«كوتەرىلگەن ماسەلە بويىنشا وسى ۋاقىتقا دەيىن بىردە-ءبىر مەملەكەتتىك ورگان ناقتى شەشىم قابىلداعان ەمەس» دەيدى ماجىلىسىمەن ەرلان سايروۆ.

2025 جىلدىڭ 10 ماۋسىم كۇنى الماتىدا قازاق ۇلتتىق اگرارلىق زەرتتەۋ ۋنيۆەرسيتەتىندە «AMANAT» پارتياسى جانىنداعى سىبايلاس جەمقورلىق قارسى ءىس-قيمىل جونىندەگى رەسپۋبليكالىق كەڭەستىڭ كوشپەلى جيىنى  وتتى. شارا بارىسىندا عاسىرعا جۋىق تاريحى بار وقۋ ورداسىنىڭ اكتيۆتەرىن مەملەكەت مەنشىگىنە قايتارۋ ماسەلەسى تالقىلاندى.

جيىنعا كەڭەس توراعاسى، ءماجىلىس دەپۋتاتى ەرلان سايروۆ، كەڭەس مۇشەلەرى، باسقا دا مەملەكەتتىك ورگانداردىڭ وكىلدەرى، ۋنيۆەرسيتەت پروفەسسور-وقىتۋشىلار قۇرامى جانە ستۋدەنتتەر قاتىستى.

«2000-شى جىلداردىڭ باسىندا قازاق ۇلتتىق اگرارلىق زەرتتەۋ ۋنيۆەرسيتەتىندە مەملەكەتتىڭ جانە وسى وقۋ ورداسىنىڭ مەنشىگى تالان-تاراجعا تۇسكەن. اتاپ ايتقاندا، ۋنيۆەرسيتەتتىڭ 3 جاتاقحاناسى، 5 لابوراتوريالىق ءىرى نىسانى جانە بىرقاتار شارۋاشىلىق ماقساتتاعى جەر ۋچاسكەسى جەكە ادامداردىڭ قولىنا ءوتىپ كەتتى. مۇنىڭ ارتىندا سىبايلاس جەمقورلىق ارەكەتى تۇرعانى انىق. بۇگىندە «AMANAT» پارتياسىنىڭ اتسالىسۋىمەن باس پروكۋراتۋرانىڭ جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى وسى ماسەلەمەن اينالىسىپ جاتىر. ارينە، وسى جىلدار ارالىعىندا مەنشىكتەر بىرنەشە رەت باسقا تۇلعالاردىڭ قولىنا ءوتىپ كەتتى. وسى ۋاقىتقا دەيىن بىردە-ءبىر مەملەكەتتىك ورگان ناقتى شەشىم قابىلداعان ەمەس. سوعان قاراماستان، ادىلدىك قالپىنا كەلۋى كەرەك دەپ ويلايمىن. زاڭسىز جەكەشەلەنگەن بارلىق ماتەريالدىق يگىلىكتەر مەملەكەتكە قايتارىلۋى قاجەت. بۇعان جول بەرگەن ازاماتتار قۇقىقتىق جاۋاپكەرشىلىككە تارتىلۋعا ءتيىس»، – دەدى ەرلان سايروۆ ءوز سوزىندە.

اتاپ ايتقاندا، الماتى قالاسىنىڭ پروكۋراتۋراسى ۋنيۆەرسيتەت مۇلكىن زاڭسىز يەلىكتەن شىعارۋ فاكتىلەرىن انىقتادى. ونىڭ ىشىندە اباي داڭعىلى 8 مەكەنجايىندا ورنالاسقان، جالپى اۋدانى 9051 ش. م. (0,9051 گا) عيماراتتار، گاراجدارى بار جەر ۋچاسكەسى، وقۋ سىنىپتارى، گاراج شارۋاشىلىعىنىڭ اكىمشىلىك عيماراتى; اۋدانى 306.9 ش.م. بولاتىن ليتەر "ف", اۋدانى 629.1 ش.م. ليتەر "تس", اۋدانى 306.3 ش. م.، ليتەر "چ", اۋدانى 91.7 ش.م. ليتەر "ش" سياقتى اياقتالماعان قۇرىلىس وبەكتىسىمەن بىرگە جەكەشەلەنىپ كەتكەن. كەيىننەن "يريدا ينۆەست" جشس اباي داڭعىلى 8 مەكەن-جايىندا ورنالاسقان جەر ۋچاسكەسىنىڭ ءبىر بولىگىن "رامس-قازاقستان" جشس-نە كوپ پاتەرلى تۇرعىن ءۇي سالۋ ءۇشىن بەرىپ جىبەرگەن.

