قر پرەمەر-ءمينيسترىنىڭ ورىنباسارى ن.ب. كوشەرباەۆقا!

قۇرمەتتى ەرمەك بەدەلبايۇلى!

ادامزات بالاسى كوز كورىپ، قۇلاق ەستىمەگەن قۇبىلىستارعا ەرىكسىز كۋا بولىپ جاتىر. ازعىندىق پەن ارسىزدىق شەكارا تالعامايدى ەكەن.  مۇحامەد پايعامبارىمىز ءبىر حاديسىندە: «ەگەر ءبىر جاماندىقتىڭ كورسەڭ قولمەن تۇزەت، وعان شاماڭ كەلمەسە تىلمەن ايت، وعان كۇشىڭ جەتپەسە – جۇرەكپەن جەك كور!» دەگەن ەدى. ادام بالاسىنىڭ قولىمەن جاسالىپ جاتقان سۇمدىقتاردىڭ كەسىرىنەن قول – قولتىقتان، ءتىل – تۇبىنەن كەسىلىپ، جۇرەكتەر قارايىپ بارادى.

موڭكە بي مەن ءماشھۇر ءجۇسىپ بابالارىمىز ايتقان كۇدىك-كۇماندار ەسىك-تەرەزەمىزدى تالقانداپ، بوساعامىزدى ويرانداپ، تورىمىزدە تايراڭداپ، بالامىزدى – بالشىق، قىزىمىزدى – مانسۇق ەتە باستادى.

جەر شوقتىعى – بۋرابايدا وتكەن ۇلتتىق قۇرىلتايدا ەل پرەزيدەنتى قاسىم-جومارت توقاەۆ «دەموكراتيالىق مورالدىق دەلىنىپ جۇرگەن قۇندىلىقتار، ونىڭ ىشىندە لگبت كوپتەگەن ەلگە ونداعان جىل بويى تاڭىلىپ كەلدى. وسىنداي جەلەۋمەن حالىقارالىق ۇكىمەتتىك ەمەس قورلار مەن ۇيىمدار كوپتەگەن ەلدىڭ ىشكى ىسىنە نەگىزسىز ارالاستى» - دەپ اشىق ايتتى.

سونداي-اق، مەملەكەت باسشىسى پرەزيدەنت ترامپ باستاعان امەريكا اكىمشىلىگىنىڭ جاپپاي قىزمەت بابىن اسىرا پايدالانۋعا قاتىستى وقيعالاردى انىقتاۋعا جانە ءداستۇرلى مورالدىق قۇندىلىقتاردى قالپىنا كەلتىرۋگە باعىتتالعان جۇمىستارى قولداۋعا لايىق ەكەنىن اتاپ ءوتتى.

راسىندا دا، سوڭعى جىلدارى الەۋمەتتىك جەلىلەردە ۇلتتىق قۇندىلىقتارىمىزعا جات قۇبىلىستاردى، لگبت-نى ناسيحاتتايتىن ۇيىمداردىڭ بەلسەندى ارەكەتى يمانىمىزدى ءۇيىرىپ، جانىمىزدى شۇبەرەككە تۇيۋدە. اسىرەسە، ولار TikTok, وزگە دە پلاتفورمالار ارقىلى وسكەلەڭ ۇرپاقتى ازعىندىققا ۇگىتتەۋدە.

اسا جوعارى تەحنولوگيالىق ءادىس-ايلامەن قارۋلانعان مۇنداي قيتۇرقى ۇگىت-ناسيحاتقا ءالى كامەلەتتىك جاسقا تولماعان، جاقسى مەن جاماندى ايىرا بىلمەيتىن، بۇعاناسى بەكىمەگەن، رۋحاني دىڭگەگى قاتپاعان بالالار مەن جاسوسپىرىمدەرىمىز تەز بوي الدىراتىنى انىق. بۇل ارەكەت بۇۇ-نىڭ بالالار قۇقىعى جونىندەگى كونۆەنتسياسىنا دا قايشى كەلەدى. ياعني ولار حالىقارالىق نورمالاردىڭ ءوزىن بەلدەن باسىپ، ادامدىقتان دا، اردان دا اتتاۋدا.

جاستاردى ازدىرىپ، وتباسىن ويران ەتۋدى كوزدەيتىن بۇل ۇيىمداردىڭ جىمىسقى ارەكەتتەرى سىرتتان، ياعني شەتەلدەردەن قارجىلاندىرىلۋدا. ولار بۇل باعىتتا جۇمىس ىستەيتىن ۇكىمەتتىك ەمەس ۇيىمدارعا ءتۇرلى گرانتتار بەرۋ ارقىلى ەلىمىزدىڭ ىشكى ىسىنە ارالاسىپ، ۇلتتىق بولمىسىمىزعا جات دۇنيەلەردى تاراتۋدا. وسىلايشا، قوعامدى ىشتەن ءىرىتىپ، مەملەكەتىمىزگە قاۋىپ توندىرۋدە.

ماسەلەن، «فەمينيتا» دەيتىن ۇيىم ءتىپتى مەكتەپ وقۋشىلارىنىڭ چاتىنا «جىنىستىق قاتىناسقا باۋليتىن، قالاي گوموسەكسۋاليست، لەسبيانكا بولۋ جولدارىن ۇيرەتەتىن ءىس-شاراعا» شاقىرۋلار تاراتقان.

