«EL ARNA» تەلەارناسى جابىلا ما؟ قر مادەنيەت جانە اقپارات ءميپنيسترى اتالعان ساۋالعا جاۋاپ بەرىپ، «EL ARNA» جانە «حابار» تەلەارنالارىن بىرىكتىرۋ تۋرالى ستراتەگيالىق شەشىم قابىلدانعانىن ايتتى.

ايدا بالاەۆا:

– وتاندىق مەدياكەڭىستىكتەگى قارقىندى – وزگەرىستەردى ەسكەرە وتىرىپ جانە مەملەكەتتىك رەسۋرستاردى وڭتايلاندىرۋ ءۇشىن «EL ARNA» جانە «حابار» تەلەارنالارىن بىرىكتىرۋ تۋرالى ستراتەگيالىق شەشىم قابىلداندى. بۇل قادام، ەڭ الدىمەن، وتاندىق تەلەكومپانيالاردىڭ جۇمىس تيىمدىلىگىن ارتتىرۋعا جانە قازاقستاندىق كونتەنت اۋديتورياسىن كەڭەيتۋگە باعىتتالعان.

«EL ARNA» جانە «حابار» تەلەارنالارىن بىرىكتىرۋ 2025 جىلدىڭ 1 مامىرىنا دەيىن اياقتالادى. «EL ARNA»-نىڭ بارلىق قۇندى كونتەنتى «حابار» ارناسىنىڭ ەفيرىنە وتەدى. بۇل ۇزدىك جوبالاردىڭ ساقتالۋىنا، ولاردى كەڭ اۋديتورياعا قولجەتىمدى ەتۋگە جانە ودان ءارى دامىتۋعا مۇمكىندىك بەرەدى.

«EL ARNA» تەلەارناسى وتاندىق كوركەم جانە دەرەكتى فيلمدەر، سەريالدار، سونداي-اق مادەني-اعارتۋشىلىق باعدارلامالار كورسەتىلەتىن پلاتفورما رەتىندە ماڭىزدى ميسسيا اتقاردى. ءبىز بۇل ارنانىڭ ۇلتتىق كينەماتوگرافيا مەن تەلەۆيزيانىڭ دامۋىنا قوسقان ۇلەسىن جوعارى باعالايمىز.

مادەنيەت جانە اقپارات مينيسترلىگى «EL ARNA» تەلەارناسىنىڭ ۇجىمىنا كوپجىلدىق ەڭبەكتەرى، كاسىبيلىك پەن وتاندىق مەديا كەڭىستىكتى دامىتۋعا قوسقان ۇلەستەرى ءۇشىن شىنايى العىس بىلدىرەدى. قايتا ۇيىمداستىرۋ پروتسەسى بارىسىندا بارلىق قىزمەتكەرلەر «حابار» اگەنتتىگىنە جۇمىسقا ورنالاستىرىلادى. جالاقى دەڭگەيى ساقتالىپ، ولاردىڭ تاجىريبەسى مەن ءبىلىمى جاڭا جوبالاردا سۇرانىسقا يە بولادى.

«EL ARNA» تەلەارناسىنىڭ باعدارلامالارىن ءوندىرۋ جانە تاراتۋعا بولىنگەن قارجى «24KZ» جانە «حابار» سياقتى ستراتەگيالىق ماڭىزدى تەلەارنالاردىڭ كونتەنتىن كۇشەيتۋگە جانە تەحنيكالىق بازاسىن ۋاقتىلى جاڭارتۋعا قايتا بولىنەدى.

«EL ARNA» تەلەارناسىنىڭ قىزمەتىنە اتسالىسقان بارشا جاندارعا شىنايى ريزاشىلىعىمدى بىلدىرەمىن جانە الداعى ۋاقىتتا جاڭا جەتىستىكتەر، شىعارماشىلىق شابىت پەن تولايىم تابىس تىلەيمىن!

«EL ARNA» تەلەارناسى 2000 جىلدىڭ 22 ناۋرىزىندا العاشقى ۇلتتىق مەملەكەتتىك تىلدەگى ارنا رەتىندە «حابار-2» اتاۋىمەن قۇرىلدى.

2002 جىلدىڭ ناۋرىزىندا اتاۋى «EL ARNA» بولىپ وزگەرتىلىپ، ەكى تىلدە حابار تاراتۋعا كوشتى.

2014 جىلدىڭ ناۋرىزىندا ارنا ءوز جۇمىسىن توقتاتىپ، ونىڭ جيىلىگىندە «24KZ» جاڭالىقتار تەلەارناسى ىسكە قوسىلدى.

2017 جىلدىڭ 27 ناۋرىزىندا «EL ARNA» جاڭا فورماتتا وتاندىق كينوارنا رەتىندە قايتا ىسكە قوسىلىپ، 2024 جىلدان باستاپ «EL ARNA» جاستارعا ارنالعان ويىن-ساۋىق ارناسى رەتىندە قايتا قۇرىلىمدالدى.

Abai.kz