تۋريزم مينيسترلىگى: ءبىز ەلىمىزدىڭ ۇلتتىق پاركتەرىندە ەكوتۋريستەر سانىنىڭ تۇراقتى ءوسۋىن كورىپ وتىرمىز. ءبىر جىل ىشىندە 2,8 ملن ادام كەلدى.

مەملەكەت باسشىسىنىڭ تاپسىرماسى بويىنشا ەلىمىزدە الماتى تاۋ كلاستەرىن دامىتۋ بويىنشا كەشەندى جوسپار ازىرلەندى. ونىڭ نەگىزگى مىندەتى – تاۋ ءتۋريزمىن دامىتۋ.

جوسپاردى ىسكە اسىرۋ ناتيجەسىندە ۇزىندىعى 150 شاقىرىم بولاتىن الەمدىك دەڭگەيدەگى تاۋ شاڭعىسى كۋرورتىن سالۋ جوسپارلانعان. جاڭا كۋرورت جىلىنا 5 ملن-عا دەيىن تۋريستەردى تارتا الادى دەپ كۇتىلۋدە.

كەشەندى جوسپاردىڭ تاعى ءبىر جوباسى «ماڭعىستاۋ» تۋريستىك ايماعىن دامىتۋعا باعىتتالعان. ول بويىنشا تۇزبايىر، قىزىلقۇپ، تورىش، ايراقتى سياقتى بىرەگەي ورىندارعا قول جەتكىزۋگە بولادى جانە جاڭا نىسانداردىڭ اشىلۋىنا جاعداي جاسالعان.

سونىمەن قاتار ەكوتۋريزمدى ىلگەرىلەتۋ ماقساتىندا ۇلتتىق ساياباقتاردى دامىتۋ بويىنشا جۇمىستار جۇرگىزىلۋدە. سوڭعى جىلدارى بازالىق ينفراقۇرىلىمى بار 8 تۋريستىك ۆيزيت-ورتالىق سالىندى.

«ءبىز ەلىمىزدىڭ ۇلتتىق پاركتەرىنە كەلگەن ەكوتۋريستەردىڭ تۇراقتى ءوسۋىن بايقاپ وتىرمىز. 2024 جىلدىڭ قورىتىندىسى بويىنشا 14 ۇلتتىق پارككە 2,8 ملن ادام بارىپ، كەلۋشىلەردىڭ سانى 2023 جىلمەن سالىستىرعاندا 18%-عا ءوستى. ارتىپ كەلە جاتقان سۇرانىستى قاناعاتتاندىرۋ ءۇشىن ءاربىر ۇلتتىق پاركتى نەگىزگى تۋريستىك ينفراقۇرىلىممەن قامتاماسىز ەتۋ جانە جاڭا ساپار-ورتالىقتارىن سالۋ جوسپارلانىپ وتىر. سونىمەن قاتار بارلىق ۇلتتىق پاركتەردە بۋرابايداعى سەكىلدى كىرۋ جۇيەسىن تسيفرلاندىرۋ قاجەت»، — دەپ اتاپ ءوتتى تۋريزم جانە سپورت ءمينيسترى ەربول مىرزابوسىنوۆ.

وسىنداي جۇمىس ءتۋريزمنىڭ ءارتۇرلى تۇرلەرىن دامىتۋ ءۇشىن باسقا وڭىرلەردە دە جۇزەگە اسىرىلادى. اسىرەسە، ءتۋريزمنىڭ ەتنو-مادەني، بالالار مەن جاسوسپىرىمدەر، مەديتسينالىق، ساۋىقتىرۋ، ىسكەرلىك، كاراۆانينگ جانە اۆتوتۋريزم سەكىلدى ءتۇرى باسىمدىققا يە.

Abai.kz