ءماجىلىس كونستيتۋتسيانىڭ 30 جىلدىعىنا وراي راقىمشىلىق تۋرالى زاڭ جوباسىن ماقۇلدادى، - دەپ جازادى ازاتتىق راديوسى.

وعان سايكەس، راقىمشىلىققا اۋىر ەمەس جانە ورتاشا اۋىر قىلمىس تۇرلەرىن جاساعاندار ىلىنەدى، بىراق شىعىن كولەمى وتەلگەن نەمەسە مۇلدە بولماۋى كەرەك. راقىمشىلىق اياسىندا تۇرمەدەن 662 ادام شىعادى، پروباتسيالىق باقىلاۋداعى 3,5 مىڭ ادام جازادان بوساتىلادى. شامامەن 11 مىڭ ادامنىڭ جازا مەرزىمى قىسقارتىلماق.

وسىلايشا وعان بارلىعى 15 مىڭ ادام ىلىنبەك. بۇعان دەيىن جوبانى ازىرلەۋگە قاتىسقان كەيبىر ادۆوكاتتار جوبادا شەكتەۋ كوپ بولعاندىقتان ونى “گۋمانيستىك اكت” رەتىندە قاراستىرۋعا كەلمەيتىنىن ايتقان ەدى.

رەسمي مالىمەت بويىنشا، قازىر قازاقستاندا قىلمىستىق-اتقارۋ جۇيەسىنە قاراستى 63 مەكەمە مەن 16 تەرگەۋ يزولياتورىندا 40 مىڭنان استام ادام قاماۋدا وتىر: 33 مىڭ سوتتالۋشى جانە 7 مىڭ ادام تەرگەۋ يزولياتورىندا وتىر. 27 مىڭنان استام ادام پروباتسيالىق قىزمەت تىركەۋىندە.

Abai.kz