ءىس-شارانى استاناداعى ەقىۇ باعدارلامالار كەڭسەسىمەن، ورتالىق ازيا ەلدەرىندەگى ەقىۇ ورتالىقتارى مەن ميسسيالارى جانە ۆەناداعى ەقىۇ حاتشىلىعىمەن سەرىكتەستىكتە قازاقستان رەسپۋبليكاسى قورعانىس مينيسترلىگىنىڭ قارۋ-جاراقتى باقىلاۋ جانە ينسپەكتسيالاردى قامتاماسىز ەتۋ ورتالىعى ۇيىمداستىردى.

قر قورعانىس مينيسترلىگىنىڭ بىتىمگەرلىك وپەراتسيالار ورتالىعىندا وتكەن سەمينارعا قازاقستاندىق اسكەري قىزمەتشىلەردەن باسقا ازەربايجان، گەرمانيا، دانيا، يتاليا، قىرعىزستان، موڭعوليا، بەنيليۋكس ەلدەرى، اقش، تاجىكستان، تۇرىكمەنستان جانە فرانتسيا قارۋلى كۇشتەرىنىڭ وكىلدەرى قاتىستى.

سۋرەت: gov.kz سايتىنان الىندى.

سەميناردا 2011 جىلعى ۆەنا قۇجاتىنىڭ نەگىزگى ەرەجەلەرى، ينسپەكتسيالىق جانە حابارلامالىق قىزمەت پەن ولاردى پراكتيكادا قولدانۋ تالقىلاندى.

– مۇنداي سەمينارلاردى وتكىزۋ ورتالىق ازيا ءوڭىرى ەلدەرى اراسىنداعى سەنىم مەن قاۋىپسىزدىك شارالارىن نىعايتۋ قاعيداتتارىن ىسكە اسىرۋ سالاسىنداعى ىنتىماقتاستىقتىڭ نەگىزگى نىساندارىنىڭ ءبىرى، – دەپ اتاپ ءوتتى قر قورعانىس مينيسترلىگى قارۋ-جاراقتى باقىلاۋ جانە ينسپەكتسيالاردى قامتاماسىز ەتۋ ورتالىعىنىڭ باستىعى پولكوۆنيك قانات اۋباكىروۆ.

ءىس-شاراعا قاتىسۋشىلار ەقىۇ-نىڭ اسكەري-ساياسي ولشەمىنە، ۆەنا قۇجاتىنىڭ ەرەجەلەرىن ورىنداۋعا، جىل سايىن اسكەري اقپارات الماسۋعا، ەقىۇ بايلانىس جەلىسىنە، ۇيىمعا مۇشە ەلدەردىڭ ءوزارا ينسپەكتسيالىق قىزمەتىن قامتاماسىز ەتۋگە قاتىستى نەگىزگى تاقىرىپتارمەن تانىستى.

سۋرەت: gov.kz سايتىنان الىندى.

ۆەنا قۇجاتىنىڭ ەرەجەلەرىنە سايكەس سەميناردىڭ پراكتيكالىق بولىمىندە قوناەۆ قالاسىنداعى 35-ءشى گۆارديالىق دەسانتتىق-شابۋىلداۋ بريگاداسىن باعالاۋ جونىندە وقۋ ساپارى ۇيىمداستىرىلدى.

ۆەنا قۇجاتى – ەقىۇ قىزمەتىنىڭ ادەتتەگى قارۋ-جاراق تۇرلەرىن باقىلاۋ بويىنشا ەلدەر اراسىنداعى ىنتىماقتاستىق، ايقىندىق جانە تەكسەرۋ رەجيمىن ساقتاۋعا نەگىزدەلگەن پارمەندى قۇرالدارىنىڭ ءبىرى.

Abai.kz