قازىرگى ۋاقىتتا ءماجىلىس دەپۋتاتى ەرلان سايىروۆتىڭ ارالاسۋىمەن كوپ پاتەرلى تۇرعىن ءۇي سالۋ ءۇشىن باستالعان قۇرىلىس جۇمىستارى ۋاقىتشا توقتاتىلدى.

«بولاشاق ۇرپاقتىڭ يگىلىگىنە تيەسىلى مۇلىك ادىلدىكپەن قايتارىلسىن. بۇل ۋنيۆەرسيتەت ۇجىمىنىڭ جانە ستۋدەنتتەرىنىڭ ءوتىنىشى. ەندى وزدەرىڭىز كورىپ تۇرسىزدار. اگرارلىق ۋنيۆەرسيتەت قالاشىعىنىڭ ىشىندەگى وسى جەر – كەزىندە ستۋدەنتتەردەن تارتىپ الىنعان جەر. قازىر جەكەمەنشىكتە. ەندى بۇل جەردە الپاۋىتتار ءۇي سالامىز دەيدى. مىناۋ ستۋدەنتتەر تۇراتىن جەردە جەكەمەنشىك ءۇي سالۋ دەگەن – لوگيكاعا سايكەس كەلمەيدى. سوندىقتان بۇل توقتاپ تۇر. ەندى ول جاي عانا توقتاپ تۇرعان جوق. وزدەرىڭىز كورىپ تۇرسىزدار، مىناۋ كوتلوۆاننىڭ ىشىندەگى توپىراق ۇگىلىپ، ستۋدەنتتەر تۇراتىن جاتاقحانا مەن وقۋ كورپۋستارىنا قاۋىپ ءتوندىرىپ تۇر. سوندىقتان بۇل جەردەگى ماسەلە – ءبىز وسى تەحنوگەندىك كاتاستروفانى قازىر توقتاتۋىمىز كەرەك. وكىنىشكە وراي، قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگىنىڭ قۇرىلىس كوميتەتى ەشقانداي شارا قابىلداپ جاتقان جوق. كوميتەتتىڭ ازاماتتارى مىنا جاعدايدى ءبىر رەت كەلىپ كورگەن ەمەس. سونىمەن بىرگە، ماسەلەنى تەرەڭ قاراستىرىپ شەشىمدەردى قابىلداۋدا، نە باس پروكۋراتۋرا، نە مينيسترلىكتەر ەشقانداي قادام جاساماي وتىر. بۇل جەردە تەك قانا دەپۋتاتتار ءجۇر. ەندى مەن وسى ماسەلە بويىنشا قازاقستان رەسپۋبليكاسىنىڭ  باس پروكۋرورىنا جانە قازاقستان رەسپۋبليكاسىنىڭ پرەمەر-مينيسترىنە ءدال وسى جەردە مالىمدەمە جولدادىم” - دەدى ەرلان سايروۆ.

ەسكە سالا كەتەيىك، كەيىنگى ەكى جىلدا قازاق ۇلتتىق اگرارلىق زەرتتەۋ ۋنيۆەرسيتەتىنىڭ اكتيۆتەرىن مەملەكەت مەنشىگىنە قايتارۋ باعىتىندا قارقىندى جۇمىس جۇرگىزىلىپ جاتىر. مىسالى، جەكە قولعا وتكەن №6 ستۋدەنتتىك جاتاقحانا وقۋ ورداسىنىڭ تۇرعىن ءۇي قورىنا قايتارىلىپ، كۇردەلى جوندەۋدەن كەيىن قوسىمشا 280 ستۋدەنت ورىنمەن قامتاماسىز ەتىلدى.

