قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ IV تاشكەنت حالىقارالىق ينۆەستيتسيالىق فورۋمىنىڭ پلەنارلىق وتىرىسىندا سويلەگەن سوزىندە ينۆەستيتسيا تارتۋ ەكونوميكانى دامىتۋدىڭ نەگىزگى فاكتورى ەكەنىن اتاپ ءوتتى.

«جاقىندا وتكەن استانا ەكونوميكالىق فورۋمىندا قازاقستان پرەزيدەنتى قاسىم-جومارت توقاەۆ ەلىمىزدىڭ ورتالىق ازيانىڭ تۇراقتىلىعى بەرىك، ىنتىماعى بەكەم، بولاشاعى ايقىن بولعانىن قالايتىنىن ەرەكشە اتاپ ءوتتى. قازاقستان ۇكىمەتى ءوزارا سەنىم مەن ورنىقتى دامۋ رۋحىندا تابىستى جانە ۇزاقمەرزىمدى جوبالار قۇرۋعا دايىن. ينۆەستيتسيا تارتۋ – ءوڭىردىڭ ەكونوميكالىق پاراديگماسىنىڭ نەگىزگى فاكتورى. قازاقستان 2029 جىلعا قاراي ەكونوميكاعا كەمىندە $150 ملرد كولەمىندە شەتەلدىك كاپيتال اعىنىن قامتاماسىز ەتۋدى ماقسات ەتىپ وتىر. بۇل – اۋقىمدى ءارى بارىنشا بيىك ماقساتتار، وعان قول جەتكىزۋگە ابدەن بولادى. ول ءۇشىن ۇلتتىق ەكونوميكانى قۇرىلىمدىق قايتا قۇرۋعا باعىتتالعان اۋقىمدى رەفورمالار تاباندى تۇردە جۇرگىزىلۋدە»، — دەپ اتاپ ءوتتى ولجاس بەكتەنوۆ.

قازاقستاندا ينۆەستورلارعا سالىقتىق جەڭىلدىكتەر، كەدەندىك باجداردان بوساتۋ، زاتتاي گرانتتار بەرۋ، ينفراقۇرىلىممەن قامتاماسىز ەتۋ جانە باسقالارىن قوسا العاندا، يكەمدى جانە جەكەلەگەن پرەفەرەنتسيالار بەرىلەدى. ءىرى ينۆەستورلارمەن باسىم سالالارداعى جوبالاردى جۇزەگە اسىرۋ ءۇشىن 25 جىلعا دەيىن زاڭنامالىق تۇراقتىلىقتى قامتاماسىز ەتەتىن ينۆەستيتسيالار تۋرالى كەلىسىمدەر جاسالادى. دايىن ينفراقۇرىلىممەن جابدىقتالعان، سونداي-اق سالىقتىق جانە كەدەندىك جەڭىلدىكتەر بەرەتىن ارنايى ەكونوميكالىق جانە يندۋستريالىق ايماقتار جۇمىس ىستەيدى. «استانا» حالىقارالىق قارجى ورتالىعىندا بيزنەستى جۇرگىزۋ ءۇشىن بىرەگەي جاعداي جاسالعان. احقو بازاسىندا اعىلشىن قۇقىعى يۋريسديكتسياسىنىڭ بولۋى زاڭدى راسىمدەردىڭ اشىقتىعىنا كەپىلدىك بەرەدى.

سونىمەن قاتار قر پرەمەر-ءمينيسترى ولجاس بەكتەنوۆ ساۋدا-ينۆەستيتسيالىق ىنتىماقتاستىقتى كەڭەيتۋ، ەنەرگەتيكا مەن لوگيستيكاداعى وڭىرلىك ارىپتەستىكتى تەرەڭدەتۋ، ماڭىزدى پايدالى قازبالار سالاسىن دامىتۋ، سونداي-اق تسيفرلاندىرۋ جانە ورنىقتى ءوسۋدى قامتاماسىز ەتۋ ماسەلەلەرىنە نازار اۋداردى. ەنەرگەتيكا سالاسىندا ترانسشەكارالىق جوبالاردى بىرلەسىپ ىسكە اسىرۋ، «جاسىل» ەنەرگيانى ءوندىرۋ مەن بەرۋ پروتسەسىن قوسا العاندا، ءوڭىر ەلدەرى اراسىنداعى ىنتىماقتاستىقتىڭ باسىم باعىتتارى اتالدى. سونداي-اق كولىك-لوگيستيكالىق ينفراقۇرىلىمدى دامىتۋعا، اتاپ ايتقاندا، ترانسكاسپي حالىقارالىق كولىك باعىتى شەڭبەرىندە ءىرى ينۆەستيتسيالىق جوبالاردى جۇزەگە اسىرۋعا نازار اۋدارىلدى. تسيفرلىق ينفراقۇرىلىمدى ترانسفورماتسيالاۋ جانە اسا ماڭىزدى سالالارعا ونىڭ ىشىندە، دەرەكتەر ورتالىقتارىن، ترانسۇلتتىق تالشىقتى-وپتيكالىق جەلىلەر تارتۋ، سۋپەركومپيۋتەرلىك قۋاتتاردى جانە جاساندى ينتەللەكت ەكوجۇيەسىن دامىتۋدى قوسا العاندا، ۇزاقمەرزىمدى ينۆەستيتسيالار تارتۋ قاجەتتىگى اتاپ ءوتىلدى.

وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ قاتىسۋىمەن وتكەن پلەنارلىق وتىرىستا تۇراقتى دامۋ، ينۆەستيتسيالار جانە وڭىرلىك ارىپتەستىك ستراتەگيالارى تالقىلاندى. فورۋمدا بولگاريا پرەزيدەنتى رۋمەن رادەۆ، سلوۆاكيا پرەمەر-ءمينيسترى روبەرت فيتسو، ازەربايجان پرەمەر-ءمينيسترى الي اسادوۆ، قىرعىزستان مينيسترلەر كابينەتىنىڭ توراعاسى ادىلبەك قاسىماليەۆ، تاجىكستان پرەمەر-ءمينيسترى كوحير راسۋلزودا، تۇرىكمەنستان مينيسترلەر كابينەتى توراعاسىنىڭ ورىنباسارى نوكەرگۋلى اتاعۇلىەۆ، رەسەي فەدەراتسياسى ۇكىمەتى توراعاسىنىڭ ورىنباسارى الەكساندر نوۆاك، ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو، بريكس ەلدەرى بانكىنىڭ پرەزيدەنتى ديلما رۋسسەفف ءسوز سويلەدى. سونىمەن قاتار ءىس-شاراعا پرەمەر-مينيسترلەر، حالىقارالىق ۇيىمداردىڭ، جاھاندىق كورپوراتسيالار مەن قارجى ينستيتۋتتارىنىڭ وكىلدەرى قاتىستى.

فورۋمعا قاتىسۋشىلار بۇكىل ءوڭىردىڭ ينۆەستيتسيالىق تارتىمدىلىعىن ارتتىرۋ ءۇشىن ورتالىق ازيا ەلدەرىنىڭ كۇش-جىگەرىن ۇيلەستىرۋدىڭ ماڭىزدىلىعىن اتاپ ءوتتى.

Abai.kz