ىشكى ىستەر مينيسترلىگى ازاماتتاردى ءوز مىندەتىنە جاۋاپكەرشىلىكپەن قاراۋعا شاقىراتىن بەينەروليك جاريالادى، - دەپ حابارلايدى Polisia.kz.

روليكتىڭ باستى كەيىپكەرى - مال شارۋاشىلىعىمەن اينالىساتىن اۋىل تۇرعىنى. ول جىلدار بويى مالىن قاراۋسىز جىبەرۋدى ادەتكە اينالدىرعان. جەرگىلىكتى بيلىكتىڭ بىرنەشە رەت ەسكەرتۋ جاساعانىنا قاراماستان، قارت ەشكىمگە قۇلاق اسپايدى. ونىڭ كەنجە ۇلى: "اكىمشىلىك بۇل جولى سوڭعى ەسكەرتۋ بەردى. كەلەسىدە — ايىپپۇل", - دەپ حابارلايدى. بىراق اكەسى بۇل سوزگە ءمان بەرمەي، قولىن ءبىر سىلتەيدى.

سيۋجەت جەلىسى بويىنشا كۇتپەگەن جەردەن قايعىلى جاعداي ورىن الادى. قارتتىڭ ۇلكەن ۇلى اۋىلعا كەلە جاتىپ، جولعا شىعىپ كەتكەن جىلقىنى كولىگىمەن قاعىپ، اپاتقا ۇشىرايدى.

2025 جىلدىڭ العاشقى بەس ايىندا ەل بويىنشا جانۋارلاردىڭ قاتىسۋىمەن 84 جول-كولىك وقيعاسى تىركەلگەن. بۇل اپاتتاردىڭ سالدارىنان 6 ادام قازا تاۋىپ، 128 ادام ءتۇرلى جاراقات العان.

ءىىم كەزەكتى رەت بارلىق ازاماتتاردى — جۇرگىزۋشىلەردى دە، مال يەلەرىن دە جاۋاپكەرشىلىككە شاقىرادى. ءاربىر ەرەجە بۇزۋشىلىق نەمەسە بەيقامدىق العاشىندا ۇساق نارسە بولىپ كورىنۋى مۇمكىن، الايدا ۇلكەن قايعىعا اكەلۋى ىقتيمال.

Abai.kz