پرەمەر-مينيستر ولجاس بەكتەنوۆ گرۋزيانىڭ ەكونوميكا جانە تۇراقتى دامۋ ءمينيسترى ماريام كۆريۆيشۆيليمەن كەزدەسۋ وتكىزدى. وسى كەزدەسۋ بارىسىندا تاراپتار:

- ەكىجاقتى ىنتىماقتاستىق ماسەلەلەرىن،

- ساۋدا مەن ينۆەستيتسيالاردى دامىتۋ -ينفراقۇرىلىمدىق جوبالاردى ىسكە اسىرۋ،

- كولىك-لوگيستيكالىق بايلانىستاردى كەڭەيتۋ،

-اگروونەركاسىپ كەشەنىندەگى تاۋار اينالىمىن ۇلعايتۋ ماسەلەلەرىن قاراستىردى.

بۇل ارادا ءبىزدىڭ بولە جارا ايتپاعىمىز – ترانسكاسپي حالىقارالىق كولىك باعدارى (تحكب) شەڭبەرىندە كەلەلى ماسەلەلەر قوزعالدى. اتالعان باسقوسۋ كەزىندە مينيسترلەر كابينەتىنىڭ باسشىسى قازاقستان گرۋزيانى تۇراقتى جانە ءوزارا ءتيىمدى ديالوگ قۇراتىن سەنىمدى ەكونوميكالىق ارىپتەس رەتىندە قاراستىراتىنىن اتاپ ءوتتى.

2025 جىلعى قاڭتار-مامىردا ەلدەر اراسىنداعى تاۋار اينالىمى 75,2 ملن دوللاردى قۇرادى. بۇل وتكەن جىلدىڭ وسى ۋاقىتتاعى كەزەڭىمەن سالىستىرعاندا 35,7% -عا ارتىق. كەزدەسۋ بارىسىندا كولىك-لوگيستيكالىق ءوزارا ءىس-قيمىلدى نىعايتۋعا باستى نازار اۋدارىلدى. ءيا، تحكب-نى دامىتۋ ەكى ەلگە دە وراسان زور پايدا اكەلەتىن يگىلىكتى قادام. ويتكەنى، ءداستۇرلى رەسەي باعىتتى ساياسيلانىپ كەتكەنى جاسىرىن ەمەس، سوندىقتان قازاق ەلى بالاما جولداردى ىزدەستىرۋگە باعدار ۇستاندى. بۇنىڭ ۇستىنە ەلىمىز رەسەيگە تاۋەلدىلىكتەن قۇتىلۋدىڭ جاڭا جولىن ساتىمەن ىزدەستىرە باستادى. ونىڭ ايقىن دالەلى گۇرجى ءدالىزى.

2025 جىلدىڭ ءبىرىنشى جارتىجىلدىعىندا قوس ەل اراسىنداعى تەمىر جول جۇك تاسىمالىنىڭ كولەمى 159,5 مىڭ توننادان استى، بۇل 2024 جىلدىڭ تاپ وسى كەزەڭىمەن سالىستىرعاندا 67%-عا ارتىق.

«تحكب دامۋىنداعى ماڭىزدى قادام گرۋزيانىڭ پوتي پورتىندا PTC Holding كومپانياسى سالعان  جاڭا قازاقستاندىق جوبالىق قۋاتى 120 مىڭ جۇك تاسىمالدىق كونتەينەرلىك تەرمينالدى ىسكە قوسۋ بولدى. بۇل گرۋزيانىڭ نەگىزگى تەڭىز حابتارىنىڭ ءبىرىنىڭ اۋماعىندا ىسكە اسىرىلعان العاشقى قازاقستاندىق ينفراقۇرىلىمدىق جوبا بولىپ تابىلادى. بۇل بىرلەسكەن جۇمىستىڭ تابىستى بولۋىنىڭ جارقىن مىسالى، ول «ورتا ءدالىز» بويىنشا جۇك اعىنى كولەمىن ۇلعايتۋدا ماڭىزدى ءرول اتقارادى. ايتا كەتۋ كەرەك، اتالمىش جوبا قازاقستاننىڭ تحكب اياسىنداعى ينفراقۇرىلىمىن، سونىڭ ىشىندە قىتايدىڭ ليانيۋنگان جانە سيان قالالارىنداعى لوگيستيكالىق تەرمينالداردى تولىقتىرادى. وسىلايشا، شىعىس ازيانى ەۋروپامەن بايلانىستىراتىن ءبىرتۇتاس، دايەكتى لوگيستيكالىق تىزبەك قۇرىلادى»، - دەپ اتاپ ءوتتى ولجاس بەكتەنوۆ.

باعىتتى ودان ءارى دامىتۋ ءدالىزدىڭ تيىمدىلىگىن ارتتىرۋعا، قوسىمشا ترانزيتتىك جۇكتەر مەن ينۆەستيتسيالاردى تارتۋعا مول كەپىلدىك بەرەدى.

سونداي-اق قازاقستان مەن گرۋزيانىڭ ءوڭىردىڭ نەگىزگى لوگيستيكالىق ورتالىقتارى رەتىندەگى ۇستانىمىن نىعايتۋعا مۇمكىندىك جاسايدى. وسى كەزدەسۋ بارسىندا باتۋمي مۇناي تەرمينالى مەن پورتىنىڭ قۋاتتىلىعىن كەڭەيتۋ، سونداي-اق قازاقستاندىق اۋىل شارۋاشىلىعى ونىمدەرىن - استىق، ۇن، ەت-ءسۇت جانە كونديتەرلىك ونىمدەردى گرۋزين نارىعىنا جەتكىزۋدى ۇلعايتۋ مۇمكىندىكتەرى تالقىلاندى.

گرۋزيانىڭ ەكونوميكا جانە تۇراقتىلىقتى دامۋ ءمينيسترى ماريام كۆريۆيشۆيلي قازاقستانمەن ساۋدا، تۋريزم جانە لوگيستيكالىق ينفراقۇرىلىم سالالارىنداعى سەرىكتەستىكتى كەڭەيتۋدىڭ ماڭىزدىلىعىن اتاپ ءوتتى.

بۇل رەتتە تۋريستىك بايلانىستاردى نىعايتۋدىڭ، ەكونوميكالىق ءوسىمدى ىنتالاندىرۋدىڭ جانە كولىك جەلىسىن دامىتۋدىڭ ماڭىزدىلىعى اتاپ ءوتىلدى. كەزدەسۋ قورىتىندىسى بويىنشا تاراپتار قول جەتكىزىلگەن ۋاعدالاستىقتاردى ىسكە اسىرۋعا جانە ۇكىمەتارالىق كوميسسيا شەڭبەرىندە جۇمىستى جالعاستىرۋعا دايىن ەكەندىكتەرىن راستادى.

ءسوزدىڭ سوڭىندا ايتارىمىز: «ترانسكاسپي حالىقارالىق كولىك ءدالىزى» («ورتا ءدالىز») قىتاي-قازاقستان شەكاراسىنان قازاقستان، كاسپي تەڭىزى، ءازىربايجان جانە گرۋزيا ارقىلى ەۋروپاعا وتەدى. جانە ەلىمىزدى رەسەيگە ەكونوميكالىق باسىبايلىقتان تۇبەگەيلى قۇتقارادى.

Abai.kz