اباي قۇنانبايۇلىنىڭ 180 جىلدىق مەرەيتويىنا وراي اباي وبلىسىندا «الەمگە بولعان ايگىلى، دانا اباي – ويدىڭ الىبى» تاقىرىبىندا وبلىستىق ستۋديالىق جاس اقىندار ايتىسى ءوتتى. رۋحاني- مادەني باعىتتاعى بۇل شارانى «اۋىل» پارتياسىنىڭ اباي وبلىسى بويىنشا وڭىرلىك فيليالى ۇيىمداستىردى.

ايتىسقا 4 جاس اقىن قاتىسىپ، 2 جۇپقا جۇپتالىپ، سۋىرىپسالما ونەردە باق سىنادى. ولار: I جۇپ — نۇروللاەۆ راۋان مەن اسۋباەۆ نازار، II جۇپ — ساعيموللاەۆا ەركەجان مەن قۇسمان ادىلەت ءوزارا ايتىسىپ، كوركەم سوزبەن تارتىسقا ءتۇستى.

جاس اقىندار حاكىم اباي مۇراسى، ۇلتتىق رۋح، ەلدىك تاربيە سەكىلدى تاعىلىمدى تاقىرىپتاردى جىرعا قوسىپ، كورەرمەنگە رۋحاني اسەر سىيلادى. سۋىرىپسالما شەشەندىك، وي ۇشقىرلىعى، تاپقىرلىق پەن ءتىل شەبەرلىگى — ءار قاتىسۋشىنىڭ ونەرىندە ايقىن كورىندى.

ايتىس قورىتىندىسىندا بارلىق قاتىسۋشىلارعا ارنايى ديپلومدار مەن قارجىلاي سىيلىقتار تابىستالدى. ماراپاتتاۋ ءراسىمىن سەمەي قالاسى مادەنيەت سارايىنداعى «حالىقتىق اقىندار ورتالىعىنىڭ» جەتەكشىسى، قر مادەنيەت قايراتكەرى دامەش ومارباەۆا جانە «اۋىل» پارتياسىنىڭ اباي وبلىسى بويىنشا وڭىرلىك فيليالىنىڭ توراعاسى قايرات سماعۇلوۆ وتكىزدى.

سونداي-اق، ايتىستى ۇيىمداستىرۋعا جانە اقپاراتتىق قولداۋ كورسەتۋگە بەلسەنە اتسالىسقانى ءۇشىن  دامەش ومارباەۆاعا جانە «بايۋاقوۆ تۆك – 6»تەلەارناسىنىڭ ديرەكتورى بايۋاقوۆ وماربەك قازانعاپۇلىنا وڭىرلىك پارتيا توراعاسى اتىنان «العىس حاتتار» تابىس ەتىلدى.

بۇل جىر دوداسى — اباي رۋحىنا تاعزىم، ۇلتتىق ونەرگە قۇرمەت ءارى جاس بۋىن اراسىنداعى رۋحاني ساباقتاستىقتى نىعايتۋدىڭ ناقتى كورىنىسى بولدى. ايتىس جاستاردىڭ سۋىرىپسالما ونەرگە دەگەن قىزىعۋشىلىعىن ارتتىرىپ قانا قويماي، اباي دانالىعىنىڭ بۇگىنگى ۇرپاق ساناسىندا جاڭعىرۋىنا جول اشتى.

«اۋىل» پارتياسى اباي وبلىسى بويىنشا وڭىرلىك فيليالىنىڭ بءاسپاسوز قىزمەتى  

Abai.kz