قازىرگى تاڭدا وسىنداي ۇيىمداردى قارجىلاندىرىپ كەلگەن يۋسايد-تىڭ جۇمىسى توقتاعانىمەن، باتىس ەلدەرىنەن قارجىلاندىرۋ تىيىلماي وتىر. اقشا ءۇشىن بارلىق قۇندىلىقتاردى اياققا تاپتاۋشىلار جىمىسقى ارەكەتتەرىن جۇرگىزۋ ءۇشىن سىرتتان دوللارلاپ قىرۋار قارجى الۋدا.

سوندىقتان مۇنداي ۇيىمداردىڭ جۇمىسىن مۇقيات تەكسەرىپ، زاڭ اياسىندا قاتاڭ شارا قولدانىپ، مۇلدەم توسقاۋىل قوياتىن كەز جەتتى.

بۇل ماسەلەنى وسىعان دەيىن دە ارىپتەستەرىم ءماجىلىس مىنبەرىنەن بىرنەشە رەت كوتەرىپ، دەپۋتاتتىق ساۋال جولداعان بولاتىن. لگبت ناسيحاتىنا زاڭمەن تىيىم سالۋعا دا باستاماشىلدىق ەتتىك. الايدا بۇل ۇكىمەت تاراپىنان قولداۋ تاپپاي كەلەدى.

بىلتىر باستاماشىل ازاماتتار لگبت-عا قارسى جاريالاعان پەتيتسياعا ەكى اپتانىڭ ىشىندە 50 مىڭنان استام ادامنىڭ قولداپ داۋىس بەرۋى قوعامنىڭ دا بۇعان بارىنشا قارسى ەكەنىن بىلدىرەدى. دەگەنمەن، قوعامنىڭ بۇل ورىندى تالابى مادەنيەت جانە اقپارات مينيسترلىگى تاراپىنان ءىشىنارا عانا قولداۋ تاۋىپ، زەرتتەيمىز دەگەنمەن عانا شەكتەلدى.

ۇرپاعىڭدى ازدىراتىن، ءداستۇرىڭدى توزدىراتىن، الاۋىزدىقتى قوزدىراتىن، رۋحىڭدى سىندىراتىن، ءسويتىپ ەلدىگىڭدى تىندىراتىن «دەموكارتيالىق ۇردىستەردىڭ» اتاسىنا نالەت!

اۋزىمەن قۇس تىستەگەن الىس-جاقىنداعى ەلدەردىڭ ءوزى ەتەكتەرىن ەتەكتەرىن قىمتاپ، ەسىكتەرىنە قاراۋىل قويا باستادى. ال، ءبىز كوڭىلىمىزدى كۇپتى قىلىپ، جاراتىلىسىمىزدى بايقاپ، شارانامىزدى شايقاپ تۇرعان قۇبىلىستاردى كوزىمىزبەن كورىپ تۇرىپ قام-قارەكەتسىز وتىرمىز. جانىمىز شىرىلداپ، ءتانىمىز كۇيىپ بارادى.

ەندى ۇكىمەت حالىقارالىق ۇكىمەتتىك ەمەس قورلار مەن ۇيىمداردىڭ قاس-قاباعىنا قاراپ جالتاقتاماي، ەلىمىزدىڭ ىشكى ىسىنە ارالاسىپ، شاڭىراعىمىزدى شايقاعىسى كەلەتىن مۇنداي قادامدارعا باتىل توسقاۋىل قويماسا ءبارى دە كەش بولادى.

جەتپىس جەتى اتامىزدا جوق وسىنداي وسپادار ارەكەتتەردىڭ الدىن الۋ ءۇشىن جەدەلدەتىپ مىنانداي شارالاردى قولعا الۋدى ۇسىنامىن.

1. بۇكىل الەۋمەتتىك جەلىلەردى قاتاڭ سۇزگىدەن وتكىزىپ، كامەلەتتىك جاسقا تولماعاندار اراسىندا ۇلتتىق ءداستۇرىمىز بەن دۇنيەتانىمىزعا جات قۇبىلىستاردى ناسيحاتتايتىن ازعىن اقپاراتتارعا توسقاۋىل قويۋ.

2. مادەنيەت جانە اقپارات مينيسترلىگىنىڭ لگبت قوزعالىسىنىڭ كامەلەتتىك جاسقا تولماعاندارعا اسەرى تۋرالى زەرتتەۋىن اياقتاپ، جاريالاۋ.

3. ەل پرەزيدەنتىنىڭ تاپسىرماسىنا سايكەس ءداستۇرلى مورالدىق قۇندىلىقتارىمىزدى نىعايتۋ جونىندە ارنايى تۇجىرىمداما ازىرلەۋ.

4. سىرتتان قارجىلاندىرىلاتىن، ءتۇرلى گرانتتار الاتىن، ۇلتتىق سالت-ءداستۇرىمىزدى مانسۇق ەتەتىن ۇكىمەتتىك ەمەس ۇيىمداردى تەكسەرىپ، ولاردىڭ كامەلەتتىك جاسقا تولماعان بالالارمەن جۇمىس ىستەۋىنە توسقاۋىل قويۋ.

قۇرمەتپەن،

«اماNات» فراكتسياسىنىڭ مۇشەسى، دەپۋتات جاناربەك ءاشىمجان

Abai.kz