جاڭا تالاپتارعا سايكەس، قاعيدالار "جەكە تۇلعالاردىڭ قۇقىقتارى مەن مۇددەلەرىن ساقتاۋ" اتتى جاڭا تاراۋمەن تولىقتىرىلدى.

قازاقستاندا ەكىنشى دەڭگەيلى بانكتەر مەن شەتەلدىك بانكتەردىڭ فيليالدارىندا كليەنتتەردىڭ قۇقىقتارىن قورعاۋ جونىندەگى بولىمشەلەر قۇرىلادى.

بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ تاۋەكەلدەردى باسقارۋ جانە ىشكى باقىلاۋ جۇيەسىن قالىپتاستىرۋ قاعيدالارىنا ەنگىزىلگەن وزگەرىستەرگە سايكەس بەلگىلى بولدى، دەپ حابارلايدى inbusiness.kz سايتى.

كليەنتتەردىڭ قۇقىقتارى مەن مۇددەلەرىنىڭ ساقتالۋىن قامتاماسىز ەتۋ ماقساتىندا بانكتىڭ وزگە قۇرىلىمدىق بولىمشەلەرىنەن تاۋەلسىز ارنايى بولىمشە قۇرۋ مىندەتتى جۇكتەلدى.

مۇنداي بولىمشەلەردىڭ نەگىزگى مىندەتتەرى تومەندەگىدەي:

1. كليەنتتەردىڭ قۇقىقتارى مەن مۇددەلەرىنىڭ ساقتالۋىن باقىلاۋ ماقساتىندا بانك قىزمەتكەرلەرى مەن اگەنتتەرىنىڭ ارەكەتتەرىنە قارجى ونىمدەرىن باقىلاۋ ساتىپ الۋ ارقىلى مونيتورينگ جۇرگىزۋ.

2. جەكە تۇلعالاردىڭ بەرەشەكتەرىن رەەتتەۋگە قاتىستى نەسيە شەشىمدەرىن قابىلداۋ ءتارتىبىن كەلىسۋ.

3. قارجى ونىمدەرىنىڭ شارتتارىن كەلىسۋ كەزىندە تۇتىنۋشىلار ءۇشىن تاۋەكەلدەردى تالداۋ.

4. قارجى ونىمدەرىن جارنامالاۋ جانە ىلگەرىلەتۋ تاجىريبەسىن تالداۋ.

5. بانك نەسيەلىك شارتتارىنا وزگەرىستەر ەنگىزۋ تۋرالى وتىنىشتەردى قاراۋ پروتسەستەرىنىڭ تيىمدىلىگىن باعالاۋ، سونىمەن قاتار وتىنىشتەردى قابىلداۋدىڭ ينتەرنەت-رەسۋرستار مەن ءموبيلدى قوسىمشا ارقىلى جۇزەگە اسۋ ارنالارىنىڭ قولجەتىمدىلىگىن تالداۋ.

6. بانك قارجى ونىمدەرى بويىنشا وتىنىشتەردى ساندىق جانە ساپالىق تۇرعىدان تالداۋ ارقىلى:

– كليەنتتەر ءۇشىن نەگىزگى تاۋەكەلدەردى انىقتاۋ;

– كورسەتىلەتىن قىزمەت ساپاسى مەن ونىمدەردىڭ دەڭگەيىن باعالاۋ;

– قارجىلىق قىزمەتتەردى كورسەتۋ پروتسەسىندەگى جۇيەلى ماسەلەلەردى ايقىنداۋ;

– قىزمەت كورسەتۋ ساپاسىن، وتىنىشتەردى قاراۋ ۇدەرىستەرىن جاقسارتۋعا ۇسىنىستار ازىرلەۋ.

7. جەكە تۇلعالاردىڭ پروبلەمالىق نەسيەلەرىن ازايتۋعا باعىتتالعان جىل سايىنعى ءىس-قيمىل جوسپارلارىنىڭ ورىندالۋىن باقىلاۋ جانە قابىلدانعان شارالاردىڭ تيىمدىلىگىن باعالاۋ.

8. ىشكى قۇجاتتاردا كورسەتىلگەن ۋاكىلەتتى تۇلعالار مەن قۇرىلىمدارعا:

– قارجى ونىمدەرىن ازىرلەۋ، جارناما جانە تاراتۋ بارىسىنداعى كەمشىلىكتەر تۋرالى;

– كليەنتتەرگە قىزمەت كورسەتۋ مەن اقپارات اشۋ راسىمدەرىندەگى زاڭبۇزۋشىلىقتار تۋرالى;

– نەسيەلەۋ پروتسەسىندەگى كەمشىلىكتەر تۋرالى;

– پروبلەمالىق اكتيۆتەردى باسقارۋ ىسىندەگى كەمشىلىكتەر تۋرالى;

– بانك شارتتارىنا وزگەرىستەر ەنگىزۋ جانە شىعىندى وتەۋ جونىندەگى وتىنىشتەردى قاراۋ بارىسىنداعى ولقىلىقتار تۋرالى اقپارات بەرۋ.

9. بانكتىك ومبۋدسمەن شەشىمدەرىنىڭ ورىندالۋىن باقىلاۋ.

10. كليەنتتەردىڭ قۇقىقتارى مەن مۇددەلەرىنىڭ ساقتالۋى جونىندەگى ماسەلەلەر بويىنشا ديرەكتورلار كەڭەسىنە ەسەپ بەرۋ.

11. وسى باعىتتاعى ماسەلەلەردە ۋاكىلەتتى ورگانمەن جەدەل ءوزارا ءىس-قيمىلدى قامتاماسىز ەتۋ.

سونىمەن قاتار، كليەنتتەردىڭ قۇقىقتارى مەن مۇددەلەرىن ساقتاۋ ساياساتى مەن راسىمدەرى مىناداي اسپەكتىلەردى قامتيدى:

– قارجى ونىمدەرىن ۇسىنۋ كەزىندە بانك قىزمەتكەرلەرى مەن اگەنتتەردىڭ ادەپ نورمالارى;

– قارجى ونىمدەرىن ۇسىنۋ ءتارتىبى جانە بارلىق كەزەڭدەردە اشىق تۇردە بەرىلۋگە ءتيىس اقپارات ءتىزىمى;

– ۋاكىلەتتى اگەنتتەردىڭ ءتىزىمى جانە ولاردىڭ بانك ونىمدەرىن ۇسىنۋ راسىمدەرى;

– كليەنتتەرمەن تىكەلەي جۇمىس ىستەيتىن قىزمەتكەرلەر مەن اگەنتتەرگە قويىلاتىن بىلىكتىلىك تالاپتارى;

– ادال ەمەس تاجىريبەلەردى انىقتاۋ جانە الدىن الۋ راسىمدەرى;

– كليەنتتەردىڭ وتىنىشتەرى مەن شىعىندى وتەۋ ماسەلەلەرى بويىنشا شەشىم قابىلداۋعا قاتىساتىن تۇلعالاردىڭ مىندەتتەرى مەن وكىلەتتىكتەرى;

– وتىنىشتەردى، سونىڭ ىشىندە بانك نەسيەلىك شارتتارىنا وزگەرىس ەنگىزۋ جونىندەگى وتىنىشتەردى قاراۋ جانە شەشىم قابىلداۋ راسىمدەرى، ءار كەزەڭنىڭ ناقتى مەرزىمدەرىمەن.

اگەنتتىك بەكىتكەن بۇل جاڭا ەرەجەلەر 2025 جىلعى 16 تامىزدان باستاپ كۇشىنە ەنەدى.

Abai.kz