بۇگىن ءماجىلىستىڭ جالپى وتىرىسىندا «ويىن بيزنەسى تۋرالى» زاڭ قابىلدانعاننان كەيىن دەپۋتات نارتاي سارسەنعاليەۆ جۋرناليستەرگە زاڭعا قاتىستى تۇسىنىكتەمە بەردى. دەپۋتاتتىڭ ايتۋىنشا، قازىردىڭ وزىندە ناقتىلاۋ مەن جەتىلدىرۋدى قاجەت ەتەتىن نورمالار بار. بۇل ماسەلە دەپۋتات باسقاراتىن AMANAT پارتياسى جانىنداعى جاستار كەڭەسىندە دە كەڭىنەن تالقىلانعان.

دەپۋتاتتار ۇسىنعان جاڭا نورمالارعا سايكەس، سپورت نىساندارىندا بۋكمەكەرلىك كەڭسەلەردىڭ، توتاليزاتورلاردىڭ جانە كەز كەلگەن قۇمار ويىندارىنىڭ جارناماسىنا تىيىم سالىنادى. بۇل شەكتەۋ عيماراتتىڭ ىشىندە دە، سىرتىندا دا قولدانىلادى.

«بۇرىن سپورت نىساندارىندا وسىنداي جارنامالار ءجيى كەزدەسەتىن. ەندى ولار تەك سپورتتىق ءىس-شارالار كەزىندە عانا رۇقسات ەتىلەدى. قالعان ۋاقىتتا مۇنداي جارناما بولماۋى كەرەك، ويتكەنى بۇل نىسانداردا بالالار مەن جاستارعا ارنالعان ءتۇرلى ۇيىرمەلەر مەن سەكتسيالار بار. ولار مۇنداي جارنامانى كورمەۋى ءتيىس»، – دەپ اتاپ ءوتتى دەپۋتات.

وتكەن جىلى دەپۋتاتتار قابىلداعان تاعى ءبىر نورما – بۋكمەكەرلىك كەڭسەلەر مەن توتاليزاتورلاردىڭ SMS-حابارلامالار ارقىلى جارنامالانۋىنا تىيىم سالۋ. الايدا سارسەنعاليەۆتىڭ ايتۋىنشا، ويىن بيزنەسىنىڭ وكىلدەرى جاڭا تاسىلدەردى پايدالانىپ، جاساندى ينتەللەكت كومەگىمەن ادامدارعا قوڭىراۋ شالۋدا.

«بۇل تۋرالى مەن جەلتوقسان ايىنىڭ سوڭىندا دەپۋتاتتىق ساۋالىمدا ايتتىم. ناتيجەسىندە، ءبىز ويىن بيزنەسىنىڭ جارناماسىن بارلىق بايلانىس ارنالارى ارقىلى تاراتۋعا تىيىم سالاتىن نورمانى ەنگىزدىك. ەندى ولار ادامداردى قوڭىراۋلارمەن دە، WhatsApp نەمەسە Telegram حابارلامالارى ارقىلى دا مازالاي المايدى»، – دەپ ءتۇسىندىردى نارتاي سارسەنعاليەۆ.

سونداي-اق بۇل تۇزەتۋلەر اكىمشىلىك كودەكسكە ەنگىزىلەتىنىن ايتتى.

ويىن بيزنەسى تۋرالى زاڭ قۇمار ويىن ويناۋعا تىيىم سالىنعان ازاماتتاردىڭ ساناتتارىن انىقتايدى. ولاردىڭ قاتارىنا تۇزەتۋ مەكەمەلەرىندە جازاسىن وتەپ جاتقان سوتتالعاندار، ايىپپۇل مەن اليمەنت تولەمەگەن بورىشكەرلەر كىرەدى. ەندى دەپۋتاتتاردىڭ باستاماسىمەن بۇل تىزىمگە باس بوستاندىعىنان ايىرماي جازالانعان ازاماتتار دا ەنگىزىلدى. وسىعان بايلانىستى ماجىلىسمەندەر پروكۋراتۋرا، ءىىم جانە باسقا دا قۇرىلىمداردىڭ دەرەكقورلارىن بىرىكتىرۋ قاجەتتىلىگى تۋرالى ماسەلەنى بىرنەشە رەت كوتەرگەن.

