17 اقپاندا «قازاقمىس» كورپوراتسياسىنا تيەسىلى «جومارت» كەنىشىندەگى شاحتادا تاۋ جىنىسىنىڭ وپىرىلۋى ورىن الدى. وقيعا سالدارىنان شاحتادا 7 جۇمىسشى ءۇيىندى استىندا قالدى.  «قازاقمىس» ءباسپاسوز قىزمەتىنىڭ الدىن الا مالىمەتىنشە، «جومارت» كەنىشىندەگى اپاتقا تابيعي گاز جارىلىسى سەبەپ بولعان.

ىلە‑شالا توتەنشە جاعدايلار مينيسترلىگى قۇتقارۋ قىزمەتتەرى التى جۇمىسشىنىڭ دەنەسىن تاپقانىن، جەتىنشى جۇمىسشىنى ىزدەستىرۋ جۇمىستارى جۇرگىزىلىپ جاتقانىن حابارلادى. كەيىن ۆەدومستۆو جەتىنشى جۇمىسشىنىڭ دەنەسى تابىلعانىن ناقتىلادى. بارلىق قازا بولعانداردىڭ دەنەسى جەر بەتىنە شىعارىلىپ، سوت-مەديتسينالىق ساراپتاما جۇرگىزۋ ءۇشىن پوليتسيا قىزمەتكەرلەرىنە تاپسىرىلدى.

پرەزيدەنت قاسىم-جومارت توقاەۆ ۇلىتاۋ وبلىسىندا شاحتەرلەردىڭ قازا بولۋىنا بايلانىستى كوڭىل ايتتى جانە ۇكىمەتكە تاپسىرما بەردى. مەملەكەت باسشىسى «قازاقمىس» كورپوراتسياسىنىڭ ۇلىتاۋ وبلىسىنداعى كەنىشىندە تاۋ جىنىسىنىڭ وپىرىلۋى سالدارىنان قازا تاپقان جۇمىسشىلاردىڭ تۋىستارى مەن جاقىندارىنا كوڭىل ايتۋ جەدەلحاتىن جولدادى.

توقاەۆ ۇكىمەتكە توتەنشە جاعدايدىڭ سەبەپتەرىن مۇقيات تەكسەرۋدى تاپسىردى. سالالىق ۆەدومستۆولار مەن ءوڭىر اكىمدىگىنە قازا تاپقانداردىڭ وتباسىلارىنا قاجەتتى بارلىق كومەكتى كورسەتۋ جۇكتەلدى.

ال، قازاقستان پرەمەر-ءمينيسترى ولجاس بەكتەنوۆتىڭ تاپسىرماسىمەن شاحتاداعى اپاتتىڭ سەبەپتەرىن تەكسەرىپ، زارداپ شەككەندەرگە كومەك كورسەتۋ ءۇشىن ارنايى كوميسسيا قۇرىلدى. كوميسسيانى پرەمەر-ءمينيستردىڭ ورىنباسارى قانات بوزىمباەۆ باسقاردى.

ءوز كەزەگىندە، ۇلىتاۋ وبلىسىنداعى شاحتادا بولعان توتەنشە جاعدايعا بايلانىستى پوليتسيا قىلمىستىق ءىس قوزعادى.

«قازاقمىس» كورپوراتسياسى ءۇشىن بۇل اۋىر قايعى. كورپوراتسيا «جومارت» كەنىشىندە قازا تاپقان جۇمىسشىلاردىڭ وتباسىلارىنا ۇجىمدىق كەلىسىمشارت اياسىندا قاجەتتى كومەكتى كورسەتەتىنىن مالىمدەدى. قازا تاپقانداردىڭ وتباسىلارىنا مورالدىق وتەماقىنى قوسا العاندا، جىلدىق ورتاشا ەڭبەكاقىنىڭ 10 ەسە مولشەرىندە تولەم جاسالادى. سونىمەن قاتار جەرلەۋ ءراسىمىن ۇيىمداستىرۋ ءۇشىن 2 ميلليون تەڭگەدەن استام قارجى بەرىلەدى. بۇدان بولەك، اسىراۋشىسىنان ايىرىلعان وتباسىلارعا اي سايىنعى جاردەماقى، بالالاردىڭ وقۋ اقىسىن تولەۋ، مارقۇمداردىڭ نەسيەلەرى مەن قارىزدارىن جابۋ جانە باسقا دا الەۋمەتتىك كومەكتەر قاراستىرىلعان»، - دەپ مالىمدەدى «قازاقمىس».

ۇلىتاۋ وبلىسى اكىمدىگى دە قازا تاپقانداردىڭ وتباسىلارى مەن جاقىندارىنا قاجەتتى پسيحولوگيالىق جانە الەۋمەتتىك قولداۋ كورسەتەتىنىن حابارلادى.

ۇلىتاۋ شاحتاسىنداعى تراگەديا: وسى ۋاقىتتاعى مالىمەتتەر

شاحتاداعى اپات كەزىندە بولعان بارلىق شاحتەرلەر قازا تاپتى. جەتى جۇمىسشىنىڭ دەنەسى تابىلدى. قايتىس بولعانداردىڭ جەكە باسى انىقتالۋدا.

پرەمەر-مينيستر ولجاس بەكتەنوۆتىڭ تاپسىرماسى بويىنشا جاڭاارقا اۋدانىنداعى شاحتاداعى اپاتتىڭ سەبەپتەرىن زەرتتەۋ جانە زارداپ شەككەندەرگە كومەك كورسەتۋ ءۇشىن ارنايى كوميسسيا قۇرىلدى.

وسى وقيعاعا بايلانىستى قىلمىستىق كودەكستىڭ 277-بابى، 3-بولىگى بويىنشا «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» فاكتىسى بويىنشا قىلمىستىق ءىس قوزعالدى.

وقيعا ورنىندا ۇلىتاۋ وبلىستىق پوليتسيا دەپارتامەنتىنىڭ جەدەل-تەرگەۋ توپتارى جۇمىس ىستەۋدە. تەرگەۋ شارالارى جۇرگىزىلۋدە.

رەداكتسيادان: Abai.kz رەداكتسياسى اتىنان ۇلىتاۋداعى شاحتاداعى اپاتتا قازا تاپقان كەنشىلەردىڭ وتباسىلارىنا جانە تۋىستارىنا قايعىرىپ كوڭىل ايتامىز. قازانىڭ ارتى قايىرلى بولسىن، اعايىنعا سابىر بەرسىن دەيمىز.

Abai.kz