استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ «Jibek Joly» تەلەارناسىنداعى جۋرناليست ەربولات مۇحامەدجان جۇرگىزەتىن «ۋادە» اۆتورلىق باعدارلاماسىنا سۇحبات بەردى. سۇحبات بارىسىندا ول حح عاسىردىڭ العاشقى جارتىسىندا ورىن العان ساياسي قۋعىن-سۇرگىن مەن اشارشىلىقتاردىڭ سەبەپتەرى تۋرالى ءوز پىكىرىن ءبىلدىردى.

«نەگىزى 30-جىلداردىڭ ورتاسىندا قوعامنىڭ بۇعاناسى سىندىرىلدى عوي. ول بۇرىنعىنى اڭسايتىنداردىڭ كوبىسىن سىندىرىپ، قۋعىن-سۇرگىنگە ۇشىراتتى. وزىق ويلىلاردى قىرىپ جىبەردى. ول جۇيەنى ءالى دە ءبىز مىنا قۋعىن-سۇرگىن كۇنىندە ەسكە الىپ جاتامىز عوي. 20-شى جىلمەن 40-شى جىلدىڭ اراسىندا كورگەن تامۇقتى ءالى كوپشىلىك تولىق كوز الدىنا ەلەستەتە المايدى. ول ۋاقىتتا 5-6 دۇركىن قۋعىن-سۇرگىن بولدى،» – دەدى سپيكەر.

ءاليحان بايمەنوۆ سول كەزەڭدەگى ساياسي رەپرەسسيالاردىڭ بىرنەشە تولقىنىن اتاپ ءوتتى. ونىڭ ايتۋىنشا، قۋعىن-سۇرگىن الدىمەن الاش قوزعالىسىنا جاقىن ازاماتتاردى قامتىدى. ودان كەيىن مادەني ۋنيفيكاتسياعا قارسى ءدىنباسىلار، جوعارى ءبىلىمى بار، ىسكەر ادامدار، شىعارماشىل تۇلعالار قۋعىندالدى.

«باي دەگەن ۇعىم تەرىس ۇعىم بولىپ شىقتى. مولدا دەگەن ۇعىم تەرىس بولدى. الاش دەگەن ۇعىم تەرىس بولدى. الاشتىڭ قايراتكەرلەرىنىڭ اتى اتالمادى. مەن قاتارلىلاردىڭ ىشىندە مەنىمەن اتتاستار وتە سيرەك. نەگە؟ ويتكەنى ول بوكەيحانوۆتىڭ اتىمەن اتتاس بولعاندىقتان ونى اتاۋعا قورىقتى,» – دەدى ول.

سۇحبات بارىسىندا بايمەنوۆ حالىقتىڭ كوزى اشىلىپ، بيلىككە سەنگەن، بىراق كەيىننەن سول سەنىمىنىڭ قۇربانى بولعان تۇلعالاردى دا اتاپ ءوتتى.

«حالىققا ىقپال جاساي الادى دەگەن تۇلعالاردىڭ بارىنە – اقىن، جازۋشىلار، ونەر قايراتكەرلەرى – قۋعىن جاسالدى. مىنە، وسىنىڭ بارلىعىن العاندا 5-6 دۇركىن قۋعىن-سۇرگىن بولدى. اراسىندا 2 رەت اشارشىلىق بولدى. ول اشارشىلىقتاردىڭ نەگىزىندە سولاقاي ەكونوميكالىق ساياسات جاتىر،» – دەپ قورىتىندىلادى ءاليحان بايمەنوۆ.

سۇحباتقا سىلتەمە:

Abai.kz