قازاقستاندا «قازاقستاننىڭ ەڭبەك ەرى» دەگەن مەملەكەتتىك ناگرادا، ارداقتى اتاققا يە 5 مۇعالىم عانا بار. بۇگىن ولاردىڭ ۇشەۋى - «اۋىل» پارتياسى ۇيىمداستىرعان جاستارمەن كەزدەسۋدىڭ قۇرمەتتى قوناعى بولدى.

قر پارلامەنتى ءماجىلىسىنىڭ كىتاپحاناسىندا قازاقستاننىڭ ەڭبەك ەرلەرى: ەلمارا ترايسوۆا، الما شۋكەجانوۆا جانە الينا سولوۆەۆا قاتىسقان «بىلىكتى ۇستاز – ءبىلىمدى ۇرپاق» اتتى باسقوسۋدا مارتەبەلى قوناقتارعا زور قۇرمەت كورسەتىلدى.

باسقوسۋعا قر پارلامەنتى ءماجىلىسىنىڭ دەپۋتاتتارى، پارتيانىڭ قىزمەتكەرلەرى، ەلوردالىق جوعارى وقۋ ورىندارىنىڭ ستۋدەنتتەرى مەن ءباسپاسوز اقپارات قۇرالدارىنىڭ وكىلدەرى قاتىستى.

«ۇستازى مىقتىنىڭ، ۇستامى مىقتى» دەگەن. قوعامداعى قاي ماماندىق يەسى بولماسىن ۇستازدىڭ شاكىرتتەرى. مەكتەپ قابىرعاسىنداعى ساپالى ءبىلىم مەن سانالى تاربيە تەك تۇلعانى قالىپتاستىرىپ، تۇتاس قوعامدىق قاتىناستاردى ىزگىلەندىرەدى. سوندىقتان مۇعالىم قانداي قۇرمەتكە بولسا دا لايىق.

جيىن بارىسىندا مۇعالىم ماماندىعىنىڭ مارتەبەسى، اۋىلداعى ءبىلىم بەرۋدىڭ وزەكتى ماسەلەلەرى تالقىلاندى. ءماجىلىس دەپۋتاتى، «اۋىل» پارتياسىنىڭ توراعاسى، قر پارلامەنتى ءماجىلىسى اگرارلىق ماسەلەلەر كوميتەتىنىڭ توراعاسى سەرىك ەگىزباەۆ ءوز سوزىندە: «قازاقتىڭ سىرشىل اقىنى ماعجان جۇماباەۆ «التى الاشتىڭ بالاسى باس قوسقاندا، ءتور - مۇعالىمدىكى» دەگەن ەكەن. سىزدەر اتى اڭىزعا اينالعان جانسىزدار. ماعجان ايتقان ءتور قاشاندا سىزدەردىكى»، - دەپ ۇزدىك ۇستازدارعا سىي-قۇرمەت كورسەتتى.

ورال قالاسىنداعى №34 مەكتەپ-گيمنازياسىنىڭ ورىس ءتىلى مەن ادەبيەتى ءپانىنىڭ مۇعالىمى ەلمارا ترايسوۆا: «سىزدەر ءبىزدىڭ بولاشاعىمىز بولساڭىزدار، سىزدەردىڭ بولاشاقتارىڭىز – سىزدەردىڭ وقۋشىلارىڭىز! ەندەشە، ەلىمىزدىڭ وركەندەۋى ءۇشىن بالالار ەڭ الدىمەن مەملەكەتتىك ءتىلدى ءبىلىپ، قۇرمەتتەۋلەرى كەرەك. ارينە، شەت تىلدەرىن ءبىلۋ ماڭىزدى جانە قاجەت، بىراق ءبىز ەڭ باستىسى – تۋعان جەرىمىزدىڭ انا ءتىلىن ۇمىتپاۋىمىز كەرەك»، - دەدى.

سەمەي قالاسىنىڭ №7 جالپى ءبىلىم بەرەتىن مەكتەپ-ليتسەيىنىڭ ماتەماتيكا ءپانىنىڭ مۇعالىمى الما شۇكىجانوۆا ءوز سوزىندە: «ءبىز، ۇستازدار، ەڭ الدىمەن وقۋشىنى ەمەس، بىزگە سەنىم ارتقان تۇلعانى تاربيەلەيمىز. جانە بۇل سەنىمدى اقتاۋ ماڭىزدى. بۇل بالا سوندا ءوسىپ، ۇستازىنان اسىپ تۇسەدى – بۇل مەنىڭ جەتىستىگىم».

شىمكەنت قالاسىنداعى №1 مەكتەپ-گيمنازياسىنىڭ بيولوگيا ءپانىنىڭ مۇعالىمى الينا سولوۆەۆا «كىتاپتاردان قول ۇزبەڭىز، ارقاشان قاسىڭىزدا مۇقيات ساقتاڭىز جانە كەز كەلگەن تۇسىنىكسىز جاعدايدا قايتا وقىپ شىعىڭىز. ولار سىزگە ومىردە جاقسى جول كورسەتۋشى بولادى»، - دەپ كەڭەس بەردى.

باسقوسۋ سوڭىندا ەلدىڭ ۇزدىك ۇستازدارى پەداگوگ ماماندىقتار ستۋدەنتتەرىمەن ءوز تاجىريبەلەرىمەن ءبولىسىپ، ولاردىڭ سۇراقتارىنا جاۋاپ بەردى.

جيىن بارىسىندا ەلمارا ترايسوۆا «اۋىل» پارتياسىنىڭ  قاتارىنا قابىلدانىپ، وعان سالتاناتتى تۇردە پارتيالىق بيلەت تابىستالدى. سونداي-اق، ۇلاعاتتى ۇستازدارعا قۇرمەت كورسەتىلىپ، يىقتارىنا شاپان جابىلدى.

 Abai.kz