الماتىدا كوپ بالالى انالار مەن از قامتىلعان وتباسىلاردى قولداۋعا ارنالعان «وتباسىن قولداۋ» ورتالىقتارى جۇمىس ىستەيدى. مۇنداي ورتالىقتاردىڭ ماقساتى — انا مەن بالانىڭ ءومىرىن جاقسارتۋعا ۇلەس قوسۋ. Abai.kz ءتىلشىسى الماتى قالاسى ناۋرىزباي اۋداندىق «وتباسىن قولداۋ» ورتالىعىنا باس سۇعىپ، ورتالىقتىڭ جۇمىسىمەن تانىستى. 

«وتباسىن قولداۋ» ورتالىعىنىڭ جەتەكشىسى مارتا قۇرماناليقىزى وتكەن جىلى ناۋرىزباي اۋدانىنداعى ورتالىققا 18 680 كوپ بالالى جانە از قامتىلعان وتباسى كەلگەنىن ايتادى. ولارعا الەۋمەتتىك، زاڭ، مەديتسينالىق، تۇرعىن ءۇي، پسيحولوگيالىق جانە تەگىن ءبىلىم بەرۋ باعدارلامالارى بويىنشا 1753 قىزمەت ءتۇرى كورسەتىلگەن. ال ورتالىقتىڭ بايلانىس تەلەفونى ارقىلى 1494 ادام كەڭەس الىپتى. 

ورتالىق باسشىسىنىڭ ايتۋىنشا، مۇنداعى انالارعا زاڭ، پسيحولوگيالىق، الەۋمەتتىك-پەداگوگيكالىق، ءبىلىم بەرۋ جانە باسقا دا ماسەلەلەر بويىنشا اقپاراتتىق-كونسۋلتاتسيالىق قىزمەت كورسەتىلىپ، بۇل قىزمەت 6607 ادامدى قامتىعان. 

«وتباسىن قولداۋ ورتالىعى» كوپ بالالى جانە از قامتىلعان وتباسىلاردىڭ ءال-اۋقاتىن جاقسارتۋ، دەمەۋشىلىك كومەك كورسەتۋگە جانە قيىن ومىرلىك جاعدايدان شىعۋعا ءۇشىنشى تۇلعالاردى تارتۋ بويىنشا ءتيىمدى جۇمىس جۇرگىزەدى. ورتالىقتا بىلتىر 208 كوپ بالالى جانە تۇرمىسى تومەن وتباسىلارعا ازىق-تۇلىك سەبەتى مەن كيىم-كەشەك تۇرىندە دەمەۋشىلىك كومەك كورسەتىلىپ، 96 بالا بالالاردىڭ ويىن-ساۋىق ورتالىقتارىنا، ساياباقتار مەن ويىن زالدارىنا جىبەرىلگەن. 

مارتا قۇرماناليقىزى ورتالىق اتقارعان ءىس-شارالارعا توقتالىپ ءوتتى:

«وتباسى ينستيتۋتىن جانە وتباسىلىق تاربيەنى ۇيىمداستىرۋدى قولداۋ ماقساتىندا «وتباسىن قولداۋ» ورتالىعىندا بالالارعا «براۆيسسيمو» تسيركى وتكىزىلدى. انالارعا ارنالعان «ستيليستەردىڭ قۇپيالارى نەمەسە ستيليست جۇلدىز ەرقاناتقىزىمەن بىرگە ءوز بەت-بەينەسىن ەسكەرە وتىرىپ، كيىمدى قالاي تاڭداۋ كەرەك» دەگەن تاقىرىپپەن ترەنينگ ۇيىمداستىرىلدى. سونداي-اق «پسيحولوگپەن ايەلدەر شەڭبەرى» دوڭگەلەك ۇستەلى وتكىزىلدى. كوپ بالالى انا اسەم سىڭعىباتوۆامەن «YouTube ارناسىن قالاي اشۋعا بولادى» تاقىرىبىندا سەمينار وتكىزىلدى، انالار YouTube ارناسىن قالاي اشۋعا بولاتىنىن، وعان روليكتى قالاي دۇرىس ورنالاستىرۋ كەرەكتىگىن ۇيرەندى. سەمينارعا 15 ادام قاتىستى»، — دەدى. 

بيىل ورتالىق 6450 كوپ بالالى جانە از قامتىلعان وتباسىنا قولداۋ كورسەتكەن. ولارعا الەۋمەتتىك، زاڭ، مەديتسينالىق، تۇرعىن ءۇي، پسيحولوگيالىق جانە تەگىن ءبىلىم بەرۋ باعدارلامالارى بويىنشا 3790 قىزمەت ءتۇرى بەرىلىپتى. ورتالىقتىڭ بايلانىس تەلەفونى ارقىلى 1296 ادام كەڭەس العان. 

