كيم بولساڭ دا ادام ولمەسىن. وسى اپتادا قازاقمىس قوجايىنى قاتاڭ اڭگىمەگە شاقىرىلماق

سول جاعالاۋ «قازاقمىس» كورپوراتسياسىنا تيەسىلى «جومارت» شاحتاسىندا 7 ادامنىڭ قازا تاپقانىن وتە اۋىر قابىلدادى. سەبەبى، بۇل ەلىمىزگە ۇلكەن تراگەديا الىپ كەلگەن لاكشمي ميتتالدى قايتادان ەسكە ءتۇسىرىپ وتىر. قازاقمىستىڭ نەگىزگى اكتسيونەرى، 70 پايىز ۇلەسىن يەلەنىپ وتىرعان وليگارح ۆلاديمير كيممەن وتە جوعارى دەڭگەيدە كەزدەسۋ وتكىزۋ جوسپارلانعان. وليگارح شاحتالارداعى قاۋىپسىزدىكتى كۇشەيتۋگە قوماقتى ينۆەستيتسيا سالماسا، ونىڭ قازاقستاندا جۇمىس ىستەۋىنە قاتىستى سۇراقتار قويىلاتىن بولادى.

«ۆيتسە-پرەمەر قانات بوزىمباەۆقا بارلىق كارت-بلانش بەرىلدى. ول قازاقستان ۇكىمەتىنىڭ اتىنان سويلەيتىن بولادى. قازاقمىس اكتسيونەرلەرى ۆلاديمير كيم مەن ەدۋارد وگايدىڭ اپاتتى تەرگەۋ كەزىندە الىس شەتەلدە ەمەس، جاقىن ماڭدا ءجۇرۋى تالاپ ەتىلدى. ۇكىمەت شاحتا باسشىسى سياقتى ورتا دەڭگەيلى مەنەدجەرلەرمەن ەمەس، اتالعان ەكى اكتسيونەر مەن كورپوراتسيانىڭ باسقارما توراعاسى نۇراحمەت نۇريەۆ دەڭگەيىندە سويلەسەتىن بولادى»، - دەيدى DALA INSIDE دەرەككوزى.

دەرەككوز ۆلاديمير كيمگە زاماننىڭ وزگەرگەنىن، بۇرىنعىداي ماسەلەنى اقشا جانە تانىستىقپەن جاۋىپ جۇرە المايتىنىن قاتاڭ ۇعىندىرىپ قويۋ بويىنشا شەشىم قابىلدانعانىن ايتادى. بۇل، جەتى ادامنىڭ قازاسى بويىنشا اشىلعان قىلمىستىق ىستە قاتارداعى مەنەدجەرلەر ەمەس، قازاقمىس باسشىلىعى فيگۋرانت بولادى دەگەندى بىلدىرەدى.

سوڭعى 4 جىلدا قازاقمىس شاحتالارىندا 13 ادام ءولدى. 122 ادام ءتۇرلى جاراقات الدى. نەگىزگى اپاتتاردىڭ بارلىعى ۇلىتاۋ وبلىسىنداعى كونە شاحتالاردا ورىن الۋدا. ونداعى قاۋىپسىزدىك دەڭگەيىنىڭ تومەندىگى، قۇرال-جابدىقتارعا ينۆەستيتسيا بولىنبەگەندىگى ايقىن بايقالدى. بۇل تۋرا بۇرىنعى «ارسەلورميتتال تەمىرتاۋ» كەيسىنە ۇقسايدى.

مۇنداي ماسەلەنى شەشۋدە قازاقستان ءبىرشاما تاجىريبە جيناپ الدى. ميتتال كەتىپ، ونىڭ ورنىنا قايتا جاڭارعان «Qarmet» شاحتالارىندا اپاتتىڭ الدىن-الۋ ءۇشىن جاڭا تەحنولوگيالار قولدانىلىپ جاتىر. دەگازداندىرۋ قۇرىلعىلارى تالاي ادام ءومىرىن ساقتادى. كەزىندە لاكشمي ميتتال مۇنداي زاتتارعا مۇلدە اقشا بولمەيتىن ەدى.

«ەندى ادامدار ولەتىن بولسا، وندا ۆلاديمير كيم لاكشمي ميتتال سياقتى ەلدەن كەتۋى مۇمكىن. «ادىلەتتى قازاقستان» بۇدان بىلاي ءوز ازاماتتارىنىڭ ولىمىنە مۇلدە كەلىسپەيدى. كىم بولسا دا، قانشا سالىق تولەسە دە، ەڭ باستىسى ەل ازاماتتارى امان ءجۇرۋى ءتيىس. وسى اپتادا وكىلەتتى تۇلعا كيمگە اتالعان پوزيتسيانى جاقسىلاپ تۇسىندىرەتىن بولادى»، - دەيدى، دەرەككوز.

قازاقمىس شاحتالارى مەن ءوندىرىسى «قازاقمىس كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ يەلىگىندە. 2023 جىلدىڭ قورىتىندىسى بويىنشا كورپوراتسيا 110 ميلليارد تەڭگە تازا كىرىس الىپ كەلدى. بىلتىرعى جىلدىڭ الدىن-الا ەسەبى بويىنشا وسى جىلى اكتسيونەرلەرى كەمىندە 100 ميلليارد تەڭگەگە قول جەتكىزە الادى.

قالاي بولعاندا دا، قازاقمىسقا 80 ميلليون دوللارعا بيزنەس-دجەت العانشا، شاحتالارداعى قاراپايىم ەڭبەككەرلەردىڭ قاۋىپسىزدىگىنە كوڭىل ءبولۋى كەرەك. مۇنداي اپات تاعى قايتالانسا، كورپوراتسيا ءۇشىن ءبارى ءبىر دەمدە وزگەرىپ كەتۋى مۇمكىن.

DALA INSIDE

Abai.kz