13 ماۋسىمنان بەرى ءتۇن تاياۋ شىعىس اسپانى ايعىز-ۇيعىز بولىپ جاتىر. ءيزرايلدىڭ اسكەري-ساياسي باسشىلىعى «ويانعان ارىستان» وپەراتسياسىن باستاپ، ونى «تەھەران تاراپىنان ءوسىپ كەلە جاتقان يادرولىق قاتەرگە جاۋاپ» دەپ ءتۇسىندىردى.

سونىمەن ءيزرايلدىڭ اۋە سوققىسى سالدارىنان يسلام رەۆوليۋتسياسى ساقشىلار كورپۋسىنىڭ (يرسك) جوعارى باسشىلىعىن قوسا العاندا ونداعان ادام قازا تاپتى. ال يران ءوز تاراپىنان «قانعا – قان، جانعا – جان» دەپ ۇرانداتا قاتىگەز كەك الۋعا ۋادە بەرىپ، يادرولىق باعدارلاما جونىندەگى كەلىسسوزدەردەن ات-ونىن الا قاشىپ وتىر.

يراندا شاحتار رەجيمى قۇلاتىلىپ، بيلىككە اياتوللا رۋحوللا حامەنەي باستاعان شيت ءدىن وكىلدەرى كەلگەننەن بەرى، 1979 جىلدان بەرى ءيزرايلدىڭ يرانمەن قاقتىعىسى جالعاسىپ كەلەدى. اياتوللا حامەنەي «يران يزرايل مەملەكەتىنىڭ بار ەكەنىن مويىندامايتىنىن» مالىمدەپ، ونى «تاريحي اراب جەرلەرىن باسىپ الدى» دەپ ايىپتادى. «سيونيزم - راسيستىك يدەولوگيا» دەپ جاريالاندى.

سوعىس باستالعالى-بەرى يران يزرايل اۋماعىنا باليستيكالىق زىمىراندارمەن سوققى جاساۋدا. ال يزرايل يران اۋماعىنداعى اسكەري جانە يادرولىق نىساندارعا بومبالاۋشى ۇشاقتارمەن شابۋىلداۋدا.

يران: حايفاداعى مۇناي وڭدەۋ زاۋىتىنا، حايفا پورتىنداعى اممياك قويماسىنا، تەل-اۆيۆتەگى يزرايل قورعانىس مينيسترلىگىنىڭ شتاب-پاتەرىنە، بەن-گۋريون حالىقارالىق اۋەجايىنا، حايفا پورتىنا، اشكەلون تەرمينالىنا، وروت رابين ەلەكترستانتسياسىنا جانە ديمونداعى يادرولىق ورتالىققا جانە بات-يام قالاسىنا شابۋىلدار جاسادى.

يزرايل: تەگەراندى سوققىلادى. تەگەران ماڭىنداعى مۇناي بازاسىنا، تەگەرانداعى جانارماي تەرمينالىنا، يرانداعى 2 ءموز-گە، تەگەرانداعى يران قورعانىس مينيسترلىگى شتابى مەن تەحنولوگيالىق ۋنيۆەرسيتەتكە، كەرمانشاح قالاسىنداعى يمام حاسان اسكەري گارنيزونىنا، ناتانزداعى ۋران بايىتۋ زاۋىتىن، يران اۋماعىنداعى زىمىران اتۋ قوندىرعىلارىنا ت.ب. 150-دەن اسا نىسانعا ءدوپ سوققىلار جاسادى.

يزرايل ءبىر ۋاقىتتا بىرنەشە باعىتتا سوعىس جۇرگىزىپ: گازاعا سوققى جاسادى. گازانىڭ بىرنەشە ەلدى-مەكەنىندە جويقىن جارىلىستار بولدى. سونىمەن قاتار يەمەندەگى حۋسيتتەرگە سوققى بەردى.

يراننىڭ اسكەري ءھام يادرولىق نىساندارىنا جاسالعان ەففەكتيۆتى سوققىلار مەن شابۋىلداردى ءسوز ەتپەگەندە، يزرايل يراننىڭ اسكەري قولباسشىلىعىن ءماجبۇرلى تۇردە الماستىردى (قولباسشى گەنەرالداردىڭ كوزىن جويدى). 9 بىردەي يراننىڭ نەگىزگى يادرولىق عالىمىن ءولتىردى.

سوققىلار سالدارىنان يسلام رەۆوليۋتسياسى ساقشىلارى كورپۋسىنىڭ قولباسشىسى گەنەرال-مايور حوسسەين سالامي، يادرولىق عالىمدار موحامماد ماحدي تەحرانچي مەن فەرەيدۋن ابباسي، سونداي-اق يران قارۋلى كۇشتەرى باس شتابىنىڭ باستىعى موحامماد باگەري قازا تاپتى. قازا تاپقان اسكەري تۇلعالار سانى ۇلعايۋدا.

كەشە يران سىرتقى ىستەر مينيسترلىگى ارنايى مالىمدەمە جاساپ: «يران وزىندە يادرولىق قارۋ بولمايتىنىنا كەپىلدىك بەرە وتىرىپ، كەلىسىم جاساۋعا دايىن»، - دەپ مالىمدەدى. مالىمدەمەگە سايكەس: يزرايل ۇرىستى توقتاتسا، يران دا يزرايلگە شابۋىلداردى توقتاتادى.

بىراق، يزرايل توقتاعان جوق. يزرايل يراننىڭ يادرولىق نىساندارىنا جاپپاي سوققى جاسايتىنىن ايتتى. يزرايل ۇشاقتارى يراننىڭ ونداعان نىسانىنا سوققى جاساۋدا. جانارماي جانە اسكەري قويمالار وتقا ورانۋدا.

بۇگىن «Reuters» اگەنتتىگى: «يران ومان مەن كاتاردىڭ اراعايىندىعىنان باس تارتتى. يراننىڭ ساقشىلار كورپۋسى ءيزرايلدى تۇگەل تالقانداعانعا دەيىن سوعىستى جالعاستىراتىنىن مالىمدەدى»، - دەپ حابارلادى.

Abai.kz