رەسەيدىڭ ۋكرايناعا باسۋ كىرۋى - وتكەن جىلعى امەريكاداعى پرەزيدەنت سايلاۋىندا ترامپ ءۇشىن دەموكرات ۇمىتكەرلەردى تۇقىرتۋداعى باستى تاقىرىپقا اينالىپ ەدى. ترەكەڭ سايلاۋشىلاردىڭ الدىندا: "كەزىندە مەن پۋتينگە: "سەن كيەۆتى بومبالاساڭ، مەن ماسكەۋدى بومبالايمىن", - دەگەم. سوعىس بايدەننىڭ السىزدىگىنەن بولدى. مەن پرەزيدەنت بولسام سوعىستى 24 ساعاتتا توقتاتامىن", - دەپ ۋادەنى ءۇيىپ-توكتى.

ەندى ول سىن ساداعىن وتكەن ايدا اق ۇيدەن كەتكەن بايدەندى قويىپ، دەموكرات باراك وباما مەن ءوزىنىڭ پارتيالاسى، رەسپۋبليكاشىل كىشى بۋشقا قاراتۋدا. كىشى بۋشتىڭ بيلىگى كەزىندە پۋتين گرۋزياعا اسكەر كىرگىزسە، وبامانىڭ كەزىندە قىرىمدى ۋكراينادان تارتىپ العان ەدى.

تومەندە پۋتين بيلىك قۇرعان 25 جىلدا اق ءۇي باسشىلارىمەن قانداي قارىم-قاتىناستا بولعانىن ءبىر شولىپ وتەيىك.

1999 جىلدىڭ اياعىندا ەلتسيننىڭ مۇراگەرلىككە ءپۋتيندى تاڭداپ، 2000 جىلدىڭ ناۋرىزىندا رەسمي پرەزيدەنت بولىپ سايلانعانى بەلگىلى. ەلتسينمەن كوپ ىستەس بولعان بيلل كلينتون ەستەلىگىندە پۋتينمەن العاشقى كەزدەسۋدەن كەيىن: "ەلتسين مۇراگەردى دۇرىس تاڭداپتى", دەگەن ويعا كەلگەنىن، بىراق ونىڭ شەشەندەر مەن تاۋەلسىز باسىلىمداردى باسىپ-جانشىعانىن كورگەننەن كەيىن ودان ءىش تارتا باستاعانىن جازادى.

"پۋتين ناتو-عا كىرۋگە ىڭعاي تانىتقانىمەن، پرەزيدەنتتىكتەن كەتىپ بارا جاتقان ماعان اسا ىقىلاس بىلدىرە قويعان جوق", - دەيدى.

امەريكادا "11 قىركۇيەك وقيعاسى" بولعان كەزدە پۋتين ەڭ العاشقى بولىپ كىشى بۋشقا تەلەفون سوققان. اقش اۋعانستانعا اسكەر كىرگىزگەندە پۋتين ءوز اۋە كەڭىستىگىمەن ورتا ازيانى اشىپ بەرگەن. دەسە دە بۇل ارىپتەستىك ۇزاققا بارماعان.

2002 جىلى قاراشادا بالتىق ەلدەرى باستاعان 7 مەملەكەت ناتو-عا مۇشەلىككە ءوتىنىش بەرەدى. ولار 2004 جىلى بۋشتىڭ قولداۋىمەن سولتۇستىك اتلانت اسكەري ۇيىمىنا رەسمي مۇشە بولىپ قابىلدانادى.

2003 جىلى بۋش بۇۇ قاۋىپسىزدىك كەڭەسىنىڭ ماقۇلداۋىنسىز يراققا سوعىس اشادى. انگليادان باسقا، رەسەي، فرانتسيا، قىتاي قارسى بولادى.

2003 جىلدىڭ اياعىندا گرۋزيادا، 2004 جىلدىڭ كوكتەمىندە ۋكراينادا ءتۇرلى-ءتۇستى ساياسي توڭكەرىس بولىپ، جاڭا دەموكرات باسشىلار بيلىككە كەلەدى. پۋتين: "بۇلاردىڭ ارتىندا امەريكا بيلىگى تۇر", - دەپ نارازىلىق بىلدىرەدى.

بۋشتىڭ شىعىس ەۋروپاعا يادرولىق قارۋدان قورعانىس جۇيەسىن ورنالاستىرۋ شەشىمى ءپۋتيننىڭ قاتاڭ نارازىلىعىن تۋدىرادى.

كىشى بۋش 2008 جىلى پۋتينمەن بىرگە قىتايدا وليمپيادا ويىندارىنىڭ اشىلۋ سالتاناتىن تاماشالاپ وتىرعاندا، ورىس اسكەرىنىڭ گرۋزياعا باسىپ كىرگەنىن ەستيدى.

ال باراك وباما كەزىندە پۋتين ۋكراينادان قىرىمدى تارتىپ الدى. ءپۋتيننىڭ وكتەمدىگىنە كىشى بۋش پەن باراق وباما ەكونوميكالىق جازا قولدانۋدان ارى اسپادى. كەيىن اق ۇيگە كەلگەن بايدەن وبامانىڭ قىرىم داعدارىسى جونىندەگى ارنايى وكىلى بولعان ەدى. ونىڭ ۋكرايناعا كومەگى دە زەلەنسكيگە جەڭىس اكەلە المادى.

بۋش ۇكىمەتىنىڭ رەسەيگە قاتىستى اقپارات جيناۋ اگەنتىن باسقارعان، "پۋتين: كرەملدىڭ شپيونى" كىتابىنىڭ اۆتورى فيونا حيلل ءپۋتيندى "وتكەندە، ءوز قيالىنداعى رەسەيدە ءومىر سۇرەتىن ادام" دەپ سيپاتتاعان ەدى.

ترامپتىڭ الدىنداعى پرزيدەنتتەردىڭ ءپۋتيننىڭ تۇپكى نيەتىن دۇرىس باعامداي الماعانى كورىنىپ تۇر. وزگەنى سىناعىش ترامپتىڭ اۋسەلەسى دە كوپ وتپەي بەلگىلى بولادى.

ەسبول ۇسەنۇلى

Abai.kz