الماتى وبلىسى، تالعار اۋدانى، «بايبۇلاق» اۋىلىنداعى «اگروۋنيۆەرسيتەت» وقۋ-تاجىريبەلىك شارۋاشىلىعىنداعى 50 ورىندىق جاتاقحانا (جەر كولەمى 1,345 گا), اۋىل شارۋاشىلىق تاجىريبەلىك ماقساتىنداعى 0,11 گا جەر ۋچاسكەسى (جانارماي ستانتسياسى سالىنىپ كەتكەن), اۋىل شارۋاشىلىق زاتتارىن ساقتايتىن قويما (جەر كولەمى 0,0455 گا), تەحنيكالىق قۇرالدارعا ارنالعان گاراج (جەر كولەمى 0,08 گا) ۋنيۆەرسيتەت مەنگىشىگىنە قايتارىلدى. 1973 جىلى سالىنعان، سوڭعى 30 جىل بويى بىردە-ءبىر رەت جوندەۋ كورمەگەن وقۋ-تاجىريبەلىك شارۋاشىلىقتىڭ جاتاقحاناسى جاقىندا كۇردەلى جوندەۋدەن وتكىزىلىپ، ستۋدەنتتەردىڭ پايدالانۋىنا بەرىلدى.

«AMANAT» پارتياسى وتكىزگەن جيىندا ۋنيۆەرسيتەتتىڭ قاۋىپسىزدىگىنە قاتەر توندىرەتىن جاعدايلار ەسكەرىلە وتىرىپ، ستۋدەنتتەرى مەن وقىتۋشىلار تاراپىنان وسى نىسانداردى سالۋدى مۇلدە توقتاتۋ جانە تۇبەگەيلى وقۋ ورداسىنىڭ يەلىگىنە قايتارۋ باعىتىنداعى تالاپتار قوزعالدى.

ءوز كەزەگىندە، كەڭەسكە قاتىسقان قر ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسى ورىنباسارىنىڭ م.ا. سەرىك نابيەۆ، الماتى قالاسى اكىمىنىڭ ورىنباسارى بەيبىت شاحانوۆ، «AMANAT» پارتياسى ورتالىق اپپاراتى پارتيالىق باقىلاۋ دەپارتامەنتىنىڭ ينسپەكتورى ۆەنەرا ەسىلباەۆا، پارتيانىڭ الماتى قالالىق فيليالىنىڭ توراعاسى ستانيسلاۆ كانكۋروۆ، «AMANAT» پارتياسى اقف سىبايلاس جەمقورلىققا قارسى كەڭەسىنىڭ مۇشەسى نۇرلان سيسەكەنوۆ، الماتى قالاسى قۇرىلىسىن باقىلاۋ باسقارماسىنىڭ باسشىسى دانيار قىرىقباەۆ، الماتى ق. قالالىق جوسپارلاۋ جانە ۋربانيستيكا باسقارماسىنىڭ باسشىسى نۇرلان بورانباەۆ، الماتى قالاسى جەر قاتىناستارى باسقارماسىنىڭ باسشىسىنىڭ ورىنباسارى تيمۋر تۇرسبەكوۆ ءوز ۇسىنىستارىمەن ءبولىستى. ولار دەپۋتاتتىڭ باستاماسىن قولداي وتىرىپ، جەكە قولعا زاڭسىز ءوتىپ كەتكەن ۋنيۆەرسيتەت نىساندارىنا جان-جاقتى تەكسەرۋ جۇرگىزۋدى، زاڭسىز قۇرىلىستى توقتاتۋ شارالارىن جۋىق ارادا جۇرگىزۋدى قولعا الاتىندارىن جەتكىزدى.

قازىرگى تاڭدا بۇل وزەكتى ماسەلە «AMANAT» پارتياسىنىڭ، باس پروكۋراتۋرا جانە سىبايلاس جەمقورلىققا قارسى ءىس-قيمىل اگەنتتىگىنىڭ باقىلاۋىندا تۇر.

Abai.kz