مەملەكەت باسشىسى وزبەكستان ولي ءماجىلىسى سەناتىنىڭ توراعاسى تانزيلا نارباەۆانى قابىلدادى.

كەزدەسۋ بارىسىندا قازاق-وزبەك ستراتەگيالىق سەرىكتەستىگى مەن وداقتاستىق قاتىناستارىنىڭ وزەكتى ماسەلەلەرى پارلامەنتارالىق بايلانىستاردى دامىتۋ تۇرعىسىنان تالقىلاندى.

پرەزيدەنت قاسىم-جومارت توقاەۆ تانزيلا نارباەۆاعا ءىلتيپات ءبىلدىرىپ، ونىڭ استاناعا ساپارى قازاقستان مەن وزبەكستان اراسىنداعى ستراتەگيالىق ىنتىماقتاستىقتىڭ ايرىقشا سيپاتتا ءوربىپ كەلە جاتقانىن راستايتىنىن اتاپ ءوتتى.

مەملەكەت باسشىسى قوس حالىق اراسىنداعى دوستىق، تاتۋ كورشىلىك بايلانىستاردى نىعايتۋعا وزبەكستان ولي ءماجىلىسى سەناتى توراعاسىنىڭ قوسقان ۇلەسىن جوعارى باعالادى.

– ءسىزدىڭ ساپارىڭىز ەلدەرىمىزدىڭ اراسىنداعى دوستىق قاتىناستاردى نىعايتۋ تۇرعىسىنان وتە ماڭىزدى. ءبىز باۋىرلاس وزبەك ەلىمەن ىنتىماقتاستىعىمىزدى دامىتۋعا ەرەكشە ءمان بەرەمىز. مۇنى ورتالىق ازيا وڭىرىندەگى تۇراقتىلىق پەن قاۋىپسىزدىكتى ساقتاۋدا وتە ماڭىزدى فاكتور دەپ سانايمىز. ەكى ەلدىڭ ىقپالداستىعى نەعۇرلىم تىعىز ءارى تابىستى وربىگەن سايىن، جالپى وڭىردەگى جاعداي دا تىنىش بولادى. ءسىزدىڭ ساپارىڭىز پارلامەنتارالىق بايلانىستى كەڭەيتۋ ءۇشىن شىن مانىندە ماڭىزدى ءرول اتقارادى، – دەدى مەملەكەت باسشىسى.

استاناعا كەلگەن وزبەكستان سەناتىنىڭ ءتورايىمى تانزيلا نارباەۆا ەلورداداعى وزگەرىستەرگە وڭ باعا بەرىپ، قازاقستاندىقتاردىڭ توقاەۆ جۇرگىزىپ جاتقان رەفورمالارعا رازى ەكەنىن ايتتى. ول قازاقستاننىڭ بەدەلى جاھاندىق دەڭگەيدە جوعارى ەكەنىن اتاپ، وزبەكستان ءاردايىم سەنىمدى سەرىكتەس بولاتىنىن جەتكىزدى.

Abai.kz