الماتى قالاسىنداعى يران يسلام رەسپۋبليكاسى باس كونسۋلدىعىنىڭ مادەني ىستەر جونىندەگى اتتاشەسى مۇحامماد ماسۇد سادەقي يراننىڭ الەمدەگى قازىرگى بەينەسى ونىڭ تەك كونە مادەني مۇراسى جانە باي تاريحىمەن عانا شەكتەلمەيتىنىن ايتىپ، بۇگىنگى يراندى ءوزىنىڭ داڭقتى تاريحىنا سۇيەنىپ، جارقىن دا وزىق بولاشاق قۇرىپ جاتقان سەرپىندى ەل دەپ اتادى.

سادەقيدىڭ ايتۋى بويىنشا يران 1979 جىلعى يسلام رەۆوليۋتسياسىنىڭ جەڭىسىنەن كەيىن دامۋدىڭ جاڭا جولىنا ءتۇسىپ، ءتۇرلى سالادا ايتارلىقتاي جەتىستىككە جەتتى.

بۇگىنگى يران عىلىم مەن تەحنولوگيا سالاسىندا ايماقتاعى باستى ورتالىقتاردىڭ بىرىنە اينالدى.

مەديتسينا عىلىمىنداعى، اسىرەسە ادامنىڭ دەنە مۇشەلەرىن ترانسپلانتاتسيالاۋ مەن دىڭگەكتى جاسۋشالار سالاسىنداعى ايرىقشا جەتىستىكتەرى يران عالىمدارىنىڭ جوعارى الەۋەتىن كورسەتەدى. ايتاتىن ءجايت، دەنە مۇشەلەرىن ترانسپلانتاتسيالاۋ امالى يراندى الەمدەگى الدىڭعى قاتارلى ەلدەردىڭ قاتارىنا قوستى.

بۇدان بولەك، يران نانوتەحنولوگيا جانە بەيبىت سيپاتقا يە يادرولىق عىلىم سياقتى جاڭا تەحنولوگيالاردى يگەرۋدە ەلدىڭ جاس ءارى تالانتتى ماماندارىنىڭ كۇش-جىگەرىنىڭ ارقاسىندا ۇلكەن تابىسقا جەتتى.

رەۆوليۋتسيادان كەيىنگى يران ونەر مەن مادەنيەت كەڭىستىگىندە دە جاڭا ءارى جاسامپاز اعىمداردىڭ وركەندەۋىنە كۋا بولدى.

يران كينوسى بەدەلدى حالىقارالىق فەستيۆالداردا كوپتەگەن ماراپاتقا يە بولىپ، الەمدىك كورەرمەنگە كەڭ تانىلدى. بۇل جەتىستىك — يران رەجيسسەرلەرىنىڭ الەۋمەتتىك، مادەني جانە ادامي ماسەلەلەرگە تەرەڭ ءۇڭىلۋىنىڭ ناتيجەسى.

سونداي-اق، يراننىڭ كەسكىندەمە مەن ءمۇسىن ونەرىنەن باستاپ، مۋزىكا مەن ادەبيەتكە دەيىنگى زاماناۋي ونەرى جاڭا تاسىلدەردى تاجىريبەدەن وتكەرىپ، يران قوعامىنىڭ زياتكەرلىك سەرپىندىلىگىن ايقىنداي ءتۇستى.

Abai.kz