اقش  پەن رەسەي ەكى تاراپتىڭ 24-ناۋرىزدا ساۋد ارابياسىندا وتكەن كەلىسسوزىنەن كەيىن اق ءۇي تارابى كرەملدىڭ قارا تەڭىزدە اتىستى توقتاتۋ تۋرالى تالاپكا كەلىسكەنىن شۇيىنشىلەگەن ەدى. ونىڭ استارى بار بولىپ شىقتى. ورىس تارابى قارا تەڭىزدەگى جۇك تاسىمالىن قالپىنا كەلتىرۋدىڭ باستى شارتى رەتىندە ورىس بانكتەرىن حالىقارالىق كوممۋنيكاتسيا جۇيەسىنە (SWIFT) قايتا قوسۋدى ورتاعا قويعان. 

بۇل تۋرالى  Bloomberg اگەنتتىگى "رەسەي پرەزيدەنتى ۆلاديمير پۋتين اقش پرەزيدەنتى دونالد ترامپتىڭ اكىمشىلىگى بيلىكتە بولعان كەزدە سانكتسيالاردى جەڭىلدەتۋگە مۇمكىندىك بار-جوعىن تەكسەرىپ جاتىر. كرەملدىڭ ستراتەگياسىنىڭ ءبىر بولىگى – قارا تەڭىزدە اتىستى توقتاتۋ تۋرالى كەلىسسوزدەر اياسىندا روسسەلحوزبانكتى SWIFT جۇيەسىنە قوسۋ. روسسەلحوزبانككە قاتىستى تالاپ -  ترامپتىڭ ەۋروپاعا ىقپالىن بايقاپ كورۋ ماقساتىندا قويىلعان. ەگەر بۇل ماسەلەدە جەتىستىككە قول جەتسە، ونىڭ اياعى سانكتسيا رەجيمىنىڭ بىرتىندەپ جۇمسارۋىنا سەپتەسۋى دە مۇمكىن" دەپ جازعان ەدى. كرەملدىڭ ءۇمىتى اقتالمايتىن ءتۇرى بار.

كەشە 31-ناۋرىزدا گەرمانيا، فرانتسيا، يتاليا، پولشا، يسپانيا جانە ۇلىبريتانيا قاتارلى 6 ەلدىڭ سىرتقى ىستەر مينيسترلەرى مەن ەۋروپا وداعىنىڭ سىرتقى ساياسات جونىندەگى جوعارعى وكىلى كايا كاللاس بىرلەسكەن مالىمدەمە جاريالاپ، رەسەيگە قارسى سانكتسيانى كۇشەيتۋگە دايىن ەكەندەرىن مالىمدەدى.

اتالعان ەلدەر رەسەيدىڭ ۋكرايناعا قارسى جۇرگىزىپ جاتقان سوعىسىنا توسقاۋىل قويۋ ءۇشىن قولى جەتكەن بارلىق قۇرالدى پايدالانىپ، رەسەيگە قىسىم جاساۋدى جالعاستىراتىنىن، رەسەيدىڭ باتىس ەلدەرىندەگى اكتيۆتەرى ماسكەۋ ۋكرايناعا اشقان سوعىستى توقتاتپايىنشا جانە ۋكرايناعا كەلتىرگەن زياندى وتەمەيىنشە بۇعاتتاۋلى جاتا بەرەتىنىن مالىمدەدى.

مالىمدەمەگە قول قويعان ەلدەر ۋكراينانىڭ "اسكەري جانە قورعانىس ونەركاسىبىن قارجىلاندىرۋدى، سەرىكتەس ەلدەردىڭ ۋكرايناعا اسكەري جاردەمىن شەكتەۋ" تۋرالى شارت قوياتىن بەيبىت كەلىسىمدى قابىلدامايتىنىن كەسىپ ايتتى.

"ەۋرواتلانتيكالىق قاۋىپسىزدىككە، ۋكراينانىڭ تاۋەلسىزدىگىنە، ەگەمەندىگىنە جانە اۋماعىنىڭ تۇتاستىعىنا قاۋىپ توندىرەتىن ەشقانداي كەلىسىم بولماۋى كەرەك", – دەپ جازىلعان مالىمدەمەدە.

وعان قوسا مينيسترلەر رەسەيدى اتىستى توقتاتۋ تۋرالى كەلىسسوزدى "سوزبۇيداعا سالۋ تاكتيكاسىن" توقتاتۋعا شاقىرعان،

كرەملدىڭ ءبىر جاعىنان سوققىنى ۇدەتىپ، ەندى ءبىر جاعىنان بەيبىت كەلىسسوزدى قولداۋشى بولىپ كورىنگەن، ەكى ءجۇزدى ساياساتى ەۋروپا باسشىلارىن عانا ەمەس، اق ءۇي قوجايىنىنىڭ دا اشۋىن تۋدىرعان ەدى. ترامپ ءوز سۇحباتىندا پۋتين تۇلكى بۇلاڭعا سالىپ، سوعىستى سوزا بەرسە جويقىن سانكتسيا سالاتىنىن ايتىپ ايبات شەككەن ەدى. ساراپشىلار ترامپ پۋتيننىڭ كوڭىلىنە "9-ماي" جەڭىس كۇنى وتكەنشە قاراۋى مۇمكىن دەيدى ودان ارى قاراي ءوزى ۋادە ەتكەن ەكونوميكالىق قارۋىن ىسكە قوسسا، رەسەي ەكونوميكاسىن اۋىر سوققى كۇتىپ تۇر. رەسەيدىڭ مۇنايى مەن گازىنىڭ باستى تۇتىنۋشىسى قىتاي مەن ءۇندىستان بولىپ تۇرعانى بەلگىلى. پۋتين سوعىستى توقتاتۋدى سوزا بەرسە، ترامپ ورىس ەنەرگياسىن ساتىپ العان ەلدەرگە 50 پايىزعا دەيىن كەدەندىك سالىق، ەكونوميكالىق جازا تاعايىنداماق.

Abai.kz