«شىمكەنت جاستار تەاترىنىڭ» باسشىلىعى 136 ملن تەڭگە ۇرلادى دەگەن كۇدىككە ىلىكتى

قارجىلىق مونيتورينگ شىمكەنت قالاسى بويىنشا دەپارتامەنتى «شىمكەنت جاستار تەاترى» مكقك ديرەكتورى مەن وزگە دە لاۋازىمدى تۇلعالارعا قاتىستى 136 ميلليون تەڭگەدەن استام سوماداعى بيۋدجەت قاراجاتىن جىمقىرۋ فاكتىسى بويىنشا تەرگەۋدى اياقتادى.

تەرگەۋ دەرەگىنشە، مەملەكەتتىك بيۋدجەتتەن كونتسەرت وتكىزۋگە ارنالعان جابدىقتاردى – سونىڭ ىشىندە كولونكالار، سابۆۋفەرلەر، ساحنالىق فەرمالار، كۇشەيتكىشتەر، ميكروفوندار جانە ت.ب. ساتىپ الۋعا 320 ملن تەڭگە بولىنگەن.

الايدا ساتىپ الۋ ءراسىمى كەزىندە زاڭ تالاپتارى ورەسكەل بۇزىلىپ، لوتتار قولدان بولشەكتەلىپ، 20-دان استام اتاۋ بويىنشا ساتىپ الۋلار ەلەكتروندى دۇكەن ارقىلى جۇرگىزىلگەن.

ەلەكتروندى ساۋدا الاڭى ارقىلى جابدىقتى ناقتى جەتكىزبەگەن جالعان جەكە كاسىپكەرلەرمەن كەلىسىمشارتتار جاسالىپ، قاراجات قولما-قول اقشاعا اينالدىرىلعان، – دەلىنگەن قما مالىمەتىندە.

قىلمىستىق جولمەن الىنعان قاراجاتقا جالپى قۇنى 48 ملن تەڭگەنى قۇرايتىن اۆتوكولىك پەن پاتەر ساتىپ الىنعان. بۇل مۇلىك سەنىمدى تۇلعالاردىڭ اتىنا راسىمدەلىپ، جاسىرىنۋعا تىرىسقان.

سوت سانكتسياسىمەن اتالعان مۇلىككە تىيىم سالىندى، ال كۇدىكتىلەر قاماۋعا الىندى.

Abai.kz