قازاقستانعا رەسمي ساپارمەن كەلگەن تاجىكستان رەسپۋبليكاسىنىڭ سىرتقى ىستەر ءمينيسترى سيرودجيددين مۋحريددين ەكى ەل اراسىندا بيىل قانداي بىرلەسكەن جوبالار جۇزەگە اسىرىلاتىنىن جەتكىزدى.

«ءوتكەن جىلى جوعارى دەڭگەيدەگى كەلىسسوزدەردىڭ بۇگىن ناقتى ناتيجەلەرى بار. ءبىرىنشى، قازاقستان تەرريتورياسىندا كۇنباعىس ءدانىن وڭدەپ، كۇنباعىس مايىن شىعاراتىن كاسىپورىن سالۋ ماسەلەسى قاراستىرىلىپ جاتىر. بۇل ءونىم كەيىن تاجىكستانعا ەكسپورتتالاتىن بولادى. ەكىنشى، قازاقستاننىڭ Freedom Bank-ءىنىڭ تاجىكستاندا ەنشىلەس ۇيىمىنىڭ اشىلۋى. ءۇشىنشى، استانا، پاۆلودار، شىمكەنت، كوكشەتاۋ، قوستاناي قالالارىندا تاجىك ونىمدەرىنىڭ ءىرى كورمەلەرىن وتكىزۋ. ءتورتىنشى، تاجىكستان تەرريتورياسىندا جەمىس-كوكونىس ونىمدەرىن ەكسپورتقا ازىرلەيتىن بىرلەسكەن ءىرى لوگيستيكالىق ورتالىقتىڭ سالىنۋى. بەسىنشى، تسيفرلىق سالادا ارىپتەستىك ورناتىلدى. اتاپ ايتقاندا قازاقستان ۇسىنعان تسيفرلىق جۇيەنى تاجىكستاننىڭ مەملەكەتتىك ورگاندارىنىڭ ۆەب-رەسۋرستارىنا ەنگىزۋ جۇرگىزىلىپ جاتىر», - دەدى ول.

سونداي-اق، سيرودجيددين مۋحريددين پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋمەن كەزدەسۋىندە ەكونوميكالىق ارىپتەستىك جونىندەگى ۇكىمەتارالىق كوميسسيا جۇمىسىن تالقىلاعانىن ايتتى.

"ينۆەستيتسيالىق ارىپتەستىك ماسەلەسىنە اسا ءمان بەرىلدى. سونىڭ ىشىندە تاجىكستاندا ءارتۇرلى سالادا قىزمەت ەتىپ جاتقان 100-گە جۋىق قازاقستاندىق كومپانياعا قولعابىس جاساۋ ماسەلەسى تالقىلاندى. ەكى ەلدىڭ ەنەرگەتيكالىق ارىپتەستىگىنىڭ بولاشاعى زور ەكەنىن اتاپ وتتىك. جۋىق ارادا ەكى ەل ۇكىمەتتەرىنىڭ اراسىندا ەلەكتر ەنەرگياسى جونىندەگى كەلىسىمگە قول قويىلاتىنى جايلى كەلىستىك. بۇل قۇجات "روگۋن" گەس-ءى وندىرەتىن ەلەكتر ەنەرگياسىن قازاقستانعا جەتكىزۋ ماسەلەسىن رەتتەيدى", - دەدى ول.

بىلتىر ەكى ەل اراسىنداعى ساۋدا-ساتتىق كولەمى 7 پايىز ارتىپ، 1,2 ملرد دوللارعا جەتتى.

Abai.kz