قازاق مۇنايى وپەك+ ءۇشىن تاعى ءبىر سىناققا اينالدى
قازىر الەمدىك باق قازاقستان تۋرالى ءجيى جازاتىن بولدى. ەلىمىزدىڭ تۋريزم، مۇناي سالاسى مەن ازىق-تۇلىك ەكسپورتتاۋ جاعدايى ولاردى قىزىقتىراتىنى بەلگىلى.
كەشە Bloomberg باسىلىم ەلىمىزدىڭ مۇناي ەكسپورتى تۋرالى توقتالىپتى. سول ماتەريالدى قاز-قالپىندا اۋدارىپ وتىرمىز.
«قازاقستاننىڭ شيكى مۇناي ەكسپورتى كەلەسى ايدا دا رەكوردتىق دەڭگەيگە جەتپەك، بۇل ەلدىڭ مۇناي ءوندىرىسىنىڭ ارتۋى وپەك+ ءۇشىن ايتارلىقتاي قيىندىق تۋعىزىپ وتىرعانىن كورسەتەدى.
ءتورت ءىرى مۇناي ساۋداگەرىنىڭ بولجامى بويىنشا، شىلدە ايىندا رەسەيدىڭ قارا تەڭىزدەگى نوۆوروسسيسك پورتىنان جونەلتىلەتىن CPC Blend ماركالى مۇناي كولەمى تاۋلىگىنە 1,65–1,75 ميلليون باررەلگە جەتۋى مۇمكىن. بۇل اقپان ايىندا تىركەلگەن تاۋلىگىنە 1,7 ميلليون باررەلدىك رەكوردتى قايتالاپ نەمەسە ءتىپتى اسىپ ءتۇسۋى دە ىقتيمال.
قازاقستاننىڭ مۇناي ءوندىرۋ كولەمىنىڭ كۇرت ءوسۋى مۇناي ەكسپورتتاۋشى ەلدەر ۇيىمى (وپەك) جانە ونىڭ سەرىكتەستەرىمەن اراداعى قارىم-قاتىناستا شيەلەنىس تۋدىرادى. استانا مەن باسقا دا مۇناي ءوندىرىپ وتىرعان ەلدەرگە قىسىم جاساۋ ماقساتىندا ساۋد ارابياسى باستاعان توپ بىرنەشە اي بويى وزدەرىنىڭ مۇناي جەتكىزىلىمىن ارتتىرىپ كەلەدى.
الايدا بۇل قادام قازاقستاندى توقتاتا قويعان جوق. ەلدىڭ ەنەرگەتيكا ءمينيسترى ەرلان اقكەنجەنوۆ وتكەن ايدىڭ سوڭىندا شەتەلدىك سەرىكتەستەرگە ءوندىرىس كولەمىن شەكتەۋ تالاپ ەتىلمەيتىنىن مالىمدەدى.
OPEC-ءتىڭ ەكىنشى دەرەككوزدەرىنە سۇيەنسەك، قازاقستان بيىل ءساۋىر ايىندا تاۋلىگىنە 1,82 ميلليون باررەل مۇناي وندىرگەن. بۇل ايعا بەلگىلەنگەن ماقساتتى كولەمنەن شامامەن 300 مىڭ باررەلگە ارتىق. مامىر ايىندا بۇل ماقسات 40 مىڭ باررەلگە قىسقارۋى ءتيىس ەدى، ويتكەنى قازاقستان بۇعان دەيىنگى ارتىق ءوندىرىستى وتەۋ ءۇشىن قوسىمشا شەكتەۋلەر ەنگىزۋگە ءتيىس بولاتىن. OPEC مامىر ايىنداعى ناقتى ءوندىرىس كورسەتكىشتەرىن دۇيسەنبى كۇنى جاريالايدى.
الايدا ءوندىرىس كولەمى قىسقارۋدىڭ ورنىنا، ارتا بەرمەك. قازاقستان بيلىگى 2025 جىلى جالپى مۇناي ءوندىرىسى الدىن الا جوسپاردان جوعارى، 97 ميلليون توننا بولادى دەپ بولجايدى. بۇل كورسەتكىش 2026 جىلى 100 ميلليون تونناعا، ال ودان كەيىنگى جىلدارى 105 ميلليون تونناعا جەتەدى دەپ كۇتىلۋدە. سونىمەن قاتار، ۇلتتىق كومپانيا — “قازمۇنايگاز” الپاۋىت قاشاعان كەن ورنىن تولىق يگەرۋگە كۇش سالىپ جاتىر.
CPC Blend ماركالى مۇناي ەكسپورتى اقپان ايىندا تاۋلىگىنە 1,7 ميلليون باررەلگە جەتىپ، رەكورد جاڭارتتى. بۇل Chevron كومپانياسىنىڭ تەڭىز كەن ورنىن كەڭەيتۋ جوباسىنىڭ اياقتالۋىمەن بايلانىستى بولدى. ال كەيىنگى ءۇش ايدا — سونىڭ ىشىندە مامىردا — تيەۋ كولەمى ازداپ تومەندەدى. سەبەبى جۇكتەۋ تەرمينالىندا جوسپارلى جوندەۋ جۇمىستارى جۇرگىزىلگەن ەدى.
CPC ارقىلى ەكسپورتتالاتىن مۇنايدىڭ شامامەن 90 پايىزى – قازاقستاننان شىققان. بۇل تەرمينال ەلدىڭ جالپى مۇناي ەكسپورتىنىڭ 80 پايىزىن قامتاماسىز ەتەدى. رەسەيلىك مۇناي كولەمى شامامەن تاۋلىگىنە 150 مىڭ باررەلدى قۇرايدى.
Abai.kz
