ادىلەت دەپارتامەنتىنىڭ قىزمەتكەرلەرى №32 كىتاپحاناعا ارنايى بارىپ، قازاق حالقىنىڭ ۇلى اقىنى، ويشىلى جانە اعارتۋشىسى اباي قۇنانبايۇلىنىڭ رۋحاني مۇراسىمەن تەرەڭىرەك تانىستى.

ءىس-شارانىڭ باستى ماقساتى – مەملەكەتتىك قىزمەتشىلەردىڭ رۋحاني-مادەني دامۋىنا ىقپال ەتۋ، ۇلتتىق قۇندىلىقتاردى دارىپتەۋ، سونداي-اق اباي شىعارمالارى ارقىلى ادىلەت، ادامگەرشىلىك، ادالدىق ۇعىمدارىنىڭ ماڭىزىن ارتتىرۋ بولدى.

كەزدەسۋ بارىسىندا كىتاپحانا قىزمەتكەرلەرى اباي قۇنانبايۇلىنىڭ ءومىر جولى مەن شىعارماشىلىعى تۋرالى مازمۇندى بايانداما جاساپ، اقىننىڭ ولەڭدەرى مەن قارا سوزدەرىندەگى تەرەڭ فيلوسوفيالىق ويلارمەن ءبولىستى. قاتىسۋشىلار ابايدىڭ اسىرەسە ادامگەرشىلىك، ادىلدىك، پاراساتتىلىق تۋرالى ايتقان ويلارىنا ەرەكشە نازار اۋدارىپ، ولاردى قازىرگى قوعاممەن بايلانىستىرا وتىرىپ تالقىلادى.

سونىمەن قاتار، ءىس-شارا اياسىندا كىتاپ كورمەسى ۇيىمداستىرىلىپ، اباي شىعارمالارىن تانىستىرۋ ماقساتىندا ارنايى ادەبي شولۋ جاسالدى. قىزمەتكەرلەر ابايدىڭ قارا سوزدەرىنەن ۇزىندىلەر وقىپ، ولاردىڭ قۇقىقتىق جانە ەتيكالىق تۇرعىدا ءمان-ماڭىزىن تالداپ، ءوزارا پىكىر الماستى.

بۇل كەزدەسۋ تەك مادەني ءىس-شارا عانا ەمەس، مەملەكەتتىك قىزمەتشىلەردىڭ كاسىبي-ەتيكالىق ۇستانىمدارىن نىعايتۋعا، ادىلدىك پەن جاۋاپكەرشىلىك قاعيداتتارىن تەرەڭ ۇعىنۋعا سەپتىگىن تيگىزدى. قاتىسۋشىلار اباي مۇراسىنىڭ بۇگىنگى كۇنگى وزەكتىلىگىن اتاپ ءوتىپ، مۇنداي تانىمدىق شارالاردىڭ ماڭىزدىلىعىن جوعارى باعالادى.

Abai.kz