ناۋرىزباي اۋدانىنداعى وقۋشى ورىندارىنىڭ تاپشىلىعى قالاي شەشىلىپ جاتقانىن اۋدان اكىمى نازيرا توعىزباەۆا الماتى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا بايانداپ بەردى.

«اۋدان تۇرعىندارى ءوسىپ جاتقاندىقتان تەزدەتىپ مەكتەپ پەن بالاباقشا سالۋدى قولعا الدىق. بيىل بۇل ماسەلە بىرتىندەپ شەشىلىپ جاتىر»، - دەدى ول.

بيىل اۋداندا 5 500 ورىندىق 3 جاڭا مەكتەپ اشىلعان. ولار «نۇرلى دالا» تۇرعىن ءۇي كەشەنىندە، سابدەنوۆ كوشەسى مەن «قۇرامىس» شاعىناۋدانىندا ورنالاسقان. سونىمەن قاتار، «Alem City» مەن «الما سيتي-3» تۇرعىن ءۇي كەشەنىنىڭ ماڭىندا ارقايسىسى 1 200 ورىندىق ەكى جاڭا مەكتەپتىڭ، سونداي-اق №174 مەكتەپكە قوسىمشا عيماراتتىڭ قۇرىلىسى اياقتالىپ قالدى. بۇل نىسانداردى 2026 جىلدىڭ ءبىرىنشى توقسانىندا اشۋ جوسپارلانىپ وتىر.

بۇدان بولەك، 2025 جىلى 340 ورىندىق جاتاقحاناسى بار №15 مەكتەپ-ينتەرناتتىڭ قۇرىلىسى دا اياقتالادى.

مەكتەپكە دەيىنگى ءبىلىم بەرۋ بويىنشا اۋداندا 6 مەملەكەتتىك، 162 جەكەمەنشىك بالاباقشا جۇمىس ىستەيدى، وندا شامامەن 11 000 بالا بار.

ورىن تاپشىلىعىن ازايتۋ ماقساتىندا بيىلعى قىركۇيەكتە «شۇعىلا» شاعىناۋدانىندا 320 ورىندىق بالاباقشا اشىلدى. سونىمەن قاتار، جىل سوڭىنا دەيىن «قۇرامىس» پەن «شۇعىلا» شاعىناۋداندارىندا تاعى ەكى 320 ورىندىق بالاباقشا پايدالانۋعا بەرىلسە، 2026 جىلى «قالقامان» شاعىناۋدانىندا 240 ورىندىق بالاباقشا اشىلعالى وتىر.

وسىلايشا، 2025 جىلدىڭ سوڭىنا دەيىن اۋدانداعى مەكتەپكە دەيىنگى مەكەمەلەردە قوسىمشا 880 جاڭا ورىن پايدا بولماق.

Abai.kz