قارسى الدى.

سۋرەت: قر ءىىم ءباسپاسوز قىزمەتىنەن الىندى.

«جاۋىنگەرلەرىمىزدىڭ جەتىستىگى - بۇل جەكە جەڭىستەرى عانا ەمەس، بۇكىل قازاقستاننىڭ جەڭىسى. بۇل ەلىمىزدىڭ كۇشتىك قۇرىلىمدارىنىڭ قاۋىپسىزدىكتى قامتاماسىز ەتۋ بويىنشا مىندەتتەرىن ءتيىمدى ورىنداۋعا ءاردايىم دايىن ەكەندىكتەرىن كورسەتەدى. سىزدەر بارشاعا ءوز كۇشتەرىڭىزدى، توزىمدىلىك پەن كاسىبيلىكتەرىڭىزدى كورسەتىپ، الەمدىك دەڭگەيدە ارنايى بولىنىستەردىڭ ەليتاسى اراسىندا ەلىمىزدىڭ پوزيتسياسىن نىعايتتىڭىزدار»، - دەدى ىشكى ىستەر ءمينيسترى ەرجان سادەنوۆ.

بەس كۇن بويى وتكىزىلگەن «ارنايى جاساق اراسىنداعى وليمپيادا» الەمنىڭ تۇكپىر-تۇكپىرىنەن 100-دەن استام كوماندانى بىرىكتىردى. قازاقستاننىڭ كۇشتىك قۇرىلىمدارىنىڭ اتىنان 12 كوماندا قاتىستى.

الەمنىڭ ۇزدىك جاۋىنگەرلەرى شىنايى وپەراتسيالار نەگىزىندە جاسالعان بەس كۇردەلى كەزەڭنەن ءوتتى. ءارتۇرلى تاكتيكالىق ستسەناريلەر بويىنشا ازىرلەنگەن سىناقتار الەمدىك ستاندارتتارعا ساي جابدىقتالعان دۋباي پوليتسياسىنىڭ وقۋ ورتالىعىنىڭ بازاسىندا جۇرگىزىلدى. بۇل تاكتيكالىق وپەراتسيالار، شابۋىلداۋ، ادامداردى قۇتقارۋ، بيىك نىسانداردى ەڭسەرۋ جانە كەدەرگىلەردەن ءوتۋ.

سۋرەت: قر ءىىم ءباسپاسوز قىزمەتىنەن الىندى.

تارتىستى تۋرنيردە قازاقستاندىق كوماندالار جەدەلدىك، ۇيىمشىلدىق، دالدىك جانە بىلىكتىلىكتەرىن كورسەتتى. ءىىم «سۇڭقار» كومانداسى ءۇش كەزەڭدە جۇلدەلى ورىنعا يە بولدى - ولاردىڭ ەكەۋى «التىن». جالپى كورسەتكىش بويىنشا «سۇڭقار» سايىپقىراندارى جارىستىڭ كۇمىس جۇلدەگەرى اتاندى.

باسقا دا كوماندالار قازاقستاندىق جانكۇيەرلەردى جوعارى ناتيجەلەرىمەن قۋانتتى. ەكىنشى كەزەڭدە مەملەكەتتىك كۇزەت قىزمەتىنىڭ «Sardar ا» كومانداسى «التىن» السا، قر ۇقك-نىڭ «Arystan Team» كومانداسى ەكى كەزەڭدە ۇزدىك ۇشتىكتەن كورىندى.

قر ءىىم-ءنىڭ «Tomiris» ايەلدەر كومانداسى ەرەكشە كوزگە ءتۇستى. قازاقستان اتىنان نازىك جاندىلاردىڭ قۇراماسى مۇنداي جارىسقا العاش رەت قاتىسۋدا. باسەكەلەستىكتىڭ جوعارىلىعىنا قاراماستان ولار ايەلدەر كوماندالارى اراسىندا 2-ءشى ورىنعا يە بولدى.

ارنايى بولىنىستەر اراسىنداعى بۇل تۋرنير بيىل التىنشى رەت وتكىزىلدى. ءار جىل سايىن قاتىسۋشىلار سانى دا ارتىپ كەلەدى. اتالمىش سايىسقا العاش رەت 2019 جىلى ءىىم ۇلتتىق ۇلانىنىڭ كومانداسى قاتىسقان. 2023 جىلدان باستاپ بۇل قاتارعا ەلىمىزدىڭ باسقا دا ارنايى بولىنىستەرى بەلسەندى تۇردە قوسىلا باستادى.

سۋرەت: قر ءىىم ءباسپاسوز قىزمەتىنەن الىندى.

وتكەن جىلى قازاقستاندىق ارنايى بولىنىستەردىڭ اراسىندا قر مەملەكەتتىك كۇزەت قىزمەتىنىڭ «Sardar» كومانداسى ەلىمىزگە تاريحي جەڭىس – جۇلدەلى ءۇشىنشى ورىندى سىيلادى. ولار تەك دۋباي پوليتسياسىنىڭ ەكى كومانداسىنا ەسە جىبەرگەن بولاتىن.

تۋرنير زاماناۋي تاسىلدەر بويىنشا تاجىريبە الماسۋعا، ارنايى جاساقتىڭ دايىندىق دەڭگەيى مەن حالىقارالىق ىنتىماقتاستىقتى ارتتىرۋعا سەپتىگىن تيگىزىپ، جالپى جاھاندىق قاۋىپسىزدىكتى نىعايتۋعا وڭ اسەر ەتەدى.

Abai.kz