الەۋمەتتىك جەلىدە: «سەندەر مەملەكەتتىك توڭكەرىستى دە ءبىزسىز توقتاتا المادىڭدار»، – دەگەن رەسەيلىك كاسىپكەردىڭ كوفەحاناسىنا قازاقستان حالقى بايكوت جاريالادى. بۇل تۋرالى Mezgil.kz اقپاراتتىق پورتالى جازدى. 

اۋەلى الەۋمەتتىك جەلىدە «Smart Coffee» فرانشيزاسىنىڭ يەسى ەۆگەني گلينسكيدىڭ 2022 جىلدىڭ قاڭتارىنداعى وقيعالار تۋرالى پىكىرى پايدا بولدى.

بولعان وقيعا: قازاقستاندا «Smart Coffee» دەيتىن كوفەحانالار جەلىسىنىڭ فرانشيزاسى جۇمىس جاسايدى. ونىڭ يەسى – ەۆگەني گلينسكي دەگەن رەسەيلىك كاسىپكەر. سول گلينسكيدىڭ جەلىدەگى اككاۋنتىنان قازاقستاندا 2022 جىلدىڭ قاڭتارىندا بولعان قاندى وقيعا تۋرالى پىكىر پايدى بولدى. وندا: «ءيا، اتپەن كۇتىپ الاسىڭدار ما؟ سەندەر ءوز ەلدەرىڭدەگى مەملەكەتتىك توكەرىستى دە ءبىزسىز توقتاتا المادىڭدار؟ سوعىس»، - دەپ جازىلعان.

وسىدان سوڭ، قازاقستان ازاماتتارى «Smart Coffee-گە» جاپپاي بايكوت جاريالاۋدى باستاپ كەتتى. حالىق قازاقستانداعى 2022 جىلدىڭ قاندى قاڭتارىنداعى وقيعا كەزىندەگى ۇقشۇ ءرولى تۋرالى ايتىلعان پىكىرگە نارازى. سول سەبەپتى دە، حالىق كوفەحانالارعا جاپپاي بويكوت جاريالاۋعا جانە ولاردىڭ 2GIS جۇيەسىندەگى رەيتينگتەرىن تومەندەتۋگە شاقىرۋدا. قازاقستاندىقتار جاعىمسىز پىكىرلەر قالدىرىپ، ادامداردى Smart Coffee ونىمدەرىن ساتىپ الماۋعا شاقىرۋدا.

ال گلينسكيدىڭ ءوزى نە دەيدى؟ گلينسكي: «مۇنداي پىكىردى مەن جازبادىم»، - دەپ اقتالا سويلەپ، الەۋمەتتىك جەلىدەگى اككاۋنتىنا شابۋىل جاسالعانىن ايتادى. ول سونداي-اق، قازاقستان حالقىنا جانە قاڭتار وقيعاسىنا قۇرمەتپەن قارايتىنىن ايتىپ، كوپشىلىك الدىندا كەشىرىم سۇرايدى.

تاقىرىپقا تۇزدىق: بۇعان دەيىن استاناداعى «Qazaq Coffee» كوفەحاناسى قازاق تىلىندە اس ءمازىرىن بەرۋدەن باس تارتقانى ءۇشىن قوعام نارازىلىعىنا ۇشىراعان. حالىق جاپپاي بايكوت جاريالاپ، ارتىنشا «Qazaq Coffee» كوفەحاناسى جابىلىپ تىنعان.

ەندى مىنە، اڭىرەڭدەپ سويلەپ، الەۋمەتتىك جەلىنى شۋلاتقان گلينسكيدىڭ دە كوفە بيزنەسى «Qazaq Coffee-ءنىڭ» تاعدىرىن قايتالايتىن ءتۇرى بار...

Abai.kz