تۇڭعىش پرەزيدەنت نۇرسۇلتان نازارباەۆتىڭ سەنىمدى سەرىگى بولعان نۇرلان نىعماتۋليننىڭ جاقىندارى شەتىنەن ءىستى بولىپ جاتىر.

نىعماتۋليننىڭ ۇلى - نۇرجان نۇرلانۇلى مەن تۋعان باۋىرى ەرلان زايروللاۇلىنىڭ ۇستىنەن شاعىم ارىز تۇسكەنىن باس پروكۋروردىڭ ورىنباسارى عالىمجان قويگەلديەۆ راستادى.

«قازىر ءبىز ارىزدى قاراستىرىپ جاتىرمىز. قانداي دا ءبىر جايتتى ايتۋعا ءالى ەرتە»، - دەپ پىكىر ءبىلدىردى ول سەناتتا باق وكىلدەرىنىڭ ساۋالىنا وراي.

بۇعان دەيىن نۇرلان نىعماتۋليننىڭ تۋعان اعاسى ارعىن زايروللاۇلىنا ىزدەۋ جاريالانعانى حابارلانعان ەدى. ول شەتەلگە بوي تاسالاپ ۇلگىرگەن.

پروكۋراتۋرا ورگاندارى ارعىن نىعماتۋليننىڭ ۇستىنەن قاراعاندى وبلىسىندا حوككەي كلۋبىنا بولىنگەن بيۋدجەت قاراجاتىن جىمقىرۋ فاكتىسى بويىنشا ءىس قوزعاعان.

«وعان حالىقارالىق ىزدەۋ جاريالانعان. تۇرعىلىقتى جەرىن انىقتاعاننان كەيىن ەكستراداتسيالاۋ ماسەلەسى قابىلدانادى»، - دەدى باس پروكۋروردىڭ ورىنباسارى.

الەۋمەتتىك جەلىدە «بايتەرەك» حولدينگىنىڭ جانە «قازمۇنايگاز-اەرو» جشس-نىڭ بۇرىنعى ديرەكتورى بولعان نۇرجان نۇرلانوۆتىڭ ۇستىنەن قىلمىستىق ءىس قوزعالعانى تۋرالى داقپىرت تاراعان ەدى.

ارتىنان ىشكى ىستەر مينيسترلىگىنىڭ ءباسپاسوز قىزمەتى قر قىلمىستىق كودەكسىنىڭ 389-بابى بويىنشا تەرگەۋ ءجۇرىپ جاتقانىن راستادى.

«الماتى قالاسى پوليتسيا دەپارتامەنتىنىڭ تەرگەۋ باسقارماسىندا قر قك 389-بابى (وزىنشە بيلىك ەتۋ) بويىنشا سوتقا دەيىنگى تەرگەۋ ءجۇرىپ جاتىر. قازىرگى ۋاقىتتا ءىستىڭ ءمان-جايلارىن جان-جاقتى، تولىق جانە وبەكتيۆتى زەرتتەۋ ءۇشىن تەرگەۋ ارەكەتتەرى جۇرگىزىلىپ جاتىر»، - دەلىنگەن ءىىم جاۋابىندا.

نازارباەۆ كەزىندە بيلىك پەن بايلىققا كەنەلگەن نىعماتۋلين قاڭتار وقيعاسىنان كەيىن 2022 جىلدىڭ 1 اقپانىندا ءماجىلىس توراعاسى قىزمەتىنەن ءوز ەركىمەن كەتتى. ونىڭ ورنىنا پرەزيدەنت قاسىم-جومارت توقاەۆتىڭ بۇرىنعى اكىمشىلىك باسشىسى ەرلان قوشانوۆ تاعايىندالدى. ​كەيىنىرەك، نىعماتۋلين نۇر وتان پارتياسىنىڭ (قازىرگى امانات) ساياسي كەڭەسىنەن شىعارىلدى. وسىدان كەيىن نىعماتۋلين ءتۇرلى ايىپتاۋلارعا تاپ بولدى.

نۇرلان نىعماتۋلين – بىرنەشە اعايىندى ۇلكەن اۋلەتتىڭ مۇشەسى. بۇرىنعى ءماجىلىس سپيكەرىنىڭ 5 باۋىرى بار.

نىعماتۋليننىڭ قۇداسى – دىنمۇحامەت ىدىرىسوۆ (قىزى ءمادينا نۇرلان نىعماتۋليننىڭ ۇلى نۇرحان نۇرلانوۆقا كۇيەۋگە شىققان). 2022 جىلدىڭ مامىرىنداعى جاعداي بويىنشا ىدىرىسوۆ "قازاقستان كوممۋنالدىق جۇيەلەرى", "ورداباسى گرۋپپ" كومپانيالارىنا جانە ءارتۇرلى جشس-دەگى باسقا دا اكتسيالارعا يە.

نۇرلان نىعماتۋليننىڭ جۇبايى بايمۇرزاەۆا ۆەنەرا. ال ۇلدارى نۇرجان، نۇرحان، ءمادي. ەكس-سپيكەردىڭ جارى Kcell جانە Air Astana سياقتى 17 كومپانيامەن ۇلەستەس. قازىر بيزنەس باعىتى – جەكە جىلجىمايتىن مۇلىكتى جالعا بەرۋ جانە باسقارۋ بويىنشا "Capital Estate Group" جشس قۇرىلتايشىسى. ونىڭ قۇرىلتايشىلارى قاتارىندا ۇلدارى – نۇرجان مەن نۇرحان بار. ولار قازاقستانداعى ءىرى بيزنەس سالاسىندا بەلسەندى قىزمەت ەتەدى. دەگەنمەن بۇل ەكى ەسىم اكەلەرى وتستاۆكاعا كەتكەن سوڭ كەڭىنەن تانىلا باستادى.

Abai.kz