Abai.kz رەداكتسياسى وسىعان دەيىن ەكس-پرەزيدەنت نۇرسۇلتان نازارباەۆتىڭ قوس قىزىنىڭ بيزنەس پەن ساياساتتاعى سوقپاقتارى جايلى ماتەريالدار جاريالاعان ەدى.

ءبىرىنشى: تاقتان تۇسسە دە، اتتان تۇسپەگەن داريعا...

ەكىنشى: حانشايىم دينارانىڭ قوي تەرىسىن جامىلعان قاسقىر بيزنەسى

بۇگىن بۇرىنعى پرەزيدەنتتىڭ تاعى ءبىر قىزى – ءاليا نازارباەۆا جايىندا كىشىگىرىم ماتەريال ۇسىنباقپىز...

قالدىق پەن بەنزين حانشايىمى – ءاليانىڭ ازىرشە جۇرتقا بەلگىلى ەكى تايتاڭى: ءبىزدىڭ سايت بۇعان دەيىن نازارباەۆتىڭ باسىنان باعى ۇشقان ەكى قىزى جايىندا ءبىراز دۇنيەلەردى وقىرمان تالقىسىنا تارتۋ ەتىپ ۇلگەردى. بىراق وقىرماندارىمىز كوكەيىندە «ءاليا سوندا «سۋدان اق، سۇتتەن تازا ما» دەگەن تۇيتكىلدى وي قالاتىنى جاسىرىن ەمەس.

كەز كەلگەن ەلدىڭ بيلىگىن ۇزاق جىل ۇستاعان بيلەۋشىنىڭ قىزدارى ءوز ۇلتىنىڭ ناعىز پاتيورتى بولۋعا ءتيىس. بىراق كارىموۆ پەن نازارباەۆتىڭ قىزدارى بۇل قالىپتاسقان باعزى ستەرەوتيپتى بۇزدى.  ءيا، وزبەكستاندا – گۋلنارا مەن لولا، قازاقستاندا – داريعا، دينارا ءھام ءاليا جالعاندى جالپاعىنان باسىپ ءجۇردى...

«ايران ىشكەن قۇتىلىپ، شەلەك جالاعان تۇتىلادىنىڭ» كەرى ەڭ اۋەلى يسلام اكانىڭ قىزدارىنىڭ باسىنا ءتۇستى. ال نازارباەۆتىڭ قىزدارىنا شاڭ جۋىماي، ويحوي دۇنيە، مامىرجاي كۇي كەشتى. ولاي بولۋىنا ءبىر جاعى ءتاجتاجالدىڭ دا پايداسى ءتيدى.

ءاليانىڭ اپكەلەرىنەن ەرەكشىلىگى – بايعا تيگىشتىگىمەن اتى شىقتى. اۋەلى اكەسىنىڭ ءتىلىن الىپ، اۋەلەتتىك نەكەگە وتىرىپ، جۇرتتى تاقتان تايدىرعان قىرعىز بيلەۋشىسىنىڭ كەلىنى اتانىپ، ايدار اقاەۆپەن باس قۇرادى. كەيىن تاعى ەكى رەت قالىڭدىق كويلەگىن كيىپ، 2002 جانە 2015 جىلدارى بەتىن اشتىردى. سوڭعى كۇيەۋلەرىنە ءۇش قىز بەن ءبىر ۇل ءسۇيدىرىپ، كوپ بالالى انا اتاندى.

