الماتى وبلىسىنىڭ پوليتسيا دەپارتامەنتى كامەلەتكە تولماعان بالانى ءولتىرۋ فاكتىسى بويىنشا قىلمىستى تەرگەۋ اياقتالعانىن حابارلادى. تاراپتار قىلمىستىق ءىس ماتەريالدارىمەن تولىق تانىسىپ، ءىستىڭ سوتقا جىبەرىلۋى ءۇشىن پروكۋرورعا جولدانعان.

پوليتسيا مالىمەتىنشە، تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان. بارلىق كۇدىكتىنىڭ وقيعا ورنىندا ايتقان جاۋاپتارى تەكسەرىلىپ، پروتسەسس قاتىسۋشىلارى اراسىندا بەتتەستىرۋلەر وتكىزىلگەن.

«قىلمىسقا قاتىسقانداردىڭ بارلىعىنا قۇقىقتىق باعا بەرە وتىرىپ، 8 بەينەماتەريال زەرتتەلدى. قىلمىستىق ءىس 62 تومنان تۇرادى، ونىڭ ىشىندە بارلىق جينالعان دالەلدەمە، ساراپتاما قورىتىندىسى، جاۋاپ الۋ حاتتاماسى جانە باسقا دا ماڭىزدى ماتەريالدار بار»، – دەپ حابارلادى دەپارتامەنتتەن.

وبلىستىق پوليتسيا تەرگەۋدىڭ بارىسى جانە پروتسەسس قاتىسۋشىلارىنىڭ كونستيتۋتسيالىق قۇقىقتارىنىڭ ساقتالۋى پروكۋراتۋرا ورگاندارىنىڭ قاتاڭ باقىلاۋىندا بولعانىن اتاپ ءوتتى.

ەسكە سالايىق، بىلتىر 4 قازان كۇنى توبەلەستەن 16 جاسار شەرزات قايتىس بولدى، كەيىن اشۋلى تالعارلىقتار ءجاسوسپىرىم ولىمىنە بايلانىستى نارازىلىققا شىقتى.

2024 جىلدىڭ 12 قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

15 قازان كۇنى تالعار قالاسىنىڭ اكىمى باحىت قۋاتبەكۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمباەۆ قىزمەتىنەن قۋىلدى.

2024 جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى. ارتىنان ازات اۋىلىندا جەرلەۋ ءراسىمىن وتكىزۋ كەزىندە قوعامدىق ءتارتىپتى بۇزعانى ءۇشىن شەرزات پولاتتىڭ اكەسى قارجاۋباي ۇستالىپ، بوساتىلدى.

Abai.kz