استانادا وسى كۇندەرى تمد ەلدەرى مەن جاقىن شەت مەملەكەتتەردەن جەتەكشى مەديتسينالىق ساراپشىلار، تانىمال كلينيتسيستەر، زەرتتەۋشىلەر مەن پروفەسسورلار جينالىپ، ەۋرازيالىق شۇعىل مەديتسينا قوعامداستىعىنىڭ III سەزىنىڭ شەڭبەرىندە ءوتىپ جاتقان «شۇعىل مەديتسينانى دامىتۋدىڭ زاماناۋي تۇجىرىمدامالارى مەن پەرسپەكتيۆالارى» اتتى حالىقارالىق كونفەرەنتسياعا قاتىسۋدا.

فورۋمنىڭ كۇن تارتىبىندە شۇعىل مەديتسينالىق كومەكتى ۇيىمداستىرۋ، زاماناۋي تەحنولوگيالاردى ەنگىزۋ جانە ەمدەۋگە جاتقىزۋعا دەيىنگى كەزەڭدە كومەك كورسەتۋدىڭ تيىمدىلىگىن ارتتىرۋ ماسەلەلەرى قارالۋدا.

«قازاقستان – اۋماعى كەڭ، حالقى اركەلكى قونىستانعان ەل، بۇل شۇعىل مەديتسينالىق كومەكتى كورسەتۋگە ەرەكشە جاعداي تۋعىزادى. ءبىز زاماناۋي لوگيستيكالىق مودەلدەردى، تەلەمەديتسينا شەشىمدەرىن ەنگىزىپ، مامانداردىڭ بىلىكتىلىگىن ارتتىرۋ باعىتىندا بەلسەندى جۇمىس ىستەپ جاتىرمىز. ەڭ ماڭىزدى باسىمدىقتاردىڭ ءبىرى – قولجەتىمسىز وڭىرلەردەن پاتسيەنتتەردى دەر كەزىندە ەۆاكۋاتسيالاۋعا مۇمكىندىك بەرەتىن مەديتسينالىق اۆياتسيانى دامىتۋ بولىپ تابىلادى»، – دەدى كونفەرەنتسيانىڭ اشىلۋىندا قر دەنساۋلىق ساقتاۋ ۆيتسە-ءمينيسترى تيمۋر مۋراتوۆ.

پانەلدىك سەسسيالار بارىسىندا وزبەكستاندىق ارىپتەستەر شۇعىل مەديتسينالىق كومەك جۇيەسىندەگى كوپ جاراقاتتار مەن جۇرەك-قانتامىر پاتولوگيالارى بويىنشا اۋدانارالىق ورتالىقتاردىڭ جۇمىسىن ۇيىمداستىرۋ تاجىريبەسىمەن ءبولىستى، س.ج.اسفەندياروۆ اتىنداعى ۇلتتىق مەديتسينا ۋنيۆەرسيتەتىنىڭ جەدەل مەديتسينالىق كومەك كافەدراسىنىڭ پروفەسسورى، مەديتسينا عىلىمدارىنىڭ دوكتورى ابدۋعاني مۇساەۆ الماتى قالاسىندا موپەدتەر قاتىسقان جول-كولىك وقيعالارىنان كەيىنگى جەدەل مەديتسينالىق كومەكتىڭ ءرولى تۋرالى بايانداما جاسادى، رەسەي فەدەراتسياسىنىڭ ۇلتتىق سانيتاريالىق اۆياتسيا قىزمەتىنىڭ باس دارىگەرى اندرەي پەرەۆەدەنتسەۆ جۇرەك-وكپە رەانيماتسياسىنىڭ زاماناۋي تەحنولوگيالارى مەن وسى باعىتتىڭ دامۋ بولاشاعى جايلى بايانداما وقىدى، سولتۇستىك قازاقستان وبلىسىنىڭ جەدەل مەديتسينالىق كومەك قىزمەتىنىڭ ديرەكتورى يۋري بەلونوگ بەينەتىركەگىش قۇرىلعىلارىن پايدالانۋ تاجىريبەسىمەن ءبولىستى.

كونفەرەنتسيا الاڭىندا سانيتاريالىق اۆياتسيانى دامىتۋ، رەانيماتسيالىق ءىس-شارالارعا يننوۆاتسيالىق كوزقاراس جانە شۇعىل مەديتسينالىق قىزمەت ماماندارىنىڭ جۇمىسىن قۇقىقتىق رەتتەۋ ماسەلەلەرىنە ەرەكشە نازار اۋدارىلۋدا.

«شۇعىل مەديتسينالىق كومەكتى دامىتۋ – دەنساۋلىق ساقتاۋ سالاسىنداعى مەملەكەتتىك ساياساتتىڭ باسىم باعىتتارىنىڭ ءبىرى. ءبىز حالىقارالىق ىنتىماقتاستىققا، زاماناۋي تەحنولوگيالاردى ەنگىزۋگە، كادر دايارلاۋدى جەتىلدىرۋگە جانە ءاربىر ازامات ءۇشىن شۇعىل كومەكتىڭ ساپاسى مەن قولجەتىمدىلىگىن ارتتىرۋعا مۇددەلىمىز. كونفەرەنتسيا ناتيجەلەرى قازاقستانداعى جەدەل مەديتسينالىق كومەك جۇيەسىن ودان ءارى نىعايتۋعا نەگىز بولادى دەپ سەنەمىن»، – دەدى ۆيتسە-مينيستر.

Abai.kz