سۋرەت: «وتباسىن قولداۋ» ورتالىعىنان الىندى.

ورتالىق جەتەكشىسىنىڭ ايتۋىنشا، الەۋمەتتىك قىزمەتكەرلەر 3176 ادامعا وفلاين رەجيمىندە دە، تەلەفون ارقىلى دا كەڭەستەر بەرىپتى. 

«بىزگە انالار ونلاين تۇردە ەتسق كىلتىن الۋ، كوپ بالالى جانە از قامتىلعان وتباسىلاردى تىركەۋ، ساۋالناما تولتىرۋ، وقىتۋ كۋرستارىنا ءتىزىم جاساۋ، كۋرستار كەستەسىن جاساۋ، تۇرعىن ءۇي الۋعا كەزەككە تۇرۋ، Damubala جۇيەسىندە تىركەلۋ، قۇجاتتاردى قالپىنا كەلتىرۋ سىندى سۇرانىستارمەن بايلانىسادى. ومىردە قيىن جاعدايعا تاپ بولعان 40 وتباسىنا ازىق-تۇلىك سەبەتى تۇرىندە قايىرىمدىلىق كومەك كورسەتىلدى. 672 اناعا زاڭگەرلىك كەڭەس بەرىلدى. نەگىزىنەن نەكەنى بۇزۋ، اليمەنت ءوندىرىپ الۋ، شوتتاردىڭ بۇعاتتالۋىن الىپ تاستاۋ، تۇرعىن ءۇي نەمەسە جەر ۋچاسكەسى كەزەگىنە قويۋ، الەۋمەتتىك جاردەم الۋ، تۇرمىستىق زورلىق-زومبىلىق، قۇجاتتاردى قالپىنا كەلتىرۋ ماسەلەلەرى بويىنشا سۇراقتارعا جاۋاپ بەردى. ءار ءتۇرلى كۋرستار بويىنشا: كومپيۋتەرلىك ساۋاتتىلىق — 68 ادام، ءپىشۋ جانە تىگۋ — 50 ادام، شاشتاراز — 101 ادام، شاش دەپيلياتسياسى — 27 ادام، مانيكيۋر پەديكيۋر — 56 ادام، كىرپىكتى ۇزارتۋ — 17 ادام، ءوزى ۆيزاجيست — 34 ادام، قولونەر — 12 ادام، بەت ماسساج — 22 ادام، كلاسسيكالىق ماسساج — 62 ادام، بالالار ماسساج — 24 ادام، اسپاز كونديتەر — 75 ادام وقىدى. ءتۇرلى ويىن-ساۋىق ورتالىقتارىنا 210 بالا جىبەرىلسە، 54 وتباسىعا قايىرىمدىلىق كومەك كورسەتىلدى»، — دەدى مارتا قۇرماناليقىزى. 

ورتالىقتىڭ كومەگىمەن بيىل 7 ادام تۇراقتى جۇمىسقا، 2 ادام ۋاقىتشا جۇمىسقا تۇرعان. سونىمەن بىرگە «بيزنەس باستاۋ» باعدارلاماسى ارقىلى 400 اەك مەملەكەتتىك گرانتقا قول جەتكىزۋ بويىنشا كوپ بالالى انالارعا ءتۇسىندىرۋ سەمينارى وتكىزىلگەن. 

وسىلايشا كوپ بالالى انالاردى قوعامعا بەيىمدەۋ، الەۋمەتتىك كومەك كورسەتۋ مەن پسيحولوگيالىق قولداۋ كورسەتۋ ماقساتىن كوزدەيتىن ورتالىق جۇمىسىن جەمىستى جۇرگىزىپ وتىر. بۇگىن «وتباسى كۇنىنە» وراي  «وتباسىن قولداۋ ورتالىعىندا ونەرلى بالالار اراسىندا «مەنىڭ وتباسىم»  تاقىرىبىندا سالىنعان سۋرەتتەرگە كونكۋرس ۇيىمداستىرىلدى.  

ءبىز «باقىتتى وتباسى» ورتالىعىنا باس سۇققان كۇنى از قامتىلعان وتباسىلاردىڭ قاتىسۋىمەن قالا كۇنىنە ارنالعان مەرەكەلىك شارا ءوتىپ، ول وتباسىلارعا ازىق-تۇلىك سەبەتى ۇلەستىرىلىپ جاتتى. ورتالىق الداعى ۋاقىتتا دا وتباسى قۇندىلىقتارىن دارىپتەۋگە ارنالعان ءىس-شارالارىن جالعاستىراتىن بولادى. 

ماقپال ماحامەتقىزى

Abai.kz