بۇگىن جەتىسۋ وبلىسىندا وتان قورعاۋشىلار كۇنىنە ارنالعان سالتاناتتى شارا ءوتتى. وسى جيىندا استانا قالاسىندا قازاقستان رەسپۋبليكاسىنىڭ پرەزيدەنتتىڭ قاتىسۋىمەن وتكەن باس اسكەري شەرۋدىڭ تىكەلەي ەفيرىن جەتىسۋلىقتار تالدىقورعاننىڭ ورتالىق الاڭىندا LED ەكران ارقىلى تاماشالادى. سول سياقتى وبلىس كۇنى 30 جاس ساربازدى سالتاناتتى جاعدايدا اسكەر قاتارىنا شىعارىپ سالدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

مەرەكەلىك شارالارعا وبلىس اكىمى بەيبىت يساباەۆ، تىل ەڭبەككەرلەرى، قر قارۋلى كۇشتەرىنىڭ ارداگەرلەرى، وبلىستىق، قالالىق ارداگەرلەر كەڭەسىنىڭ مۇشەلەرى، اۋعان سوعىسىنىڭ ارداگەرلەرى، چەرنوبىل اپاتىنىڭ زاردابىن جويۋعا قاتىسقاندار مەن سەمەي پوليگونىنىڭ ارداگەرلەرى جانە تجالپى سانى 200-گە جۋىق ادام قاتىستى.

جينالعان كوپشىلىك الدىندا وبلىس اكىمى بەيبىت يساباەۆ ءسوز سويلەپ، وتان قورعاۋشىلار مەرەكەسىمەن قۇتتىقتادى.

- بۇگىنگى 7 مامىر – وتان قورعاۋشىلار كۇنىمەن بارشاڭىزدى شىن جۇرەكتەن قۇتتىقتايمىن. بيىل ۇلى وتان سوعىسىنداعى جەڭىسكە 80 جىل تولىپ وتىر. ءبىز اعا ۇرپاقتىڭ اسقاق رۋحىنا باس يەمىز. بارشا مايدانگەرلەردىڭ ەسىمى مەن ەرلىگى حالىقتىڭ ەسىندە ماڭگى ساقتالادى. وتان – قاستەرلى ۇعىم. ونى قورعاپ، تىنىشتىعى مەن قاۋىپسىزدىگىن قامتاماسىز ەتۋ – ءبىزدىڭ ارميا مەن باسقا دا كۇشتىك قۇرىلىمداردىڭ باستى مىندەتى. بۇگىن داڭقتى بابالارىمىزدىڭ بەرىك ءداستۇرىن جالعاستىرعان جاس ساربازداردى سالتاناتتى جاعدايدا اسكەر قاتارىنا شىعارىپ سالىپ تۇرمىز. ساربازداردىڭ اسكەري قىزمەتىنە تابىس، بارشاڭىزعا مىقتى دەنساۋلىق، بەيبىت تە بەرەكەلى عۇمىر تىلەيمىن! – دەدى ب. يساباەۆ.

مۇنان سوڭ جاس ساربازدار اسكەر قاتارىنا جونەلتىلدى. بۇدان ءارى مەرەكە اسكەريلەردىڭ قويىلىمىمەن جانە وتان قورعاۋشىلار كۇنىنە ارنالعان مەرەكەلىك كونتسەرتپەن جالعاستى.

وسى كۇنى تالدىقورعان اسكەري گارنيزونىنىڭ № 21751 اسكەري ۇشقىشتار بولىمشەسىنىڭ «جەتىسۋ بارىسى» ۇشقىشتارى ورتالىق الاڭنىڭ اۋە كەڭىستىگى ارقىلى ۇشىپ ءوتتى. اتاپ وتسەك، ۇشقىشتاردىڭ وسى قۇرامى استانا قالاسىندا وتكەن باس اسكەري شەرۋدە دە ونەر كورسەتكەن بولاتىن.

مەرەكەلىك ءاس-شارالاردى تاماشالاعانداردىڭ ىشىندە تالدىقورعان قالاسىنىڭ تۇرعىنى ايتبەك اۋباكىروۆ تە بار.

- مەن سەمەي سىناق پوليگونىنىڭ ارداگەرىمىن. بۇگىنگى مەرەكەلىك شارالاردى كورۋگە اسكەردە بىرگە بولعان بىرنەشە جولداسىممەن بىرگە كەلدىك. استانادان تىكەلەي ەفيرد ارقىلى بەرىلگەن پاراد، تالدىقورعانداعى ساحنادان كورسەتىلگەن وتانشىلدىققا ۇندەيتىن تاماشا كورىنىستەر وتە اسەرلى بولدى. جەرگىلىكتى كۇشتىك قۇرىلىمداردىڭ اسكەري دايىندىعىنا كۋا بولدىق. وسكەلەڭ ۇرپاق ءبىز كورگەن قيىندىقتاردى كورمەي، ەلىمىزدە ارقاشان بەيبىت ءومىر بولسىن. بۇل مەرەكە جاستاردىڭ ەلجاندى بولىپ وسۋىنە، قاجىر-قايراتىن شىڭداۋعا ىقپال ەتەدى دەپ ويلايمىن، - دەيدى ول.

بۇگىن ورتالىق الاڭعا تالدىقورعانداعى باقتىباي جولبارىسۇلى اتىنداعى № 18 مەكتەپ-ليتسەيدىڭ كادەت سىنىبىنىڭ وقۋشىلارى دا ارنايى كەلگەن. سولاردىڭ ءبىرى 7 «ب» سىنىپ وقۋشىسى اياۋلىم اقمولداەۆا:

- كادەت سىنىبىندا وقىپ جۇرگەنىمدى ماقتان تۇتامىن. ءبىز پايدالى ءبىلىم الىپ، فيزيكالىق دايىندىعىمىزدى جاقسى شىڭداپ جاتىرمىز. مارشپەن ءجۇرۋدى، اۆتومات قۇرىلىمىن، اتۋ دايىندىعىن، باسقا دا قاجەتتى ماشىقتاردى مەڭگەرىپ ءجۇرمىز. الداعى ۋاقىتتا بولاشاعىمدى اسكەري سالامەن بايلانىستىرعىم كەلەدى. بۇگىنگى مەركەلىك شارالاردا اسكەري بولىمدەردىڭ كاسىبي ونەرىن كورىپ، ءوزىمنىڭ بولاشاق تاڭداۋىما دەگەن سەنىمىم ەسەلەنە ءتۇستى، - دەيدى ول.

ەسكە سالساق، تالدىقورعاندا وتان قورعاۋشىلار كۇنىنە ارنالعان مەرەكەلىك كونتسەرت كەشكى ۋاقىتتا دا جالعاسادى.

Abai.kz