بۇگىن ورال قالاسىندا اۋىل شارۋاشىلىعى سالاسىنداعى ماڭىزدى وقيعالاردىڭ ءبىرى – «AUYL FEST. قوي شارۋاشىلىعى – 2025» تۇڭعىش حالىقارالىق فورۋمى ءوز جۇمىسىن باستادى.

فورۋمنىڭ اشىلۋ سالتاناتىنا باتىس قازاقستان وبلىسىنىڭ اكىمى ناريمان تورەعاليەۆ، قر پارلامەنتى ءماجىلىسىنىڭ اگرارلىق كوميتەتتىڭ توراعاسى، «اۋىل» پارتياسىنىڭ توراعاسى سەرىك ەگىزباەۆ، قازاقستان رەسپۋبليكاسى پرەمەر-ءمينيسترىنىڭ كەڭەسشىسى ەرالى توقجانوۆ، قر پارلامەنتى ءماجىلىسىنىڭ دەپۋتاتى قاراقات ابدەن، قر اۋىل شارۋاشىلىعى ۆيتسە-ءمينيسترى امانعالي بەردالين جانە مينيسترلىكتەردەن وكىلدەر قاتىستى.

سۋرەت: gov.kz سايتىنان الىندى.

سونىمەن قاتار فورۋم جۇمىسىنا وتاندىق ساراپشىلارمەن قاتار رەسەي فەدەراتسياسى، قىتاي حالىق رەسپۋبليكاسى، ۆەنگريا، فرانتسيا جانە يران يسلام رەسپۋبليكاسىنان كەلگەن حالىقارالىق قوناقتار، عالىمدار مەن اۋىل شارۋاشىلىعى سالاسىنىڭ ماماندارى قاتىسۋدا.

فورۋم اياسىندا قوي شارۋاشىلىعى ونىمدەرىنىڭ ساپاسىن ارتتىرۋ، جاڭا تەحنولوگيالاردى ەنگىزۋ، مال شارۋاشىلىعىنداعى يننوۆاتسيالىق تاسىلدەر، ەكولوگيالىق تۇراقتىلىق پەن ەكسپورتتىق الەۋەتتى كەڭەيتۋ باعىتتارى كەڭىنەن تالقىلانباق.

سۋرەت: gov.kz سايتىنان الىندى.

«مەملەكەت باسشىسى قاسىم-جومارت كەمەلۇلى توقاەۆ ءوز سوزدەرىندە اۋىلدىڭ الەۋەتىن ارتتىرۋعا ەرەكشە نازار اۋدارىپ كەلەدى جانە 2025 جىلدى «جۇمىسشى ماماندىقتارى جىلى»دەپ جاريالاعان بولاتىن. بۇل باستاما – ەڭبەك ادامىنىڭ مارتەبەسىن كوتەرىپ، ناقتى ءوندىرىس پەن كاسىپتىك-تەحنيكالىق ءبىلىم بەرۋ سالاسىنا جاڭا سەرپىن بەرۋگە باعىتتالعان ماڭىزدى قادام»، – دەدى وبلىس اكىمى ناريمان تورەعاليەۆ.

سۋرەت: gov.kz سايتىنان الىندى.

«AUYL FEST. قوي شارۋاشىلىعى – 2025» حالىقارالىق فورۋمىندا عىلىمي-پراكتيكالىق كونفەرەنتسيالار، كورمەلەر، تاجىريبە الماسۋ الاڭدارى ۇيىمداستىرىلماق.

فورۋمنىڭ باستى ماقساتى – اۋىل شارۋاشىلىعى سالاسىنداعى ىنتىماقتاستىقتى نىعايتۋ، زاماناۋي تەحنولوگيالاردى ەنگىزۋ ارقىلى وتاندىق قوي شارۋاشىلىعىنىڭ باسەكەگە قابىلەتتىلىگىن ارتتىرۋ.

سۋرەت: gov.kz سايتىنان الىندى.

Abai.kz