مولدوۆا بيلىگى رەسەيدىڭ عىلىم جانە مادەنيەت ورتالىعىن (ورىس ءۇيى) جابۋ تۋرالى شەشىم قابىلداعانىن جاريالادى, دەپ حابارلايدى “ادىرنا” ۇلتتىق پورتالى.

13 اقپاندا كيشينەۆتەگى سىرتقى ىستەر مينيسترلىگى 1998 جىلى جاسالعان مولدوۆا-رەسەي اراسىنداعى مادەني ورتالىقتار قۇرۋ جانە جۇمىس ىستەۋ تۋرالى ۇكىمەتارالىق كەلىسىمدى بىرجاقتى بۇزۋ تۋرالى مالىمدەدى. بۇعان رەسەيدىڭ سوققى بەرەتىن دروندارىنىڭ ەلدىڭ اۋە كەڭىستىگىن بۇزۋى سەبەپ بولعان. كەلىسىمدى بۇزۋ ءراسىمى اياقتالعاننان كەيىن رەسەي مادەنيەت ورتالىعى مولدوۆا اۋماعىندا جۇمىسىن توقتاتۋى ءتيىس دەپ مالىمدەدى سىرتقى ىستەر مينيسترلىگى.

كەيىن مولدوۆا سىرتقى ىستەر مينيسترلىگى رەسەي ەلشىسى ولەگ وزەروۆتى شۇعىل شاقىرتقان. "كەزدەسۋدە مولدوۆا تاراپى ورەسكەل جايتقا بايلانىستى نارازىلىق ءبىلدىرىپ، مۇنداي وقيعالار ەل قاۋىپسىزدىگىنە جانە مولدوۆا ازاماتتارىنا قاۋىپ توندىرەتىنىن ايتتى. رەسەي ديپلوماتىنا مۇنداي ارەكەتتەر ەل ەگەمەندىگىن بۇزۋدى بىلدىرەدى جانە رەسەي تاراپىنان دوستىققا جاتپايتىن كەزەكتى يشارا دەپ سانالاتىنى ايتىلدى", – دەپ جازىلعان ءسىم حابارلاماسىندا.

مينيسترلىك ەلشىگە درون قالدىقتارىن كورسەتكەنىن مالىمدەدى.

مولدوۆا اۋماعىنا قۇلاعان رەسەيلىك درونداردىڭ بولىكتەرى رەسەي ەلشىسىنە دالەل رەتىندە كورسەتىلدى. كيشينەۆتە رەسەي بيلىگىنەن بۇل شابۋىلداردى دەرەۋ توقتاتۋدى جانە مولدوۆا رەسپۋبليكاسىنىڭ ەگەمەندىگى مەن تاۋەلسىزدىگىنە، اۋماقتىق تۇتاستىعىنا قاتال قۇرمەتپەن قاراۋدى تاعى دا سۇرادى.

سول كۇنى مولدوۆا پرەزيدەنتى مايا ساندۋ رەسەيدىڭ «گەران» بپلا دروندارىنىڭ قالدىعىن جاريالادى. بۇل رەسەيدىڭ يراننىڭ Shahed دروندارىنىڭ انالوگتارى دەپ اتالادى.

«Shahed دروندارى ءبىزدىڭ اۋە كەڭىستىگىمىزدى بۇزدى. ەكەۋى ءبىزدىڭ جەرىمىزدە جارىلىپ، مولدوۆان حالقىنىڭ ومىرىنە قاۋىپ ءتوندىردى»، - دەپ مالىمدەدى ساندۋ.

رەسەيلىك دروندار مولدوۆا شەكاراسىنداعى ۋكرايناداعى ودەسسا وبلىسىن اتقىلاعان بولاتىن. ولاردىڭ ەكەۋى مولدوۆا اۋماعىنا كىرىپ، وندا جارىلدى.

ايتا كەتسەك، “ورىس ۇيلەرى” الەمنىڭ كوپتەگەن ەلدەرىندە، سونىڭ ىشىندە ەۋروپانىڭ كوپ بولىگىندە بار. بۇل ۇيىمدار “روسسوترۋدنيچەستۆو”مۇددەسىن قورعايدى جانە رەسمي مالىمەتتەر بويىنشا، «شەتەلدە تۇراتىن رەسەيلىكتەرگە ءارتۇرلى ءىس-شارالار مەن قىزمەتتەر ۇسىنۋمەن اينالىسادى، سونداي-اق رەسەي مادەنيەتىن، عىلىمىن جانە ءبىلىمىن ناسيحاتتاۋعا جاۋاپتى».

اقپاننىڭ باسىندا ازەربايجان بيلىگى ماسكەۋگە رەسەيدىڭ "روسسوترۋدنيچەستۆو" اگەنتتىگى قىزمەتىن ەل اۋماعىندا توقتاتاتىنى جايلى رەسمي نوتا جىبەرگەن. ازەربايجان ءسىم "باكۋدەگى "ورىس ءۇيى" زاڭدى تۇلعا رەتىندە تىركەلمەگەن" دەدى.

باكۋ مەن ماسكەۋدىڭ قارىم-قاتىناسى 2024 جىلى جەلتوقساندا قازاقستاننىڭ اقتاۋ قالاسى ماڭىنا Azerbaijan Airlines اۋەكومپانياسىنىڭ جولاۋشى ۇشاعى قۇلاعاننان كەيىن ناشارلادى. ازەربايجان ۇشاقتى بايقاۋسىزدا رەسەيدىڭ اۋە قورعانىس جۇيەسى اتتى دەپ، اپاتقا ماسكەۋدى ايىپتاي سويلەدى.

Abai.kz