قازاقستان باس پروكۋراتۋراسى ەرلان نىعماتۋليندى رەيدەرلىك جاسادى دەپ ايىپتادى.

«ءبىر اينالدىرعاندى - قۇداي شىر اينالدىرادى» دەگەن وسى دا، نۇرلان نىعماتۋليننىڭ تاعى ءبىر باۋىرىنىڭ ۇستىنەن قىلمىستىق ءىس قوزعالدى. تاعدىر «مىڭ اسقانعا ءبىر توسقان» جاساپ، نىعماتۋليندەردى ىشكەن-جەگەنىن قۇستىرۋدى قولعا العان سىندى.

باعى جانىپ، جۇلدىزى جارقىراعان نۇرلان نىعماتۋلين 2022 جىلعى 1 اقپاندا ءماجىلىس توراعاسى قىزمەتىنەن كەتكەنىن جاقسى بىلەمىز. نۇكەڭ 2012-2014 جىلدارى دا ءماجىلىس سپيكەرى بولىپ، 2016 جىلدان باستاپ تومەنگى پالاتانى باسقارعان ەدى. نازارباەۆ داۋىرىندە ءار جىلدارى ول پرەزيدەنت اكىمشىلىگىن باسقاردى جانە قاراعاندى وبلىسىنىڭ اكىمى قىزمەتىن اتقاردى.

دەپۋتاتاتتىق مانداتتان ونىڭ باسقا دا تۋىستارى قۇر قالعان جوقتىن. اتاپ ايتساق، ۇلكەن اعاسى – ارعىن نىعماتۋلين قاراعاندى وبلىستىق ءماسليحاتىنىڭ بۇرىنعى دەپۋتاتى بولسا، ەگىزى ەرلان نىعماتۋلين – ءماجىلىس پەن سەناتتا دەپۋتات بولىپ جالعاندى جالپاعىنان باسقان-تىن. ەندى ولار قۇدايدىڭ دا، بيلىكتىڭ كوزگە شىققان سۇيەلىنە اينالدى.

بيلىك پەن زاڭنىڭ ولاردى قىرىنا الدى دەيتىنىمىز، قازاقستان باس پروكۋراتۋراسى كاسىپكەر راميس يبراگيموۆتىڭ ارىزى بويىنشا قىلمىستىق ءىس قوزعادى. ەرلان نىعماتۋليندى – ءماجىلىستىڭ بۇرىنعى توراعاسى نۇرلان نىعماتۋليننىڭ سىڭارىن – رەيدەرلىككە ايىپتاعان سىبىس شىنعا اينالدى.

شىنعا اينالدى دەيتىنىمز، جۇرت اراسىنا تاراعان وسى سىبىسقا سارسەنبى كۇنى باس پروكۋراتۋرانىڭ ءباسپاسوز قىزمەتى «بوپسالاۋ» فاكتىسى بويىنشا قىلمىستىق ءىس قوزعالعانىن راستاپ نۇكتە قويدى.

ماسەلەنىڭ ءمانىسى مىنادا: 11 ناۋرىزدا قاراعاندى قالاسىنىڭ تۇرعىنى، «Zara» فرانشيزاسىنىڭ بۇرىنعى يەسى ناتاليا وۆدەيچۋك پەن ونىڭ جۇبايى راميس يبراگيموۆ «ەرلان نىعماتۋليندى رەيدەرلىككە قاتىسى بار» دەپ ايىپتاعان بولاتىن.

بۇل ارادا تاعى ءبىر دايەك: وتاندىق باق 2025 جىلعى 7 قاڭتاردا نىعماتۋليندەرگە رەيدەرلىككە قاتىستى جاڭا ايىپتاۋلاردان كەيىن «پرەزيدەنت قاسىم-جومارت توقاەۆتى بيلىكتەن كەتىرۋگە دايىندالدى» دەگەن كۇدىك بار ەكەنى حابارلانعان بولاتىن.

سودان كەيىن-اق، نىعماتۋليندەرگە قاتىستى رەيدەرلىك، قىلمىستىق قۇرىلىمدارعا قاتىسى بار بولۋى، زاڭسىز سحەمالارعا ارالاسۋى جانە قىلمىستىق ىستەردى قولدان ۇيىمداستىرۋى تۋرالى ايىپتاۋلار بىرنەشە رەت ءسوز ەتىلسە دە، ولار ءالى بوستاندىقتا تالتاڭداپ ءجۇر.

ءابىل-سەرىك الىاكبار

Abai.kz