اقش پرەزيدەنتى دونالد ترامپ ۋكراينانى قارۋ-جاراقپەن قولداۋ تۋرالى مالىمدەمە جاساپ، ناتو اياسىندا بۇل ەلگە اۋقىمدى كولەمدە اسكەري تەحنيكا جەتكىزىلىپ جاتقانىن راستادى. بۇل تۋرالى The New York Times پەن First Channel News حابارلادى.

Patriot زىمىراندارى جەتكىزىلدى. ءبىز اپتاسىنا 5-6 مىڭ ادامنىڭ ءومىرىن ساقتاپ قالامىز. ونىڭ ىشىندە رەسەيلىك تە، ۋكراينالىق تا ساربازدار بار، – دەدى ترامپ.

ول جاڭا كەلىسىمدى اقش ءۇشىن ءتيىمدى مامىلە دەپ اتاپ ءوتتى. دەگەنمەن، كەلىسىمنىڭ ەگجەي-تەگجەيى مەن ناقتى ىسكە اسۋ جولدارى ازىرگە قۇپيا كۇيىندە قالىپ وتىر.

بۇل – وتە ماڭىزدى مامىلە. ءبىز الەمدەگى ەڭ ۇزدىك اسكەري جابدىقتاردى ۇسىنىپ وتىرمىز، ال الەمنىڭ اۋقاتتى مەملەكەتتەرى ونى ساتىپ الۋعا دايىن، – دەپ مالىمدەدى اق ءۇي باسشىسى.

ناتو-نىڭ جاڭادان تاعايىندالعان باس حاتشىسى مارك ريۋتتە كەمىندە 8 ەلدىڭ ۋكرايناعا قاجەتتى قارۋ-جاراقتى ساتىپ الۋعا قاراجات بولەتىنىن ايتتى.

ول دونالد ترامپتىڭ بۇل پروتسەسكە قوسقان ۇلەسىن جوعارى باعالاپ، اقش-تىڭ ءرولى شەشۋشى بولعانىن جەتكىزدى.

بۇل – ءادىل جانە ورىندى شەشىم. قارجىلىق جۇكتەمەنى ەۋروپالىقتار ءوز موينىنا الىپ وتىر، – دەدى ريۋتتە.

الايدا ترامپ اقش-تىڭ ۋكرايناعا الىس قاشىقتىقتاعى زىمىرانداردى جەتكىزۋ جوسپارى جوعىن ناقتىلادى.

سونىمەن قاتار، ترامپ پەن ريۋتتە جاڭا كەلىسىم اياسىندا ۋكرايناعا قوسىمشا امەريكالىق Patriot اۋە شابۋىلىنا قارسى قورعانىس جۇيەلەرى جەتكىزىلەتىنىن راستادى.

گەرمانيا 2 جۇيەنى ساتىپ الۋعا دايىن ەكەنىن بىلدىرسە، نورۆەگيا تاعى ءبىر جۇيەنى ۇسىنۋعا ءازىر.

ال ترامپ اتىن اتاماعان مەملەكەت وزىندەگى 17 Patriot جۇيەسىن ساتۋعا دايىن. بۇل 2020 جىلى امەريكالىق Raytheon كومپانياسى شۆەيتسارياعا ساتۋعا كەلىسكەن 17 ۇشىرۋ قوندىرعىسى بولۋى مۇمكىن دەگەن بولجام بار.

اقش بۇل كەلىسىم ارقىلى ەلەۋلى ەكونوميكالىق پايدا كورمەك. مىسالى، Patriot جۇيەسىنىڭ ءبىر باتارەياسى مودەل تۇرىنە قاراي 1 ميلليارد دوللارعا دەيىن باعالانادى. ءبىر عانا زىمىران قاعۋشى شامامەن 3,7 ميلليون دوللار تۇرادى.

بۇدان بولەك، JASSM زىمىراندارىنىڭ قۇنى – 1,5 ملن دوللار، ال ATACMS زىمىراندارى كەمىندە 1 ميلليون دوللاردان باستالادى.

اقش ءۇشىن بۇل كەلىسىم تەك ساياسي ىقپالىن ارتتىرۋ عانا ەمەس، اسكەري-ونەركاسىپتىك كەشەننىڭ دە تابىسىن ەسەلەۋ مۇمكىندىگى بولىپ وتىر.