بۇگىن استانادا ءوتىپ جاتقان «قىتاي — ورتالىق ازيا» ىسكەرلىك كەڭەسىنىڭ ەكىنشى وتىرىسى اياسىندا جالپى قۇنى 17 ميلليارد اقش دوللارىنان اساتىن 35-تەن استام مەموراندۋمعا قول قويىلدى.

بۇل تۋرالى «اتامەكەن» ۇكپ باسقارما توراعاسىنىڭ ورىنباسارى، قازاقستاننىڭ سىرتقى ساۋدا پالاتاسىنىڭ باسشىسى مۇرات قارىمساقوۆ ءمالىم ەتتى. ونىڭ ايتۋىنشا، كەلىسىمدەر جاسىل ەنەرگەتيكا مەن ينفراقۇرىلىمنان باستاپ لوگيستيكا، ساۋدا جانە جاڭا حاب قۇرۋ سياقتى نەگىزگى سالالاردى قامتيدى.

— بۇل فورمات 2023 جىلى سيان قالاسىندا باستاۋ الدى جانە ونى ورتالىق ازيا ەلدەرى مەن قىتاي حالىق رەسپۋبليكاسىنىڭ كوشباسشىلارى قولدادى. ءبىرىنشى وتىرىس سياندا ءوتتى. تۇستەن كەيىن مەملەكەت باسشىلارىنىڭ قاتىسۋىمەن سامميت وتەدى، ءبىز ىسكەرلىك كەڭەستىڭ ەكىنشى وتىرىسىن وتكىزىپ جاتىرمىز. ىسكەرلىك كەڭەسكە ورتالىق ازيا ەلدەرى مەن قىتايدان 1000-نان استام قاتىسۋشى، ياعني 6 مەملەكەتتىڭ وكىلدەرى كەلدى. وتىرىستىڭ باعدارلاماسى وتە مازمۇندى، ونىڭ ىشىندە پلەنارلىق وتىرىس، پانەلدىك سەسسيالار، ىسكەرلىك كەزدەسۋلەر، كەڭ كولەمدەگى كورمەلەر ۇيىمداستىرىلدى. اتالعان شارالاردىڭ قورىتىندىسىندا كەلىسىمدەر مەن مەموراندۋمدارعا قول قويۋمەن اياقتالدى، — دەدى م. قارىمساقوۆ ەلوردادا وتكەن «قىتاي — ورتالىق ازيا» ىسكەرلىك كەڭەسىنىڭ ەكىنشى وتىرىسىندا باق وكىلدەرىنىڭ ساۋالىنا جاۋاپ بەرە تۇرىپ.

ايتا كەتسەك، 2024 جىلى ورتالىق ازيا ءوڭىرى مەن قىتاي اراسىنداعى ساۋدا قارقىنى 95 ملرد اقش دوللارىنا جەتكەن جانە ونىڭ جارتىسىنا جۋىعى قازاقستانعا تيەسىلى بولدى. وسىلايشا، ەكىجاقتى ساۋدا اينالىمى رەكوردتىق 44 ملرد دوللارعا جەتكەن.

Abai.kz