تەك 2024 جىلى عانا كاسىپكەرلەر – مەدعات قاليەۆ پەن نۇرلان بيمۋرزين جۋرناليستەرگە وزدەرىنە جانە ولاردىڭ بيزنەسىنە 20 جىلدان استام ۋاقىت بۇرىن نە بولعانىن ايتىپ بەرۋگە بەل بۋدى. اتاپ ايتقاندا، ەلدەگى ءىرى جانارماي قۇيۋ ستانسالارى مەن مۇناي بازالارىنىڭ ءبىرى بولعان «ازيا» قتك-نى رەيدەرلىك باسىپ الۋ تۋرالى تۇڭعىش رەت ءسوز بولىپ، ءاليانىڭ ەسىمى جاريا ەتىلدى. بيزنەسمەندەردىڭ ايتۋىنشا، 2002 جىلى كومپانيانى قازاقستاننىڭ تۇڭعىش پرەزيدەنتىنىڭ كىشى قىزى ءاليا نازارباەۆا قولىنا تۇسىرگەن. ءاليا ەكى اپكەسىندەي ەمەس، قاي جەردەن قالاي قاعۋدى ءھام پايداسى شاش ەتەك بيزنەستى قالاي تارتىپ الۋدى راحات جەزدەسىنەن ارتىق مەڭگەردى.

ءاليا حانشايىم بوي كورسەتەن ەكىنشى ەپيزود – قالدىق وندىرۋگە بايلانىستى. ياعني، «وكم وپەراتورىنا» قاتىستى.

«وكم وپەراتورى» نەمەن اينالىستى؟ قر-داعى «وكم وپەراتورى» كادەگە جاراتۋ تولەمدەرىن جيناۋ بويىنشا ايرىقشا قۇقىققا يە بولدى: اقشا تىكەلەي «وكم وپەراتورىنىڭ» شوتىنا اۋدارىلىپ وتىردى. سودان كەيىن كومپانيا ولاردى بولەدى. «وكم وپەراتورى» قوقىستى بولەك جيناۋ ينفراقۇرىلىمىن قۇرىپ، كادەگە جاراتۋ تولەمدەرىنىڭ ءبىر بولىگىن وتاندىق اۆتووندىرۋشىلەرگە جانە قورشاعان ورتانى بۇزاتىن اۆتوقاپتاردى، قاپتامالاردى، پايدالانىلعان مايلاردى جانە باسقا دا قالدىقتاردى «اننيگيلياتسيالايتىن» كومپانيالارعا بەرۋى ءتيىس ەدى.

«وكم وپەراتورى» جشس-ءنىڭ ءبىرىنشى قۇرىلتايشىسى ءاليا نازارباەۆا بولدى. 2022 جىلعى قاڭتاردا «وكم وپەراتورى» جشس اكتيۆتەرى مەملەكەت مەنشىگىنە بەرىلدى.

«ءاليا نازارباەۆا مەنى قارعىباۋلى يتتەي ۇستادى»، - دەدى سوتتا «وكم وپەراتورىنىڭ» ەكس-ديرەكتورى. 2022 جىلعى 28 قاڭتاردا قر ەكولوگيا، گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ پەن «وكم وپەراتورى» جشس باسقارما توراعاسى مەدەت قۇمارعاليەۆ استانا مامانداندىرىلعان اۋدانارالىق تەرگەۋ سوتىنىڭ سانكتسياسىمەن ەكى اي مەرزىمگە قاماۋعا الىندى.

سوتتالۋشىلار ورىندىعىندا بۇل ەكەۋىمەن بىرگە بۇرىنعى قارجى ديرەكتورى رۋستام تەمىربەك جانە «وكم وپەراتورى» ەكس-باس ديرەكتورى، ۋكراينا ازاماتى سۆەتلانا كوروتەنكو بولدى.

«وكم وپەراتورى» جشس 2015 جىلعى 23 قاراشادا جالعىز قاتىسۋشى - ءاليا نازارباەۆانىڭ شەشىمىمەن قۇرىلدى، ول دا ناقتى قۇرىلتايشى بولىپ تابىلادى.

كاسىپكەرلىگى اپكەلەرىنەن اسقان ءاليا قازاق جادىسىندا ازىرشە جۇرت بىلەتىن وسىنداي بيزنەس سايقالدىعىمەن قالىپ وتىرعان جايى بار.

Abai.kz