تۇركىستان وبلىسىنىڭ تابيعات پايدالانۋ جانە تابيعي رەسۋرستار باسقارماسىنا قاراستى «جاسىل ايماق» كمم-ءنىڭ بۇرىنعى باسشىسى سوتتالدى.

مەملەكەت باسشىسىنىڭ تاپسىرمالارىن ورىنداۋ شەڭبەرىندە اگەنتتىك الەۋمەتتىك سەزىمتال سالالاردا زاڭدىلىقتى قامتاماسىز ەتۋ جانە سىبايلاس جەمقورلىقتىڭ الدىن الۋ بويىنشا جۇيەلى نەگىزدە جۇمىس جۇرگىزۋدە.

ولاردىڭ ءبىرى-تابيعي رەسۋرستاردى پايدالانۋ، قورشاعان ورتانى قورعاۋ جانە ەكولوگيالىق تالاپتاردى ساقتاۋ سالاسى.

ەكولوگيانى جاقسارتۋ ازاماتتارىمىزدىڭ دەنساۋلىعى مەن ءال-اۋقاتىن قامتاماسىز ەتۋگە تىكەلەي اسەر ەتەدى.

بۇل رەتتە جەكەلەگەن لاۋازىمدى ادامدار پارا الۋدى، بيۋدجەت قاراجاتىن جىمقىرۋدى جانە بۇزۋشىلىقتاردىڭ الدىن الۋ جونىندەگى وزدەرىنىڭ تىكەلەي مىندەتتەرىن ورىنداماۋدى قوسا العاندا، سىبايلاس جەمقورلىق قۇقىق بۇزۋشىلىقتار جاسايدى.

ماسەلەن، تۇركىستان قالالىق سوتى وبلىستىق تابيعات پايدالانۋ جانە تابيعي رەسۋرستار باسقارماسى جانىنداعى «جاسىل ايماق» كمم بۇرىنعى باسشىسى ي. بەگاسيلوۆقا، ونىڭ ورىنباسارى ا. ەرنازاروۆقا، كمم زاڭگەرى م. اينابەكوۆاعا جانە كاسىپكەر ي. مۋسليموۆقا قاتىستى ۇكىم شىعاردى.

ولار تەحنيكالىق ەرەكشەلىككە جانە قويىلاتىن ساپا تالاپتارىنا سايكەس كەلمەيتىن ارزان پەستيتسيدتەر مەن گەربيتسيدتەردى ساتىپ الۋ ارقىلى 14,9 ملن تەڭگە سوماسىندا بيۋدجەت قاراجاتىن جىمقىرعانى ءۇشىن كىنالى دەپ تانىلدى.

بەگاسيلوۆ 2 جىل 6 ايعا باس بوستاندىعىنان ايىرىلدى، ەرنازاروۆ، اينابەكوۆا جانە مۋسليموۆ 2 جىلعا باس بوستاندىعىنان شەكتەۋگە سوتتالدى.

سونىمەن قاتار، ولار ءومىر بويى مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ايىرىلدى.

سوت اكتىسى زاڭدى كۇشىنە ەنگەن جوق.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

Abai.kz