پاۆلودار وبلىسىنداعى №46 تۇزەۋ مەكەمەسىندە جازاسىن وتەپ جاتقان

"اتامەكەن" ۇكپ-نىڭ بۇرىنعى توراعاسى ابىلاي مىرزاحمەتوۆ شارتتى تۇردە مەرزىمىنەن بۇرىن بوساتۋدى سۇراپ وتىر، دەپ مالىمدەدى پاۆلودار وبلىستىق سوتىنىڭ ءباسپاسوز قىزمەتى.

"بۇل ءوتىنىش ءالى قارالعان جوق", – دەپ مالىمدەدى پاۆلودار وبلىستىق سوتىنىڭ ءباسپاسوز قىزمەتى وكىلدەرى.

ءبىر اپتا بۇرىن باس پروكۋراتۋرا وسى كولونيادا تۇسىرىلگەن بەينەماتەريالدى جاريالادى. وندا بيگ-بەگ قاپتارىن شىعاراتىن ءوندىرىس ىسكە قوسىلعانى كورسەتىلگەن.

ۆەدومستۆونىڭ مالىمەتىنشە، جاڭا ءوندىرىس №46 تۇزەتۋ مەكەمەسىندە ىسكە قوسىلعان. قاجەت جابدىقتار مەن جۇمىس ورىندارىن كاسىپكەرلەر قامتاماسىز ەتكەن.

"ەڭبەك ارقىلى تاربيەلەۋ ساياساتى اياسىندا سوتتالعانداردىڭ كوپشىلىگى جۇمىسپەن قامتىلىپ، وسىلايشا تۇزەلۋگە نيەتى بارىن كورسەتىپ ءجۇر. بىلتىر قىركۇيەكتەن باستاپ ءبىز ءبىر توپ سوتتالۋشىنى ۇيىمداستىرىپ، ينۆەستور تاپتىق. سونىڭ ارقاسىندا 6 اي ىشىندە 120 جۇمىس ورنىن اشتىق", - دەيدى بەينەجازبادا ابىلاي مىرزاحمەتوۆ.

پاۆلودار وبلىسى پروكۋراتۋراسىنىڭ مالىمەتىنشە، سوتتالعان ەكس-توراعا بىرنەشە تىگىن ماشيناسىن ءوز قاراجاتىنا ساتىپ الىپ، قازىر باسقا دا جۇمىسقا ورنالاستىرىلعان سوتتالۋشىلارمەن بىرگە قاپ تىگۋمەن اينالىسادى. مينيمالدى جالاقىدان بولەك، سىياقى مەن بونۋستار جۇيەسى دە قاراستىرىلعان.

ايتا كەتەيىك، "اتامەكەن" ۇكپ-نىڭ بۇرىنعى توراعاسى ابىلاي مىرزاحمەتوۆ الاياقتىق جاسادى جانە كاسىپكەردى ءوزىنىڭ تۋىسىن قىلمىستىق جاۋاپكەرشىلىكتەن بوساتۋعا كومەكتەسۋ ءۇشىن اسا ءىرى كولەمدە پارا بەرۋگە يتەرمەلەدى دەگەن كۇدىككە ىلىنگەن بولاتىن.

2024 جىلعى مامىردا ول اسا ءىرى كولەمدەگى الاياقتىق جاساعانى ءۇشىن كىنالى دەپ تانىلىپ، 5 جىلعا سوتتالدى.

بيىل قاڭتاردا ول جازانىڭ قالعان بولىگىن بوستاندىعىن شەكتەۋ جازاسىنا اۋىستىرۋدى سۇرادى. الايدا بۇل ءوتىنىشتى سوت قاناعاتتاندىرمادى. سوت شەشىمىندە جازاسىن وتەۋ كەزىندە مىرزاحمەتوۆ ەڭبەككە ادال قاراعانى ءۇشىن تەك ءبىر عانا ماداقتاما العانى كورسەتىلگەن.

Abai.kz