استانادا قىلمىستىق ىستەر جونىندەگى اۋدانارالىق سوتتا پەريزات قايرات پەن ونىڭ اناسى گايني الاشباەۆاعا قاتىستى كوپشىلىكتىڭ نازارىنا ىلىككەن قىلمىستىق ءىس بويىنشا نەگىزگى سوت پروتسەسى ءوتىپ جاتىر.

ەكى ايىپتالۋشىعا اسا ءىرى كولەمدە الاياقتىق جاسادى دەگەن ايىپ تاعىلىپ وتىر. تەرگەۋ نۇسقاسى بويىنشا، ولار قايىرىمدىلىق قىزمەتى رەتىندە كورسەتىپ، 3,5 ملرد تەڭگەدەن استام قارجىنى زاڭسىز يەمدەنگەن.

پروكۋرور ورازالينا ايىپتاۋ اكتىسىن وقىپ جاتىر.

سوتقا دەيىنگى تەرگەپ-تەكسەرۋ ماتەريالدارىنا سايكەس، پەريزات قايرات پەن گايني الاشباەۆا جەكە بايۋ ماقساتىندا، ءوز ارەكەتتەرىنىڭ زاڭسىزدىعى مەن قوعامعا قاۋىپتىلىگىن تۇسىنە وتىرىپ، اۋىر قىلمىستاردى قاساقانا جاساعان. ولار مۇلىككە قارسى جانە ەكونوميكالىق قىزمەت سالاسىنداعى قۇقىقبۇزۋشىلىقتار جاسادى، - دەدى پروكۋرور سوتتا.

زاڭعا سايكەس، قايىرىمدىلىق – بۇل تەگىن نەمەسە جەڭىلدەتىلگەن شارتتارمەن كورسەتىلەتىن، گۋمانيتارلىق مۇقتاجدىقتاردى وتەۋگە باعىتتالعان قوعامدىق پايدالى قىزمەت ءتۇرى.

تەرگەۋ مالىمەتتەرى بويىنشا، 2018 جىلى ىسكە قوسىلعان BizBirgemiz.kz پلاتفورماسى پاندەميا كەزىندە حالىقتان جاپپاي قولداۋ تاۋىپ، كەڭىنەن تانىمال بولعان. پەريزات قايرات بۇل پلاتفورمانىڭ اتى مەن يدەياسىنا دەگەن ازاماتتاردىڭ سەنىمىن پايدالانىپ، ءوز قىلمىستىق جوسپارىن ىسكە اسىرا باستاعان.

تەرگەۋ دەرەكتەرى بويىنشا قايرات پەريزاتتىڭ ارەكەتتەرى:

• “Biz Birgemiz” اتتى تانىمال ۇراندى پايدالانعان قوعامدىق ۇيىم قۇرىپ، ونى زاڭدى قايىرىمدىلىق باستامالارىمەن بايلانىسى بار ەتىپ كورسەتكەن;
• ءوزىنىڭ جانە اناسىنىڭ اتىنا بىرنەشە بانك شوتىن اشىپ، سولار ارقىلى قايىرىمدىلىق كومەك رەتىندە تۇسكەن قارجىنى جيناقتاعان;
• "قوعامنىڭ الەۋمەتتىك ءالسىز توپتارىنا كومەكتەسەمىز" دەگەن جەلەۋمەن حالىقتان قاراجات جيناپ، ءتۇرلى اقپاراتتىق ناۋقاندار مەن اۋكتسيوندار ۇيىمداستىرعان;
• ءىس-ارەكەتىن زاڭدى ەتىپ كورسەتۋ ءۇشىن جينالعان قارجىنىڭ از بولىگىن ناقتى كومەككە باعىتتاپ وتىرعان;
• ال قارجىنىڭ نەگىزگى بولىگى جەكە ماقساتتارعا، ياعني جىلجىمايتىن مۇلىك ساتىپ الۋعا، زەرگەرلىك بۇيىمدار الۋعا، شەتەلدىك ساپارلارعا جۇمسالعان;
• ءوزىن جانە اناسىن ء"ساتتى كاسىپكەرلەر" رەتىندە كورسەتۋ ارقىلى زاڭسىز تابىستى اقتاۋعا تىرىسقان;
• سونىمەن قاتار اينالاسىنداعى تۋىستارى مەن سەنىمدى تۇلعالارىن دا قارجىنى قولما-قول اقشاعا اينالدىرۋ جانە زاڭداستىرۋ ارەكەتتەرىنە تارتقان.

وسىلايشا رەسمي تەرگەۋ دەرەكتەرى بويىنشا، قىلمىستىق سحەما مۇقيات جوسپارلانىپ، الەۋمەتتىك باستامالارعا ۇقساتىپ جاسىرىلعان ۇيىمداسقان الاياقتىق ارەكەتتەرىنىڭ ءبىر بولىگى بولعان.

بۇعان دەيىن سوت زالىنان باق وكىلدەرىن شەتتەتۋ تۋرالى شەشىم قابىلداعانىن جازدىق.

تىڭداۋ جارتىلاي جابىق رەجيمدە ءوتىپ جاتىر. جۋرناليستەر ارنايى ءباسپاسوز ورتالىعىنان اقپارات تاراتىپ جاتىر. زالدا وتىرۋعا تەك تاراپتارعا عانا رۇقسات بەرىلدى.

ەسكە سالساق، قىلمىستىق ءىس بويىنشا كۇدىكتى رەتىندە ەكى ادام، ياعني پەريزات قايرات پەن ونىڭ اناسى تانىلىپ وتىر. 2025 جىلدىڭ 4 ساۋىرىندە  پەريزات قايراتتىڭ اناسى گايني الاشباەۆا ءۇي قاماققا الىنعان بولاتىن.

تەرگەۋ بارىسىندا انىقتالعانداي، 2021 جىلدان 2024 جىلعا دەيىن پەريزات قايرات ءتۇرلى قايىرىمدىلىق اكتسيالارى ارقىلى جالپى سوماسى 3,5 ميلليارد تەڭگە كولەمىندە قاراجات جيناپ، ونى ءوز پايداسىنا جاراتقان. مۇنداي قاراجاتتار نەگىزىنەن بالالارعا، سۋ تاسقىنىنان زارداپ شەككەندەرگە جانە پالەستينا حالقىنا كومەك كورسەتۋ ءۇشىن جينالعان دەپ كورسەتىلگەن.

الايدا، تەرگەۋ بارىسىندا بۇل قاراجاتتاردىڭ كوپ بولىگى ونىڭ جەكە قاجەتتىلىكتەرىنە، سونىڭ ىشىندە ءساندى كيىمدەر، اشەكەيلەر، كولىكتەر مەن جىلجىمايتىن مۇلىك ساتىپ الۋعا جۇمسالعانى انىقتالدى.

سونىمەن قاتار، ول وسى قاراجاتتاردى زاڭداستىرۋ ءۇشىن جالعان كەلىسىمشارتتار جاساپ، جەكە كاسىپكەرلەرمەن كەلىسىمدەر جاساعان.

بۇعان دەيىن قايىرىمدىلىق قورىنىڭقۇرىلتايشىسى كۇدىككە ىلىنگەنىن، پەريزات قايراتدەگەن كىم ەكەنى تۋرالى، ونىڭ تاعى ءبىر زاڭسىز ارەكەتىانىقتالعانىن جازعان بولاتىنبىز.

Abai.kz