وبلىس قۇرىلعانعا دەيىن جەتىسۋ وڭىرىندە نەبارى تەك 5 ەلدى مەكەن گازداندىردىرىلعان بولسا، بۇگىنگە دەيىن تاعى 79 ەلدى مەكەنگە تابيعي گاز جەتكىزىلدى. ءسويتىپ وبلىستا قازىر 84  ەلدى مەكەنگە گاز تارتىلدى، سونىڭ 21-ءى جىل باسىنان بەرى كوگىلدىر وتىنعا قول جەتكىزدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

جالپى، گازداندىرۋ – پرەزيدەنتتىڭ تاپسىرماسىنا سايكەس وبلىس باسشىلىعى ەرەكشە ءمان بەرىپ وتىرعان باسىم باعىتتاردىڭ ءبىرى. 2025 جىلدىڭ سوڭىنا دەيىن وڭىردە گازداندىرۋ دەڭگەيى 71,4% بولىپ، پانفيلوۆ اۋدانىن قوسا العاندا، كەربۇلاق اۋدانىنان تالدىقورعانعا دەيىنگى 500 مىڭنان استام حالقى بار 126 ەلدى مەكەن گازعا قول جەتكىزە الادى.

سۋرەت: جەتىسۋ وبلىسى اكىمدىگىنىڭ ءباسپاسوز قىزمەتىنەن الىندى.

تۇرعىنداردىڭ ايتۋىنشا، كوگىلدىر وتىننىڭ كەلۋىمەن بىرگە اۋىلداعى تۇرمىس تا جايلى بولا تۇسكەن:

- ءبىزدىڭ اۋىلعا گاز 2023 جىلدان باستاپ بەرىلە باستادى. كوگىلدىر وتىن جەتكىزىلەدى دەگەندى ەستىگەننەن كەيىن وتباسىمىزعا جاڭا ءۇي تۇرعىزدىق. ەندى پەش جاعۋدىڭ، كومىر-وتىن تاسۋدىڭ قاجەتى بولمايدى. قازىر جاڭا ۇيىمىزدە گاز دا، سۋ دا بار. مەملەكەت تاراپىنان اۋىلدىق جەرگە بارلىق جاعداي جاسالىپ جاتقانى قۋانتادى، - دەدى كوكسۋ اۋدانى الدابەرگەنوۆ اۋىلىنىڭ تۇرعىنى قۇدايبەرگەن ماحمەتوۆ.

سۋرەت: جەتىسۋ وبلىسى اكىمدىگىنىڭ ءباسپاسوز قىزمەتىنەن الىندى.

سونىمەن قاتار 2024 جىلدىڭ تامىز ايىندا «تالدىقورعان-ءۇشارال» ماگيسترالدى گاز قۇبىرىنىڭ قۇرىلىسى باستالدى. بيىلعى جىلدىڭ كۇزىندە اياقتالادى دەپ كۇتىلۋدە. بۇل جوبانى ىسكە اسىرۋدىڭ ناتيجەسىندە الاكول، اقسۋ، سارقان اۋداندارىنىڭ 66 ەلدى مەكەنى گازبەن قامتاماسىز ەتىلمەك.

سونداي-اق الداعى ۋاقىتتا وبلىستى تابيعي گازبەن قوسىمشا قامتاماسىز ەتۋ ءۇشىن «الماتى - تالدىقورعان» لۋپينگىسىنىڭ (ەكىنشى تارماعى) قۇرىلىسىن سالۋعا قاتىستى دايىندىق جۇرگىزىلۋدە.

سۋرەت: جەتىسۋ وبلىسى اكىمدىگىنىڭ ءباسپاسوز قىزمەتىنەن الىندى.

اتاپ وتسەك، گازداندىرۋ ءىسى بارىسىندا 1800-دەي تۇراقتى جانە ۋاقىتشا جۇمىس ورىندارى اشىلدى.

گاز قوستىرۋ قۇنىنا توقتالساق، وبلىس اكىمىنىڭ تاپسىرماسىنا سايكەس قابىلدانعان شارالاردىڭ ارقاسىندا باسەكەلەستىك ورتانى دامىتۋ ارقىلى گاز قوستىرۋ قۇنىن قازاندىق پەن قاجەتتى جيىنتىقتاردى قوسپاعاندا 170-175 مىڭ تەڭگەگە دەيىن تومەندەتۋگە مۇمكىندىك تۋدى (گاز قۇبىرىنىڭ ۇزىندىعى 25 مەترگە دەيىن). سونىمەن بىرگە ءبىر جارىم جىلدىڭ ىشىندە 1600 گاز قازاندىعىن ساتىپ الۋعا 500 ميلليون تەڭگە ءبولىندى، تۇرعىندارعا قازاندىقتىڭ تولەمىن 10 ايعا دەيىن ءبولىپ تولەۋگە جەڭىلدىكتى جاعداي جاسالىپ وتىر.

جالپى، 2028 جىلعا قاراي جەتىسۋ وبلىسىندا گازداندىرۋعا جاتاتىن 192 ەلدى مەكەنگە تولىقتاي گاز تارتىلادى. سونىڭ ارقاسىندا 624 مىڭنان استام تۇرعىن نەمەسە ءوڭىر حالقىنىڭ 91%-ى كوگىلدىر وتىنعا قول جەتكىزە الادى.

وسىلايشا جەتىسۋلىقتاردىڭ تۇرمىس ساپاسىن جاقسارتۋعا باعىتتالعان گازداندىرۋ جۇمىسى اكىمدىك تاراپىنان الداعى ۋاقىتتا دا جالعاسادى.

Abai.kz