كۇزدەن باستاپ قازاقستاندا ايىپتۇراقتار اقىلى بولۋى مۇمكىن. ءتيىستى زاڭعا ەنگىزىلگەن تۇزەتۋلەردى سەنات ماقۇلدادى. الايدا جۇرگىزۋشىلەر بۇل جاڭالىققا قارسى.

ايىپتۇراققا جەتكىزۋ جانە وندا ۋاقىتشا ساقتاۋ قۇنىنا بايلانىستى تولەم مولشەرىن ءماسليحاتتار بەلگىلەيتىن بولادى.

بۇل جاڭالىق اۆتوكولىك يەلەرى اراسىندا نارازىلىق تۋدىرىپ وتىر. جاڭا وزگەرىستەرگە اۆتوكولىك سالاسىنداعى زاڭگەرلەر دە الاڭداۋلى. ولاردىڭ پىكىرىنشە، مۇنداي جاڭاشىلدىقتار ايىپتۇراقتارداعى كولىك سانىن ارتتىرىپ، سوتتاردىڭ جۇكتەمەسىن كوبەيتەدى جانە جەمقورلىق قاۋپىن دە كۇشەيتەدى.

بۇل بىردەن جەمقورلىق تاۋەكەلدەرىنىڭ ارتۋىنا الىپ كەلەدى. مەنىڭ ويىمشا، ەندى جول پوليتسياسىنىڭ قىزمەتكەرى تۇرىپ الىپ “سەنى دە، سەنى دە ايىپتۇراققا قويامىن، اقشا تولەيسىڭ، ارىزدانساڭ، ءوزىڭ ءبىل” دەپ ايتۋى مۇمكىن. مىسالى، كولىككە 300 مىڭ تەڭگە كولەمىندە زيان كەلتىرىلگەن دەلىك، ال ول 60 كۇن بويى ايىپتۇراقتا تۇردى، بۇل اكىمشىلىك ءىس قارالاتىن پروتسەسسۋالدىق مەرزىم. سوڭىندا نە بولدى؟ ايىپتۇراق بوساعان جوق، سوتتار ءىس قاراۋدان شارشايدى، – دەيدى اۆتويۋريست ميحايل بۋديانسكي.

ايىپتۇراققا كوبىنەسە دۇرىس قويىلماعان كولىكتەر جەتكىزىلەدى. سونداي-اق قارىزى بار كولىكتەر دە ءجيى تۇرىپ قالادى.

نەگىزگى سەبەپ – اۆتوكولىكتى دۇرىس قويماۋ. سونىمەن قاتار بۇل اكىمشىلىك ايىپپۇلدارى كوپ، ۇنەمى قۇقىقبۇزۋشىلىق جاسايتىن جۇرگىزۋشىلەر. بىزدە ارنايى باعدارلاما بار، كۇن سايىن وسىنداي ازاماتتاردى انىقتاپ وتىرامىز، – دەيدى الماتى قالاسى جەرگىلىكتى پوليتسيا قىزمەتى باسقارماسى باسشىسىنىڭ ورىنباسارى تيمۋر نۇعايباەۆ.

الماتى قالاسىنىڭ بالانسىندا ەكى ايىپتۇراق بار. قازىرگى تاڭدا وندا 1 500-دەن استام كولىك پەن 2 000-عا جۋىق موپەد تۇر. ولاردىڭ بارلىعى اقىسىز نەگىزدە قويىلعان.

ايتا كەتەيىك، ايىپتۇراق – جول-كولىك وقيعاسى، ساقتاندىرۋدىڭ جوقتىعى نەمەسە كولىك سالىعىنىڭ تولەنبەۋى سياقتى جاعدايلار كەزىندە كولىكتەردى ۋاقىتشا ساقتاۋ ءۇشىن قولدانىلادى.

بىراق ايىپپۇل، تەرەزە قاراڭعىلىعى، قاتتى دىبىستى شىعارۋ نەمەسە اقىلى اۆتوتۇراققا تولەم جاساماۋ جاعدايىندا كولىكتى ەۆاكۋاتسيالاۋعا بولمايدى.

اكىمشىلىك كودەكستىڭ 797-بابى، 4-بولىگىنە سايكەس، ارنايى تۇراقتار كوممۋنالدىق مەنشىكتە بولادى جانە جەرگىلىكتى اتقارۋشى ورگاننىڭ شەشىمىمەن قۇرىلادى. ياعني، ولار جەكە مەنشىك ەمەس جانە جەرگىلىكتى بيۋدجەت ەسەبىنەن قارجىلاندىرىلادى. سوندىقتان قازىرگى تاڭدا ايىپتۇراقتاعى كولىكتەرگە قاتىستى تۇراق اقىسى الىنبايدى.

Abai.kz