«ازامات ءباس تىكپەس بۇرىن جەكە كۋالىگىن كورسەتۋى كەرەك. جۇيە ونىڭ بورىشكەرلەر بازاسىندا بار-جوعىن كورۋى ءتيىس. ال اسكەري قىزمەتشىلەر مەن مەملەكەتتىك قىزمەتكەرلەرگە كەلسەك، بۇل نورما وتكەن جىلى ەنگىزىلگەن»، – دەپ قوستى دەپۋتات.

نارتاي سارسەنعاليەۆ وتكەن جىلدان باستاپ ويىن بيزنەسىنىڭ جارناماسىنا قوعامدىق كولىكتەردە، باننەرلەردە، بيلبوردتاردا جانە عيماراتتاردىڭ قاسبەتتەرىندە تولىق تىيىم سالىنعانىن ەسكە سالدى.

«تاعى ءبىر ماڭىزدى ماسەلە – بۋكمەكەرلىك كەڭسەلەردىڭ جارناماسىن تەك سپورتتىق باعىتتاعى باق ورنالاستىرا الادى. بىراق كەيبىر سايتتار مەن ونلاين پلاتفورمالار وسى نورمانى اينالىپ ءوتۋدىڭ امالىن تاۋىپ، ءوزىن الەۋمەتتىك-ەكونوميكالىق باعىتتاعى رەسۋرس رەتىندە كورسەتۋدە. وسىلايشا، ۋاكىلەتتى ورگاندار ولارعا شارا قولدانا الماي وتىر. سوندىقتان ارىپتەسىم، دەپۋتات ەلنۇر بەيسەنباەۆپەن بىرگە بۇل نورمانى ناقتىلاۋدى ۇسىندىق: توتاليزاتورلاردىڭ جارناماسىن تەك سپورتتىق سايتتار بەرە الادى. ايتپەسە، ولار مەملەكەتتىك تىركەۋدەن وتپەيدى»، – دەپ ءتۇسىندىردى دەپۋتات.

ونىڭ پىكىرىنشە، ويىن بيزنەسىنە قويىلاتىن ليتسەنزيالىق تالاپتاردى قاتاڭداتۋ قاجەت.

«كوپ جاعدايدا ءبىر كومپانيا بىرنەشە ليتسەنزيا الادى. ال مەملەكەتتىك ورگاندار تەكسەرىپ ۇلگەرگەنشە، ولار باسقا ليتسەنزيالار ارقىلى جۇمىسىن جالعاستىرا بەرەدى. بۇدان بولەك، بارلىق اكىمدىكتەر سالالىق مينيسترلىككە دەرەكتەردى ۋاقتىلى بەرمەيدى. كەيبىر وڭىرلەر مۇنداي جارناما مۇلدەم جوق دەپ ەسەپ بەرگەن. بىراق بارلىعىمىز ءبارىن كورىپ وتىرمىز. كەيبىر جاعدايلاردا ويىن بيزنەسىنىڭ جارناماسى زاڭ كۇشىنە ەنگەننەن كەيىن بەس-التى ايدان سوڭ عانا الىنىپ تاستالدى. ياعني، زاڭنىڭ ورىندالۋى بويىنشا سۇراقتار بار.

ءار وڭىردە تۋريزم جانە سپورت مينيسترلىگىنىڭ سالالىق كوميتەتىنىڭ وكىلى بولۋى ءتيىس. سەبەبى قازىر اكىمدىكتەردە قاجەتتى وكىلەتتىكتەر جوق. ءبىز بۇل ماسەلەنى دە قاراستىرىپ، اكىمشىلىك كودەكسكە تۇزەتۋلەر ەنگىزەمىز. بارلىق وسى شارالار ازاماتتارىمىزدى قۇمار ويىنداردان قورعاۋعا كومەكتەسەدى دەپ ەسەپتەيمىن»، – دەپ قورىتىندىلادى نارتاي سارسەنعاليەۆ.

Abai.kz